ಬಳಕೆದಾರೆ:Ashokalva/ಎನ್ನ ಕಲ್ಪುನ ಕಳ

ಕುಕ್ಕುದ ಮರ

ತುಳುವ ಸಂಸ್ಕೃತಿಡ್ ಕುಕ್ಕುದ ಮರಕ್ಕ್ ಭಾರೀ ಪ್ರಾಮುಖ್ಯತೆ ಉಂಡು. ಪುಟ್ಟು, ಮದಿಮೆ, ಸಾವು ಈ ಮಾಂತ ಸಂದರ್ಭೊಲೆಡ್ಲಾ ಕುಕ್ಕುದ ಮರ, ಇರೆತ್ತ ಉಪಯೋಗ ಆಪುಂಡು. ಕುಕ್ಕುದ ಇರೆ ಮದಿಮೆದ ಸಂದರ್ಭೊಡು ಉಪಯೋಗ ಆಂಡ ಮರ ಒಂಜಿ ವ್ಯಕ್ತಿ ತನ್ನ ಕಾಯೊ ಬುಡಿ ಬೊಕ್ಕ ಉಪಯೋಗ ಆಪುಂಡು. ಸಾಮಾನ್ಯವಾದ್ ನಮ್ಮ ಹಳ್ಳಿಲೆಡ್ ಒಂಜಿ ಪ್ರಾಯೊದ ವ್ಯಕ್ತಿ ಇತ್ತೆರ್ ಂಡ ಆರ್ ತನ್ನ ಜೀವಮಾನೊದ ಕಡೇತ ಕಾಲೊಡು ತಾನ್ ಸೈತಿ ಬೊಕ್ಕ ಉಂದುವೇ ಕುಕ್ಕುದ ಮರ ಕಡ್ಪೊಡುಂದು ತನ್ನ ಜೋಕುಲೆಗ್ ತೋಜಾಬಿ ಸಂದರ್ಭೊಲಾ ಇತ್ತ್ ಂಡ್. ಒರಿ ವ್ಯಕ್ತಿ ಸೈತಿ ಕೂಡ್ಲೆ ತುಳುನಾಡ್ ಸುರುಟು ಮಲ್ಪಿ ಕೆಲಸೊ ಎಂಚಿನ ಪಂಡ ಅಕುಲೆನ್ ಇಲ್ಲದ ಮೂಲೊದಕುಲೆಗ್ ಪಂಡ್ದ್ ಕಡುಪುಡುನ. ಅಕುಲು ಸಾವುದ ಇಲ್ಲಡೆ ಬತ್ದ್ ಕುಕ್ಕುದ ಮರ ಕಡ್ಪುನೆಕ್ ದುಂಬು ಏರ್ ಸೈದಿನಾಯನ ಕ್ರಿಯೆ ಪತ್ತುವೆನಾ ಆಯೆ(ಸಾಮಾನ್ಯಾದ್ ಮಲ್ಲ ಮಗೆ) ಕುಕ್ಕುದ ಮರಕ್ಕ್ ಮೂಜಿ ಸರ್ತಿ ಗಡಿ ದೀಪುನ ಕ್ರಮೊ ಉಂಡು. ಇಂದೆಕ್ಕ್ ಗಡಿ ದೀಪುನಿಂದೇ ಪುದರ್. ಅವೆಡ್ದ್ ಬೊಕ್ಕ ಮೂಲದಕುಲು ಆ ಮರನ್ ಕಡ್ತ್ ದ್ ಕನಕ್ಕ್ ಮಲ್ಪುವೆರ್. ಪುಣ ಮೀಪಾವುನ ನೀರ್ ದೀನಗ ಉಂದುವೇ ಕುಕ್ಕುದ ಮರತ್ತ ಮೂಜಿ ಕೆತ್ತೆನ್ ಕೊನತ್ ದ್ ಆ ನೀರ್ ಗ್ ಪಾಡುನ ಕ್ರಮೊ ಉಂಡು. ಅವೆಡ್ದ ಬೊಕ್ಕ ಮೂಲದಕುಲು ಸೈದಿನಾಯನ್ ಪೊತ್ತಾಯೆರೆ ಕಾಟೊದ ಕೆಲಸೊ ಮಲ್ಪುವೆರ್ . ಕಾಟೊದ ಅಡಿಕ್ಕ್ ಸುರುಟು ಅಡಿಮರ ಪಾಡುನಿ ಉಂದುವೇ ಕುಕ್ಕುದ ಮರತ್ತವು. ಅವೆಡ್ದ ಬೊಕ್ಕ ಕುಕ್ಕುದ ಕನಕ್ಕ್ ದ ಒಟ್ಟುಗು ಬಾಕಿ ಮರತ್ತ ಕನಕ್ಕ್ ಲೆನ್ ಲಾ ಉಪಯೋಗ ಮಲ್ಪೊಲಿ. ಪುಣತ್ತ ಮೀಪಾಟಿಕೆ ಮಲ್ಪಾದ್ ಐತೊ ಆಯಿ ಬೊಕ್ಕ ಮಾತೆರ್ಲಾ ಬಾಯಿಗ್ ನೀರ್ ಬುಡ್ಪಿ ಕ್ರಮೊ ಉಂಡು. ಅವೆಡ್ದ್ ಬೊಕ್ಕ ಪುಣನ್ ದೆತೊಂದು ಬತ್ತ್ ದ್ ಕಾಟೊಗು ಮೂಜಿ ಸುತ್ತು ಕನತ್ತ್ ದ್ ಕಾಟೊದ ಮಿತ್ತ್ ದೀದ್ ಅಲ್ಪ ಇತ್ತಿನಕುಲ್ಲು ಪುನತ್ತ ಬಾಯಿಗ್ ನೀರ್ ಬುಡ್ಪಿ ಕ್ರಮೊ ಉಂಡು. ಅವೆಡ್ದ ಬೊಕ್ಕ ಸೈದಿನಾಯನ ಮುಟ್ಟದ ಸಂಬಂಧಿಲು ಕುಕ್ಕುದ ಎಲ್ಯ ಕನಕ್ಕ್ ನ್ ಪುನತ್ತ ಮಿತ್ತ್ ದೀದ್ ಮಗೆ ಕಾಟೊಗು ತೂ ಕೊರ್ಪೆ. ಆನಿಯೇ ಈ ಕಡ್ದಿ ಕುಕ್ಕುದ ಮರತ್ತ ಒಂಜಿ ಎಲ್ಯ ಗೆಲ್ಲ್ ನ್ ಕನತ್ ದ್ ಇಲ್ಲದ ಮಾಡ್ಡ್ ಕುತ್ತುನ ಕ್ರಮೊ ಉಂಡು. ಉಂದೆನ ಅರ್ಥೊ ಈ ಇಲ್ಲಲ್ ಸಾವು ನಡತ್ ನೆಡ್ದಾವರೋ ಪಿದಯಿದಕುಲು ಏರ್ಲಾ ಮದಿಮೆ ಅಂಚನೇ ಬಾಕಿದ ಎಡ್ಡೆ ಲೇಸ್ ದ ಲೆಪ್ಪು ಲೆನ್ ಈ ಇಲ್ಲಡೆ ಕೊರಿಯೆರೆ ಬಲ್ಲಿ ಪನ್ಪಿ ಉದ್ದೇಶೊನೇ ಇಂದೆನ ಪಿರವುದ ಆಶಯ.