ಕುಂಬುಡದ ಕೊದ್ದೆಲ್

ಕೆಂಪು ಕುಂಬುಡ ಅತ್ತುಡ ತೀಪೆ ಕುಂಬುಡ ಪ್ರಪಂಚದ ಪೂರಾ ದಿಕ್ಕುಡುಲಾ ತಿಕ್ಕುನ ಒಂಜಿ ತೀಪೆದ ತರಕಾರಿ. ಕೊದ್ದೆಲ್ ತುಳುನಾಡುದ ಜನಪ್ರಿಯ ಪಾಕವಿಧಾನೊಡು ಒಂಜಾತುಂಡು.

ತೀಪೆ ಕುಂಬುಡ

ತೀಪೆದ, ಪರಿಮಳೊದ, ಮೃದು ಆಯಿನ ಬೊಕ್ಕ ರಸಭರಿತವಾಯಿನ ಕುಂಬುಡ ಪೂರಾ ಅಂಶೊಲೆನ್ ಒಯಿತೊನುಂಡು. ಅಂಚಾ ಅವೆನ್ ತಿನ್ನಗ ಮಸ್ತ್ ರುಚಿಯಾಪುಂಡು.

ಕುಂಬುಡದ ಕೊದ್ದೆಲ್

ತೀಪೆದ ಕುಂಬುಡದ ಕೊದ್ದೆಲ್ ದಕ್ಷಿಣ ಕನ್ನಡ ಜಿಲ್ಲೆದ ಅತ್ತುಡಾ ಪೂರಾ ದೈವ, ದೇವಸ್ಥಾನೊಲೆಡು ಅನ್ನದಾನ ಆವಾಡು , ಮದ್ಮೆ , ಮುಂಜಿಯೇ ಆವಾಡ್ , ಕೊದ್ದೆಲ್ ಉಪ್ಪಂದೆ ಒವ್ವೆ ಒನಸ್ ಪೂರ್ಣ ಆಪುಜಿ.

ಕುಂಬುಡದ ಕೊದ್ದೆಲ್ ಮನ್ಪರೆ ಬೋಡಾಪಿನ ಪದಾರ್ಥೊಲು

1/2 ಕೆಜಿ ತೀಪೆದ ಕುಂಬುಡ 1/2 ಲೋಟೆ ತೊಗರಿ ಬೇಳೆ ರುಚಿಗ್ ಉಪ್ಪು ರುಚಿಗ್ ಬೆಲ್ಲ ಕೊತ್ತಂಬರಿ ತೊಪ್ಪು 1/2 ಲೋಟ ತಾರಾಯಿದ ಪೂ 1/2 ಚಮಚ ಕೊತ್ತಂಬರಿ 1/2 ಚಮಚ ಜೀರಿಗೆ 6-7 ಮುಂಚಿ ಒಂತೆ ಪುಣ್ಕೆದ ಪುಳಿ.

ಅರೆಪುಗು

5-6‌ ನುಂಗುದಿನ ಉದ್ದದ ಮುಂಚಿ 1 1/2 ಚಮ್ಚ ಕೊತ್ತಂಬರಿ ಒಂಜಿ ಚಮ್ಚ ಉದ್ದಿನ ಬೇಳೆ ಒಂಜಿ ಚಮ್ಚ ತೊಗರಿಬೇಳೆ 7-8 ಬೆಸೊಪ್ಪುದ ಇರೆಲು 1/4 ಚಮ್ಚ ಮೆತ್ತೆ 1 ಚಮ್ಚ ಎಣ್ಣೆ ಮಿತ್ತುದ ಸಾಮಾನುಲೆನ್ ಕಂದು ಬಂಗಾರ್ದ ಬಣ್ಣ ಬರ್ಪಿನೆಟ್ಟ ಪೊದ್ಪೊಡು‌ . ಅತೆಟೇ ಎಡ್ಡೆ ಪರಿಮೊಳ ಬರ್ರೆ ಸುರು ಆಪುಂಡು. ಆದಗ ಚಪ್ಪೆ ಆವರೆ ಜಾದ್ ದೀಲೆ. ಒಗ್ಗರಣೆ ಪಾಡರೆ: 2 ಚಮ್ಚ ಎಣ್ಣೆ 1 ಚಮ್ಚ ಸಾಸಿವೆ ಒಂತೆ ಬೆಸೊಪ್ಪುದ ಇರೆಲು ಇಂಗ್ ಒಂತೆ ಒಂಜಿ ಕೆಂಪು ಉದ್ದದ ಮುಂಚಿನ್ ತುಂಡು ತುಂಡು ಆದ್ ಕತ್ತರೊಡು.

ಕುಂಬುಡದ ಕೊದ್ದೆಲ್ ಮನ್ಪುನ ವಿಧಾನೊ

ಒಂಜಿ ಲೋಟ ನೀರ್ ಬೊಕ್ಕ 1/2 ಚಮ್ಚ ಮಂಜೊಲು ಪೊಡಿದೊಟ್ಟು ತೊಗರಿ ಬೇಳೆನ್ ಕೊದಿಪಾವೊಡು. ಬೊಕ ಕುಂಬುಡೊನು ಪೊರ್ಲುಡು ದೆಕ್ಕುದು ತುಂಡು ತುಂಡು ಮಂತುದು, ಒಂತೆ ನೀರ್ ಬೊಕ ಉಪ್ಪುದೊಟ್ಟು ಬೇಯಿಪಾವೊಡು. ಪೊತ್ತುದಿನ ಮಸಾಲೆದ ಪದಾರ್ಥೊಲೆನ್ ಮಿತ್ತು ಪಂಡಿನ ಕಚ್ಚಾ ಪದಾರ್ಥೊದೊಟ್ಟುಗು ಶೋಕುಡು ಕಡೆಯೊಡು. ಎಡ್ಡೆ ಸಣ್ಣ ಆಯಿ ಬೊಕ್ಕ , ಬೇಯಿಪಾದಿನ ಕುಂಬುಡದೊಟ್ಟು ಬೊಕ್ಕ ದತೊಗರಿ ಬೇಳೆದೊಟ್ಟು ಒಂಜಿ ಬಾಜನೊಡು ಪಾಡುದು, ಮಸಾಲಾ ಪೂರಾ ಸೇರಾದು ಬೊಕ್ಕ ಕುದಿಯರೆ ಬುಡೊಡು. ರುಚಿಗ್ ತಕ್ಕ ಬೆಲ್ಲ ಬೊಕ್ಕ ನೀರ್ ಸೇರಾದು, 10 ನಿಮಿಷೊ ಮುಟ್ಟ ಕೊದಿಪಾವೊಡು, ಕೊದಿನ ಬೊಕ್ಕ ಜಾದು ಒಗ್ಗರಣೆ ಪಾಡೊಡು. ಕಡೆಗ್ ತುಂಡು ಮಂದಿನ ಕೊತ್ತಂಬರಿ ಸೊಪ್ಪುನು ಕೊದ್ದೆಲ್ ದ ಮಿತ್ತು ಬಿರ್ಕುದು ಅಲಂಕಾರ ಮನ್ಪೊಡು. ಬೆಚ್ಚ ಬೆಚ್ಚ ಉರ್ಪೆಲ್ ಅತ್ತುಡ ಬೊಳಂತೆ ಅರಿತ ನುಪ್ಪುದೊಟ್ಟು ಬಲಸೊಡು.

ಮರ್ದುದ ಗುಣೊಲು

ಕುಂಬುಡೊಡು ಬೀಟಾ ಕ್ಯಾರೋಟಿನ್ ದ ಪೋಷಕಾಂಶ ಉಂಡು, ಅವು ಕಣ್ಣುದ ಆರೋಗ್ಯಕ್ ಪೂರಕವಾದುಂಡು. ಈ ತರಕಾರಿಗ್ ಬಂಗಾರುದ ಬಣ್ಣ ಬರ್ರೆ ಈ ಪೋಷಕಾಂಶನೇ ಕಾರೊಣ. ಬೀಟಾ ಕ್ಯೋರೋಟಿನ್ ನಮ್ಮ ಜೀರ್ಣಾಂಗೊಡು ಜೀರ್ಣ ಆಯಿನ ಬೊಕ ರೆಟಿನಾಲ್ ಪನ್ಪಿನ ಪೋಷಕಾಂಶವಾದ್ ಮಾರ್ಪಾಡು ಆಪುಂಡು. ಉಂದೊಂಜಿ ವಿಟಮಿನ್ ಎ ಆದ್ ಕಣ್ಣ್ ಗ್ ಅತ್ಯುತ್ತಮ ಆಯಿನ ಪೋಷಕಾಂಶವಾದುಂಡು.

ಕುಂಬುಡೊದ ಬೀಜೊಲು ಮಸ್ತ್ ಪ್ರಮೊಣದ ಪೋಷಕಾಂಶೊಲು ಬೊಕ ರೋಗ ನಿರೋಧಕ ಶಕ್ತಿನು ಹೊಂದುದುಂಡು. ಕುಂಬುಡ ಕ್ಯಾನ್ಸರ್‌ ಡ್ದು ರಕ್ಷಣೆ ಪಡೆಯೊನರೆಲ ಸಹಕಾರಿ ಆಪುಂಡು, ಜೀರ್ಣಕ್ರಿಯೆಲೆನುಲಾ ಸುಧಾರಿಸುಂಡು. ಕುಂಬುಡದ ಬೀಜೊಲು ನೆತ್ತೆರುದ ಸಕ್ಕರೆದ ಮಟ್ಟೊಲು, ನೆತ್ತೆರುದ ಒತ್ತಡ ಬೊಕ್ಕ ಕೊಲೆಸ್ಟ್ರಾಲ್ ಲಾ ನಿರ್ವಹಣೆ ಮನ್ಪರೆ ಸಹಕಾರಿಯಾದುಂಡು. ಉಂದು ಜೀರ್ಣ ಕಾರ್ಯಗುಲಾ ಒವ್ವೆ ಒಂಜಿ ತೊಂದರೆ ಆವಂದೆ ಪರಿಣಾಮಕಾರಿಯಾದು ಕಾರ್ಯ ನಿರ್ವಹಣೆ ಮನ್ಪರೆ ಅವಶ್ಯಕವಾದುಂಡು.

ಕುಂಬಳಕಾಯಿಡ್ ಎಡ್ಡೆ ಪ್ರಮಾಣೊಡು ಪೊಟ್ಯಾಸಿಯಂ ಬೊಕ್ಕ ಕರಗುನ ನಾರ್ ಉಪ್ಪುಂಡು, ಪೊಟ್ಯಾಸಿಯಂ ಆರೋಗ್ಯಕರ ಹೃದಯೊಗು ಒಂಜಿ ಪ್ರಮುಖ ಪೋಷಕಾಂಶ. ಕುಂಬಳಕಾಯಿ ಬೀಜೊಡು ಒಮೆಗಾ-3 ಫ್ಯಾಟಿ ಆಯಿಲ್ ಉಪ್ಪುಂಡು, ಉಂದು ಹೃದಯೊಗು ಎಡ್ಡೆ. ಈ ಪೋಷಕಾಂಶೊಲು ಮೆದುಳುದ ಚುರುಕುತನೊನು ವರ್ಧನೆ ಮಲ್ಪೆರೆಲಾ ಸಹಾಯ ಮಲ್ಪುಂಡು. ಈ ಬೀಜೊಲೆಡ್ ಕರ್ಬ ಬೊಕ್ಕ ಪ್ರೋಟೀನ್ ಮಸ್ತ್ ಉಪ್ಪುನೆರ್ದಾತ್ರ ಒಟ್ಟಾರೆ ಆರೋಗ್ಯೊಗು ಮಸ್ತ್ ಉಪಕಾರಿ ಆಪುಂಡು. ಅಂಚನೆ, ರಕ್ತೊಡು ಸಕ್ಕರೆದ ಮಟ್ಟೊನು ನಿಯಂತ್ರಣ ಮಲ್ಪೆರೆ ಪ್ರಯತ್ನ ಮಲ್ಪುನಕುಲೆಗ್ ಕುಂಬಳಕಾಯಿ ಬೀಜೊಲು ಸಹಾಯಕ ಆಪುಂಡು.