ಪೊಂಜೊವುಲೆನ ಸಬಲೀಕರಣ

ಪೊಂಜೊಲೆನ ಸಬಲೀಕರಣ ಪಂಡ ಶಕ್ತಿವಂತೆರಾದುಪ್ಪುನು ಅತ್ತ್ಂಡ ಎಡ್ಡೆ ಅಧಿಕಾರ್ ಹೊಂದುದುಪ್ಪುನು. ಸಬಲತೆ ಪನ್ಪಿನವು ಅಂಜೊವುಲು ಬೊಕ್ಕ ಪೊಂಜೊವುಲು ರಡ್ಡ್ ಜನೊಕುಲಾ ಸಮಾಜೊಡೂ ಬದ್ಕರೆ ಬೋಡುಪ್ಪುನ ಒಂಜಿ ಶಕ್ತಿ. ಒಂಜಿ ಪೊಂಜೊವು ಸ್ವತಂತ್ರವಾದ್, ಆಲೆನ ಇ‍ಷ್ಟ ಪ್ರಕಾರ ಸ್ವಾವಲಂಬಿಯಾದ್ ಬದುಕ್ಂಡ ಅವೆನ್ ಸಬಲತೆ ಪಂದ್ ಪನೊಲಿ. ಪೊಂಜೊವೆನ ಸಬಲತೆ ಅಕಲೆನ ಮಾನಸಿಕ ಸ್ಠಿತಿ ಮಿತ್ತ್ ಲಾ ಅವಲಂಬಿನಾದುಂಡು. ಒವ್ವೇ ರೀತಿದ ಅಸಮಾನತೆಗ್ ಬಲಿ ಆವಂದೆ ತನ್ನ ಜೀವನದ ಬಗ್ಗೆ ನಿರ್ಣಯ ದೆತೊನುನ, ಓದು, ಕೆಲಸ, ಮದಿಮೆ, ಸಂತಾನದ ಬಗೆಟ್ ತೀರ್ಮಾನ ಮಲ್ಪುನ ಸ್ವಾತಂತ್ರ್ಯ ಇತ್ತ್ ಂಡ ಅವ್ವೇ ಸಬಲತೆ. ಸಾಮಾಜಿಕವಾದ್, ರಾಜಕೀಯವಾದ್ ಬೊಕ್ಕ ಆಡಳಿತೊಡು ಪಾಲ್ ಪಡೆಪಿನ ಶಕ್ತಿ ಇತ್ತ್ ಂಡ ಅವುಲಾ ಪೋಜೊವುಲೆನ ಸಬಲೀಕರಣ. ಆರ್ಥಿಕ ಸ್ವಾತಂತ್ರ್ಯ, ಹಕ್ಕುಲೆನ ಬಗೆತ ಗೇಣ, ಆರೋಗ್ಯ ಸೇವೆ, ಆಸ್ತಿ ಸಂಪನ್ಮೂಲದ ಮಿತ್ತ್‌ದ ಒಡೆತನ ಇಂಚಿನವು ಪೋಜೊವುಲೆಗ್ ಇತ್ತ್ ಂಡ ಅಪಗ ಪೊಂಜೊವು ಸಬಲೆ.

ಸಬಲತೆಗ್ ಕಾರಣ ಆಪಿನ ಅಂಶೊಲು[ಸಂಪೊಲಿಪುಲೆ]

ಕೆಲಸ: ತನ್ನ ಶಕ್ತಿ ಸಾಮರ್ಥೊಗು ಅನುಗುಣವಾಗಿ ಸರ್ಕಾರಿ ಬೊಕ್ಕ ಖಾಸಗೀ ಕ್ಷೇತ್ರೊಡು ಕೆಲಸ ಮಾತ್ರ ಅತ್ತಾಂದೆ ಸ್ವ ಉದ್ಯೋಗೊದ ಅವಕಾಶ.
ಆರೋಗ್ಯ: ಎಡ್ಡೆ ಒಣಸ್ ತಿನಸ್ ಬೊಕ್ಕ ಬಂಜಿನಾಲ್ ಆದುಪ್ಪುನಗ ಬೊಕ್ಕ ಪೆದ್ದ್ ನಗ ತಿಕ್ಕೊಡಾಯಿನ ಎಡ್ಡೆ ಆರೋಗ್ಯ ಸೇವೆ
ಸಂಪನ್ಮೂಲದ ಬಳಕೆಗ್ ಅವಕಾಶೊಲು: ಇಲ್ಲಡ್, ಸಮಾಜೊಡು ಬೊಕ್ಕ ಕೆಲಸದ ಜಾಗೋಡು ಸಂಫನ್ಮೂಲದ ಬಳಕೆಗ್ ಅವಕಾಶ ಇಪ್ಪೊಡು.
ಸಾಮಾಜಿಕ ಬೊಕ್ಕ ರಾಜಕೀಯ ಆಡಳಿತೊಡು ಪಾಲ್ ಪಡೆದ್ ತೀರ್ಮಾನ್ ದೆತೆನುನ ಅವಕಾಶ
ಆರ್ಥಿಕ ಸ್ವಾವಲಂಬನೆ:ಬೆನ್ಪಿನೆಕ್ಕ್ ತಕ್ಕ ಪ್ರತಿಫಲ, ಆಸ್ಥಿ ಬೊಕ್ಕ ಕೆಲಸ ದಾಲಾ ಅಸಮಾನತೆ ಉಪ್ಪಂದೆ ತಿಕ್ಕುನ ಅವಕಾಶ ಮಾತ್ರ ಅತ್ತಾವಂದೆ ಕಾಸ್ ಸಂಪಾದನೆ ಬೊಕ್ಕ ಖರ್ಚಿ ಮಲ್ಪುನೆತ್ತ ಬಗೆತ ಸ್ವಾತಂತ್ರ್ಯ.
ವೃತ್ತಿ ಕೌಶಲ್ಯ, ಸಂವಹನ, ಒಟ್ಟುಗು ಕೆಲಸ ಮಲ್ಪುನ ಕೌಶಲ್ಯ, ಆತ್ಮಗೌರವ ಬೊಕ್ಕ ಆತ್ಮವಿಶ್ವಾಸ ಉಂದೆನ್ ಬುಲೆಪಾವುನ.

ಪೊಂಜೊವುಲೆನ ಸಬಲೀಕರಣದ ಉದ್ದೇಶೊಲು[ಸಂಪೊಲಿಪುಲೆ]

ಸಮಾಜೊಡುಪ್ಪುನ ಲಿಂಗ ತಾರತಮ್ಯನ್ ಕಮ್ಮಿ ಮಲ್ಪರೆ ಬೊಕ್ಕ ಪೊಂಜೊವುಲೆನ ಗೌರವ ಹಾಗೂ ಸಾಮಾಜಿಕಸ್ಥಾನಮಾನೊನ್ ಎಡ್ಡೆ ಮಟ್ಟೋಗು ಕೊನವರೆಗ್ ಅಕಲೆನ ಸಬಲೀಕರಣದ ಅಗತ್ಯ ಮಸ್ತ್ ಉಂಡು. ಅಕಲೆಡ್ ಉಪ್ಪುನ ಅಪೂರ್ವ ಸಾಮರ್ಥೊನು ಗುರುತಿಸಾದ್. ಅವೆನ್ ಬೊಲ್ಪುಗ್ ಕನ್ಪಿನಂಚಿನ ಆತ್ಮವಿಶ್ವಾಸ ಕನವರೆಗ್ ಸಬಲೀಕರಣ್ ಆವೊಡು. ಪೊಂಜೊವುಲೆನ್ ಹಕ್ಕ್ ಅಕಲೆನ ಬಗೆಟ್ ಉಪ್ಪುನ್ ಕಾನೂನುದ ಬಗ್ಗೆ ತೆರಿಪುಲೆಕ್ಕ ಮಲ್ಪುನಲಾ ಸಬಲೀಕರಣದ ಉದ್ದೇಶ. ಬಂಜಿನಕಲೆಗ್, ಪೆದ್ಮೆದಿನಕಲೆಗ್ ಇಪ್ಪೊಡಾಯಿನ ಆರೋಗ್ಯದ ತಿಳಿವಳಿಕೆ ಬೊಕ್ಕ ಪೆದ್ದುನಗ ಬೊಕ್ಕ ಜೋಕುಲೆನ್ ತಾಂಕುನ ಪೊರ್ತುಡ್ ಉಪ್ಪೊಡಾಯಿನ ತಿಳುವಳಿಕೆ ಕೊರ್ಪಿನ ಸಬಲೀಕರಣದ ನನೊಂಜಿ ಉದ್ದೇಶ.

ಸಬಲರಾಯಿನ ಪೊಂಜೊವುಲೆಡ ತೋಜಿ ಬರ್ಪಿನ ಗುಣೊಕುಲು[ಸಂಪೊಲಿಪುಲೆ]

ದೈಹಿಕ ಬೊಕ್ಕ ಮಾನಸಿಕ ಆರೋಗ್ಯ ಉತ್ತಮ ಸ್ಥಿತಿಟುಪ್ಪುಂಡು.
ಆತ್ಮ ಗೌರವ, ಆತ್ಮವಿಶ್ವಾಸ ಇತ್ತಿನ ಸ್ವಾಭಿಮಾನ ಇತ್ತಿನ ಸ್ವಾವಲಂಬಿಲಾದುಪ್ಪುವೆರ್
ತನ್ನ ಹಕ್ಕ್ ಲೆನ ಬಗೆತ ತಿಳಿವಳಿಕೆ ಉಪ್ಪುಂಡು.
ಶಿಕ್ಷಣ ಬೊಕ್ಕ ಬೇಲೆದ ಅವಕಾಶ ತಿಕ್ಕುಂಡು.
ಆರ್ಥಿಕವಾದ್ ಸ್ವಾತಂತ್ರವಾದುಪ್ಪುವೆರ್
ಆರ್ಥಿಕ, ಸಾಮಾಜಿಕ ,ರಾಜಕೀಯ ಬೊಕ್ಕ ಅಡಳಿತ ಕ್ಷೇತ್ರೊಡುಲಾ ಮೊಕುಲು ಪಾಲ್ ಪಡೆಪೆರ್.
ಸಂವಹನ ಕೌಶಲ ಬೊಕ್ಕ ನಾಯಕತ್ವದ ಗುಣ ಇತ್ತ್ ದ್ ಮೊಕುಲು ಸಮಾಜದ ಸಂಘ ಸಂಸ್ಥೆದ ಕೆಲಸೊಲೆಡ್ ಪಾಲ್ ಪಡಪೆರ್
ಆಡಳಿತ ಬೊಕ್ಕ ರಾಜಕೀಯ ವ್ಯವಹಾರೊಡು ಆತ್ಮವಿಶ್ವಾಸೊಡು ಪಾಲ್ ಪಡೆಪೆರ್.
ಪೂರಾ ಸೌಲಭ್ಯೊಲೆನ್ ಬೊಕ್ಕ ಅವಕಾಶೊಲೆನ್ ಪಡೆಪಿನ ಮಾರ್ಗ ತೆರಿದುಪ್ಪುವೆರ್.
ಶೋಷಣೆಗೆ ತಿಕ್ಕಂದೆ ಉಪ್ಪುನ ಬೊಕ್ಕ ಶೋಷಣೆ ಆಂಡಲಾ ನ್ಯಾಯ ಗೋಸ್ಕರ ಹೋರಾಟ ಮಲ್ಪುನ ಶಕ್ತಿ ಉಪ್ಪುಂಡು.
ಮದ್ಮೆದ ಪ್ರಾಯ, ಸಂತಾನೋತ್ಪತಿ, ಆರೋಗ್ಯ, ಜೋಕುಲೆನ ಸಂಖ್ಯೆದ ಬಗ್ಗೆ ತಿಳಿವಳಿಕೆ ಉಪ್ಪುಂಡು.
ಸಾಮಾಜಿಕ ನ್ಯಾಯ, ಶೋಷಣೆದ ವಿರುದ್ದದ ಹೋರಾಟೊಡುಲಾ ಪಾಲ್ ಪಡೆಪೆರ್.

ಪೊಂಜೊವುಲೆನ ಸಬಲೀಕರೊಣೊಡು ಶಿಕ್ಷಣದ ಪಾತ್ರ[ಸಂಪೊಲಿಪುಲೆ]

ಪೊಂಜೊವುಲೆನ ಜೀವನೊಡು ಸಬಲತೆ ಕನವರೆಗ್ ಶಿಕ್ಷಣ ಒಂಜಿ ಮುಖ್ಯವಾಯಿನ ಮಾರ್ಗ. ಪೊಂಜುವುಲ್ ಕಲ್ತೆರ್ ಡ ಅವು ಅಕಲೆನ ಉದ್ಯೋಗೊಗು ತಾದಿ ತೋಜಪಾವುಂಡು. ಅವು ಮಾತ್ರ ಅತ್ತಾಂದೆ ಅಕಲೆನ ಹಕ್ಕ್, ಆರೋಗ್ಯ, ಜೋಕುಲೆನ ಸಮಸ್ಯೆ ಇಂಚ ಮಾತ ವಿಷಯೊದ ಬಗೆಟ್ ತೆರಿಯೊನರೆಲಾ ಉಪಯೋಗೊಗು ಬರ್ಪುಂಡು. ಸಾಮಾಜಿಕವಾದ್, ರಾಜಕೀಯವಾದ್ ಪಾಲ್ ಪಡೆಯರೆಲಾ ಶಿಕ್ಷಣ ಸಹಾಯ ಮಲ್ಪುಂಡು. ಅಂಚಾದ ಓದಿನ ಪೋಜೊವುಲೆನ ಜೀವನೊಡು ಓದು, ಪ್ರತ್ಯಕ್ಷ ಬೊಕ್ಕ ಪರೋಕ್ಷವಾದ್ ಅಕಲೆನ್ ಸಬಲೆಯಾದ್ ಮಲ್ಪುನ ಶಕ್ತಿನ್ ಪಡೆತ್ತ್ಂಡ್.

ಉಲ್ಲೇಕೊ[ಸಂಪೊಲಿಪುಲೆ]