ಬಳಕೆದಾರೆ:Dinesh Bangera Irvathur/ಎನ್ನ ಕಲ್ಪುನ ಕಳ

`ದಡ್ಪಲೆ' `ದಟೊಲಿ '

`ದಡ್ಪಲೆ' ಅತ್ತುಂಡ `ದಟೊಲಿ'ದೈ. ಸಾಮಾನ್ಯವಾದ್ ತೋಟ, ಕಂಡದ ಬರಿಟ್, ಅತ್ತುಂಡ ಜಾಗೆದ ರಕ್ಷಣೆಗ್ ಬೋಡಾದ್ ಬೇಲಿಗಾದ್ ನಡ್ಪೆರ್. ಅವು ಬುಡುಂಡ ಎಚ್ಚಿನಕ್ಲೆಗ್ ನೆತ್ತ ಉಪಯೋಗ ದಾದ ಪಂದ್ ಗೊತ್ತಿಜ್ಜಿ. ಇಂಚಿಪ ಈ ದೈಕ್ಲಾ ಬೇಡಿಕೆ ಬೈದುಂಡ್. ಅಂಚಾದ್ ಉಂದೆನ್ ಕರ್ನಾಟಕ ರಾಜ್ಯೋಡ್ ವಾಣಿಜ್ಯ ಬುಳೆಯಾದ್ ಬುಲೆಪಾವೊಂದು ಉಲ್ಲೆರ್. ಕ್ಯಾಕ್ಟಸ್ ಜಾತಿಗ್ ಸೇರಿನ ದಡ್ಪಲೆಡ್ ಸುಮಾರ್ 250 ಜಾಸ್ತಿ ಬೇತೆ ಬೇತೆ ವಿಧೋಲು ಉಂಡು. ಇಂಗ್ಲಿಷ್ ಡ್ ಉಂದೆನ್ `ಅಗೇವ್' ಪಂದ್ ಲೆಪ್ಪುವೆರ್. ಕನ್ನಡಡ್ `ಕತ್ತಾಳೆ' ಪನ್ಪೆರ್. ಅಮರಿಲಿಡೇಸೀ ಅಥವಾ ಅಗೇವೇಸೀ ಕುಟುಂಬಗ್ ಸೇರ್ನ ಈ ದಯಿ ಬರ್ಸ ಕಮ್ಮಿ ಬೂರ್ನ ಪ್ರದೇಶೊಡು ಬುಲೆವುಂಡು. ಉಂದೇರ್ದ್ ನಾರ್, ನೂಲು, ಟಾರ್ಪಲೀನ್, ವ್ಯಾನಿಟಿ ಬ್ಯಾಗ್‌, ಕೈ ಚೀಲ ತಯಾರ್ ಮಲ್ಪುವೆರ್. ಈ ದಯಿತ ಇರೆಕ್ಕುಲು ನೀರ್ ನ್ ಭಾರೀ ಪ್ರಮಾಣೋಡು ಒಯಿಪುನ ಶಕ್ತಿ ಪಡೆದ್೦ಡ್. ಇರೆತ ಕೊಡಿಟ್ ಬಾರೀ ಗಟ್ಟಿದ ಮುಳ್ಳು ಉಪ್ಪುಂಡು. ಬೇರ್ ಮಣ್ಣುದ ಆಳಗ್ ಪೋಪುಂಡು. ಈ ದಯಿಕ್ ಇರೆ ಇಪ್ಪುನು ಅತ್ತ್. ಅಯಿತ ಕಾಂಡನೇ ಇರೆತ್ತ ರೂಪ ಪಡೆದುದುಂಡು. ಒರ ಉಂದೆತ್ತ ಮುದೆಲ್ ಗ್ ನೀರ್ ಬೂರುಂಡ ಅವು ಆವಿ ಆದ್ ಪಿದಾಯಿ ಪೋಪುಜಿ. `ದಡ್ಪಲೆ'ದ ದೈನ್ ಕರಂಬುದ ಜೂಸ್ ದೆಪ್ಪುನಂಚಿನ ಮಿಶಿನ್ ಗ್ ಪಾಡ್ ದ್ ನಾರ್ ದೆಪ್ಪುವೆರ್. ಈ ನಾರ್ ನ್ ನುಂಗಾದ್ ಮಾರುವೆರ್. ನಾರು ದೆತ್ತಿ ಬೊಕ್ಕ ಒರಿನ ರಸ ಬೊಕ್ಕ ಚೋಲಿ ಎಡ್ಡೆ ಗೊಬ್ಬರ ಆಪುಂಡು. ಆಜಿ ತಿಂಗೊಲು ಕುರಿಯರೆ ಪಾಡಿ ಬೊಕ್ಕ ಉಂದು ಕಾಂಪೋಸ್ಟ್ ಗೊಬ್ಬರ ಆಪುಂಡು. ಅಂಚಾದ್ ನೆತ್ತ ಗೊಬ್ಬರಗ್ಲಾ ಎಡ್ಡೆ ಡಿಮಾಂಡ್ ಉಂಡು.

ಕಂಜಿ ಕೈಕಂಜಿಲೆಗ್ ಪರೆಂಗಿ ರೋಗ ಬತ್ತುಂಡ ನೆತ್ತ ರಸ ದೆತ್ತ್ ದ್ ಕೊರ್ಪೆರ್. ದುಂಬು ಜೋಕುಲ್ ಎಲ್ಯ ಇಪ್ಪುನಗ ನೆತ್ತ ಮುಳ್ಳುಡ್ ಕೆಬಿ ಕುತ್ತೊಂದು ಇತ್ತೆರ್ಗೆ ಅತ್ತಂದೆ ಅವ್ವೆ ಮುಳ್ಳುಡ್ ಮುಂಡೊನು ಚುಚ್ಚುದ್ (ಹಚ್ಚೆ, tattoo)ಮೈಯಿ ಮುಟ್ಟಾದ್ ಬುಡೊಂದು ಇತ್ತೆರ್. ಮೆಕ್ಸಿಕೋ ಪನ್ಪಿನ ದೇಸೊಡು ಉಂದೆತ್ತ ಇರೆ ಬೊಕ್ಕ ಪೂ ಬುಡ್ಪಿನ ದಿಂಡ್ ದ ರಸ ದೆತ್ತ್ ದ್ ಕುರಿಯರೆ ಬುಡುದು ಒಂತೆ ಅಮಲ್ ಉಪ್ಪುನ ಜ್ಯೂಸ್ ದೆಪ್ಪುವೆರ್ ಅವೆನ್ ಅಕುಲ್ ಪಲ್ಕ್ (pulque) ಪಂದ್ ಪನ್ ಪೆರ್. ಅವು ಅಲ್ಪದ ರಾಷ್ಟ್ರೀಯ ಪಾನೀಯ ಆದುಂಡು. ಅತ್ತಾಂದೆ ಈ ದೈತ ಕಂಡೆನ್ ಕುರಿಯರೆ ಪಾಡ್ ದ್ ಗಂಗಸರ ದೆಪ್ಪುವೆರ್. ಈ ಅಮಲ್ ದ ಟಕಿಲಾ (Tequila) ಪನ್ಪಿನ ಮದ್ಯ ವಿಶ್ವದಾದ್ಯಂತ ಭಾರೀ ಪ್ರಸಿದ್ಧ ಆದುಂಡು. ದಡ್ಪಲೆಡ್ ಐವೊರ್ದು 100 ಮುಟ್ಟ ಇರೆಕುಲು ಉಪ್ಪುಂಡು. ಒಂಜಿ ದೈಕ್ 100-200 ರೂ.ಆದಾಯ ತಿಕ್ಕುಂಡು. ಮರಿಯಾಲಡ್ ದೈ ನಡ್ದ್ ಬುಡುಂಡ ಆಯಿತತಿಗೇ ನೀರ್ ಇಜ್ಜಿಡಲ ಬುಲೆಪುಂಡು. ದಡ್ಪಲೆದ ದೈಕ್ ಒವ್ವೆ ಸೀಕ್ ಬರ್ಪುಜಿ. ಚಿತ್ರದುರ್ಗ, ಮೊಳಕಾಲ್ಮೂರು, ಚಳ್ಳಕೆರೆ ತಾಲೂಕುಡು ದಡ್ಪಲೆ ದೈನ್ ಬುಳೆಪವೊಂದು ಉಲ್ಲೆರ್.