ತೂಟೆದಾರ

ವಿಕಿಪೀಡಿಯರ್ದ್

ತೂಟೆ ದಾರ(ಸೂಟೆ ಪಂಡ್‌ದ್ಲಾ ಪುದರ್ ಉಂಡು. ತೂಟೆ ಪಂಡ ಸೂ ಪೊತ್ತಾಯಿನ ದೊಂದಿ) ಕಟೀಲ್‌ದ ದೇವಿಗ್ ಸಂದಾವುನ ಒಂಜಿ ಪರಕೆ, ಅತ್ತಂದೆ ಸಾಂಕೇತಿಕವಾಯಿನ ಒಂಜಿ ನಮುನೆದ ಗೊಬ್ಬು. ಉಂದೆನ್ ಕಟೀಲ್ ತೇರ್‌ದ ಕಡೆತಾನಿ ಗೊಬ್ಬುವೆರ್.

ಗೊಬ್ಬುದ ಪೊರ್ತು[ಸಂಪೊಲಿಪುಲೆ]

ಪ್ರತಿ ವರ್ಷ ಕಟೀಲು ದುರ್ಗಾಪರಮೇಶ್ವರಿ ದೇವಸ್ಥಾನೊದ ತೇರ್ ಮುಗಿ ಬೊಕ್ಕ ದೇವಿನ ಅವಭೃತ ಸ್ನಾನ ನಡಪುಂಡು. ಅವಭೃತ ಸ್ನಾನ ಅಯಿಬೊಕ್ಕ ಈ ತೂಟೆದಾರ ಗೊಬ್ಬುವೆರ್.[೧]

ಪಾಲ್ ದೆತೊಂಬುನಕುಲು[ಸಂಪೊಲಿಪುಲೆ]

ತೂಟೆದಾರ ಪರಕೆ ಸಂದಾಯ ಮಲ್ಪುನ ಅವಕಾಶ ಕಟೀಲ್‌ದ ಕೈತಲ್ ಉಪ್ಪುನ ಅತ್ತೂರು ಬೊಕ್ಕ ಕೊಡತ್ತೂರು ಗ್ರಾಮದ ಜನಕುಲೆಗ್ ಮಾತ್ರ ಇಪ್ಪುನು. ಬೇತೆ ಊರುದಕುಲೆಗ್ ಈ ಗೊಬ್ಬು ಅತ್ಂಡ ಪರಕೆಡ್ ಪಾಲ್ ಪಡೆಯರ ಅವಕಾಸೊ ಇಜ್ಜಿ.

ಗೊಬ್ಬುನ ಕ್ರಮ[ಸಂಪೊಲಿಪುಲೆ]

ವರ್ಷಂಪ್ರತಿ, ಕಟೀಲ್ ಜಾತ್ರೆ ಜಾತ್ರೆ ಎಣ್ಮ ದಿನ ನಡಪುಂಡು. ಪರಕೆ ಸಂದಾವುನ ರಡ್ ಗ್ರಾಮೊದ ಗ್ರಾಮಸ್ತೆರ್ ಈ ಎಣ್ಮ ದಿನ ಉಪಾಸ ಕುಲ್ಲುವೆರ್. ಅತ್ತಂದೆ, ಆತ್ ದಿನ ಸರಾಯಿ, ಮಾಸ ಸೇವನೆ ಬೊಕ್ಕ ದುರಭ್ಯಾಸೊಲೆನ್ ಬುಡ್ದು ಸಸ್ಯಾಹಾರದ ಉಣಸ್ ಮಾತ್ರ ಮಲ್ಪುವೆರ್. ತೇರ್‌ದ ಕಡೆತಾನಿ, ಕಟೀಲ್ದಪ್ಪೆನ ಅವಭೃತ ಮುಗಿಪೆಟ್‌ಗ್ ತೂಟೆದಾರದ ಪರಕೆ ಪಂಡಿನ ಭಕ್ತೆರ್ಲಾ ಮೀಪೆರ್. ಐಡ್ದ್ ಬೊಕ್ಕ ಕುಂಕುಮ ಪ್ರಸಾದ ವಿತರಿಸಾವೆರ್. ವಿತರಣೆ ಆಯಿನ ಕುಂಕುಮ ಪ್ರಸಾದೊನು ರಡ್ ಗ್ರಾಮದ ಭಕ್ತೆರ್ ಅಕಲ್ನ ಮೈ ಕೈಕ್ ಪೂಜೊಂಬೆರ್. ಪರಕೆ ಪಂಡಿನಕುಲು ತಾರಾಯಿದ ಮಡಲ್‌ದ ತೂಟೆನ್ ಅಕಕಲೆನ ಇಲ್ಲಡ್ ತಯಾರಿಸಾದ್ ಪತೊಂದು ಬರ್ಪೆರ್. ಲುಂಗಿ ಅತ್‌ಡ, ಮುಂಡು ತುತ್ತಿನ ರಡ್ ಗ್ರಾಮದ ಗ್ರಾಮಸ್ತೆರ್ ದೇವಸ್ಥಾನದ ಕೈತಲ್‌ದ ಗುಡ್ಡೆಡ್ ಸೇರ್ದ್ ಎದುರುಬದುರಾದ್ ಉಂತುವೆರ್. ವರ ಸೂಚನೆ ಸಿಕ್ಕಿಬೊಕ್ಕ, ಒಂಜಿ ಬರಿಟ್ ಉಂತುದಿನಕುಲು ನನೊಂಜಿ ಬರಿಟ್ ಉಂತುದಿನಕಲ್ನ ಮಿತ್ ತೂಟೆನ್ ಅಡಕೊಂಬೆರ್. ಈ ಗೊಬ್ಬು ಸುಮಾರ್ ಪೊರ್ತು ನಡಪುಂಡು. ಈ ಗೊಬ್ಬುಡು, ಎದುರುಬದುರು ಉಂತಿನಕುಲೆಡ್ ಏರ್ ಮೂಜಿ ಸರ್ತಿ ಪಿರ ಜಾರುವೆರಾ ಅಕುಲು ಸೋತಿಲೆಕ್ಕ. ಕೆಲವು ಸರ್ತಿ ಗೊಬ್ಬುನಗ ನಡುಟು ಲಡಾಯಿ ಆಪುನ ಸಾಧ್ಯತೆಲಾ ಉಂಡು. ದಾಯೆಗ್ ಪನ್ನಗ ತೂಟೆ ಅಡಕುನಕುಲು ಈ ಗೊಬ್ಬುಡು ಗೆಂದೊಡು ಪಂಡ್‌ದ್ ಮಸ್ತ್ ಕೋಪ, ಬೆಚ್ಚಡೇ ಅಡಕುವೆರ್. ಅಪಗ ಗ್ರಾಮದ ಹಿರಿಯಕುಲು ಬತ್‌ದ್, ಪರಿಸ್ಥಿತಿನ್ ನಿಯಂತ್ರಿಸಾವೆರ್. ದೇವಸ್ತಾನೊದ ಕೈತಲ್‌ದ ಗುಡ್ಡೆಡ್ ಸುರುತ ಸುತ್ತು ಗೊಬ್ಬುವೆರ್. ರಡ್ಡನೇ ಸುತ್ತುದ ಗೊಬ್ಬುನು ದೇವಸ್ಥಾನೊದ ಎದುರುದ ಜಾಗೆಡ್ ಗೊಬ್ಬುವೆರ್.

ಪುರಾಣ- ಇತಿಹಾಸ[ಸಂಪೊಲಿಪುಲೆ]

ಈ ಗೊಬ್ಬುದ ಬಗ್ಗೆ ಒವ್ವೇ ಪುರಾಣೊಡ್ ಮಾಹಿತಿ ಇಜ್ಜಿ ಅಂಡ, ಮಸ್ತ್ ದುಂಬುದ ಕಾಲೊಡು, ದುಷ್ಟ ಶಕ್ತಿಲೆನ್ ಸಂಹಾರ ಮಲ್ತಿನ ದೇವಿನ್ ಸಮಾಧಾನ ಮಲ್ಪರ, ಬೊಕ್ಕ ದೇವಿನ ಕುಸಿಗಾದ್ ಈ ತೂಟೆದಾರ ಗೊಬ್ಬುದಿತ್ತೆರ್ ಪನ್ಪಿನ ಕಥೆ ಉಂಡು.

ಉಂದೆನ್‌ಲಾ ತೂಲೆ[ಸಂಪೊಲಿಪುಲೆ]

ಉಲ್ಲೇಕೊಲು[ಸಂಪೊಲಿಪುಲೆ]

  1. 2 ಗ್ರಾಮಸ್ಥರ ನಡುವೆ ಬೆಂಕಿಯ ಭೀಕರ ಕಾದಾಟ