ಬಳಕೆದಾರೆ:Sangeetha sharath shetty/ಎನ್ನ ಕಲ್ಪುನ ಕಳ

ತುಳುನಾಡ್ ಡ್ ಪೊಣ್ಣು ಪೋದು ಪೊಂಜವು ಆಪಿನ ಪೊರ್ತುಡು ಕರ ಪತ್ತಾವುನ ಪನ್ಪಿ ಕ್ರಮ

ಪರಶುರಾಮ ದೇವೆರ್ನ ಕುಡರಿಡ್ ಉಂಡಾಯಿನ ನಾಗನಡೆ ಸರ್ಪಜಿಡೆ, ದೈವ ದೇವೆರ್ ನೆಲೆ ಆಯಿನ ಪಂಚವರ್ಣ್ ದ ಈ ಮಣ್ಣ್ ಡ್ ನಮ್ಮ ಹಿರಿಯಾಕುಲು ಅನಾದಿಕಾಲೊರ್ದು ಕಟ್ಟ್ ಪ್ರಕಾರ ಮಲ್ತೊಂದು ಬೈದಿನ ಕೆಲವು ಸಂಪ್ರದಾಯೊಲು ಇನಿಕ್ಕ್ ಮೂಲೆ ಸೇರೊಂದುಂಡು. ತುಳುನಾಡ್ ಪನ್ನಗ ಮೈಪೂರ ಇರ್ಮೆನೆ ಆದ್ ಮುಲ್ಪದ ಪುಟ್ಟಿನೆರ್ದ್ ಸೈಪಿನಮುಟ್ಟದ ಸಂಪ್ರದಾಯ ನಮ್ಮ ಕಣ್ಣದಿಕ್ಕಿಗ್ ದುಂಬುಬರ್ಪುಂಡು. ಅಂಚೆನೆ ತುಳುನಾಡ್ ಡ್ ಪೊಣ್ಣುಜೋಕುಲೆಗ್ ವಿಶೇಷ ಆಯಿನಂಚಿನ ಮಾನಾದಿಗೆಲಾ ನಮ್ಮ ತುಳುವೆರ್ ಕೊರ್ಪೆರ್. ಬಾಕಿದ ಊರುಡು ಪೊಣ್ಣು ಪುಟ್ಟುಂಡ ಸಸಾರ ಮಲ್ಪುಲೆಕ ನಮ್ಮ ತುಳುನಾಡ್ ಡ್ ಪೊಣ್ಣುಜೋಕುಲು ಪಂಡ ಲಕ್ಷ್ಮಿ ದೇವೆರೆಗ್ ಸಮಾನ ಪಂದ್ ಕೊಂಡಾಡುವೆರ್. ಒಂಜಿ ಪೊಣ್ಣು ಬಾಲೆ ಎಲ್ಯೆಡ್ ಉಪ್ಪುನಗ ಅಕೆಗ್ ಒವ್ವೆ ನಮೂನೆದಲ ನಾಚಿಕೆ ಪಂದ್ ಉಪ್ಪುಜಿ. ಆಲ್ ಆನ್ ಜೋಕುಲ್ನ ಒಟ್ಟಿಗೆ ಗೊಬ್ಬೊಂದು ಪತ್ತೊಂದು ಉಪ್ಪುವಲ್. ಅವ್ವೆ ಒಂಜಿ ಪೊಣ್ಣು ಮದಿಮಾಲಾಯೊಲ್ ಪನ್ನಗ ಅಲೆಗ್ ನಾಚಿಕೆದ ಒಟ್ಟಿಗೆ ಅಲೆನ ಶರೀರೊಡು ಅನೇಕ ತರತ್ತ ಬದಲಾವಣೆ ಗೋಚರೊಗು ಬರ್ಪುಂಡು. ಜೋಕುಲ್ನ ಒಟ್ಟಿಗೆ ಗೊಬ್ಬೊಂದಿಪ್ಪುನ ಪೊಣ್ಣುಬಾಲೆ ತನ್ನ ಶರೀರೊಡು ಆಯಿನ ಬದಲಾವಣೆನ್ ಪೋಡಿಗೆಡ್ ಇಲ್ಲದ ಅಪ್ಪೆಡ ಅತ್ತ್ಂಡ ಅಜ್ಜಿಡ ಪಂಡಿನ ಸಾತ್ ಗ್ ಅಪ್ಪೆ ಅಮ್ಮೆ ಅಂಚೆನೆ ಇಡೀ ಇಲ್ಲದಕುಲು ಬಾರೀ ಖುಷಿಪಡೆಪೆರ್ ಮಗಳ್ ಮದಿಮಾಲ್ ಆಯಲ್ ಪನ್ಪಿನ ಪೆರ್ಮೆ ಅಕಲ್ನ ಉಡಲ್ಡ್ ದಿಂಜುಂಡು.

ಮದಿಮಾಲ್ ಆಪಿನಿ ಅತ್ತ್ಂಡ ಪೊಣ್ಣು ಪೋದು ಪೊಂಜೊವು ಆಯಿನ ಪೊಣ್ಣುಮಗಳೆನ್ ಕೆರ್ಚಿ ಪಾರ್ದಿನ ತಾರಾಯಿಡ್ ತಾರೆದ ಮರತ್ತ ಮುದೆಲ್ಡ್ ಕುಲ್ಲದ್ ಮೂಜಿ ಜನ ಅತ್ತ್ಂಡ ಐನ್ ಜನ ಮುತ್ತೇಸಿ ಪೊಂಜೊವುಲು ಅಲೆನ ತರೆಕ್ಕ್ ನೀರ್ ಮೈತ್ ದ್ ಪೊರ್ಲು ಮೀಪಾದ್ ಒಂಜಿ ಕಲಸೆ ಅತ್ತ್ಂಡ ಒಂಜಿ ಮುಡಿ ಬಾರ್ ದ ಮುಡಿ ಕಟ್ಟ್ ದ್ , ಆ ಮುಡಿತ್ತ ಮಿತ್ತ್ ಕುಲ್ಲಾದ್ ಸೋಬಾನೆ ಪಂಡ್ ದ್ ಆರತಿ ಮಲ್ಪುವೆರ್. ಅಲ್ತ್ ಬೊಕ್ಕ ಅಲೆಗ್ ಒಂರ್ಭ ಅತ್ತ್ಂಡ ಪದಿಮೂಜಿ ದಿನ ಅಡ್ಪಿಲ್ಲ್ ಅಂಚೆನೆ ದೈವದೇವೆರೆನ ಇಲ್ಲ್, ಗುವೆಲ್ ಉಂದೆನ್ ಮಾತ ಮುಟ್ಟಂದೆ ಇಲ್ಲ ರ್ದ್ ಪಿದಾಯಿಲ ಪೋವಂದಿಲೆಕ ಮೋಕೆಡ್ ತೂಪೆರ್. ಪೊಣ್ಣು ಕುಲ್ದಿನ ಮುಡಿತ್ತ ಬಾರ್ ನ್ ಉಜ್ಜೆರ್ ಡ್ ಮೆದ್ ತ್ ದ್ ಐತ ಬಜಿಲ್ ಮಲ್ತ್ ದ್ ಅವೆನ್ ಬೆಲ್ಲ ತಾರಾಯಿಡ್ ಮೊರೆತ್ ದ್ ತಿನೆರೆ ಕೊರ್ಪೆರ್. ಅಂಚೆನೆ ಪಜ್ಜಿ ಕಡೆದ್ ಕೊರ್ಪೆರ್ ಓಲೆಬೆಲ್ಲ ಪಾರ್ದ್. ಪೊಣ್ಣನ ಮೋನೆ ಪೊರ್ಲು ಬೂರ್ರೆ ಮೆತ್ತ ಅಡ್ಪಿನ ಕ್ರಮಲ ಮಲ್ಪುವೆರ್. ಆ ಪೊಣ್ಣಗ್ ಪೊರ್ತುಡು ತರೆಕ್ಕ್ ಪಿಂಗಾರ ಪೂ ದೀಯೆರೆ ಬಲ್ಲಿ ಪನ್ಪಿನ ಕಟ್ಟ್ ನ್ ನಮ್ಮ ಹಿರಯಕುಲು ಮಲ್ದೆರ್. ಪೊಣ್ಣು ಮದಿಮಾಲಾದ್ ಒಂರ್ಭ ಇಜ್ಜಿಂಡ ಪದಿಮೂಜಿ ದಿನ ಕರಿನೆ ನಿರೆಕರೆತ್ತ , ಬೋಡು ಬೋಡಿತ್ತಿನ ಕುಟುಂಬ ಸಂಸಾರದಕ್ಲೆನ್ ಇಲ್ಲಡೆ ಲೆತ್ತ್ ದ್ ಕರಪತ್ತಾವುನು ಪನ್ಪಿನ ಲೇಸ್ ದೆಪ್ಪುವೆರ್. ಈ ಲೇಸ್ ದ ದಿನತ್ತಾನಿ ಪೊಣ್ಣನ್ ಮದಿಮಾಲ್ ಐತ ಮಲ್ತ್ ದ್ ಆರತಿ ದೆರ್ತ್ ದ್ , ಸೇರಿಂಚಿ ಬಿನ್ನೆರ್ ಪೊಣ್ಣಗ್ ಆಶೀರ್ವಾದ ಮಲ್ತ್ ದ್ ಉಡಿಗಿರಲ ಕೊರ್ಪೆರ್. ಈ ಕರ ಪತ್ತಾವುನ ಕಟ್ಟ್ ಆವಂದೆ ದುಂಬುದ ಕಾಲೊಡು ದೈವದೇವಸ್ಥಾನೊಲೆಗ್ ಮದಿಮಾಲ್ ಆಯಿನ ಪೊಣ್ಣಗ್ ಪೋಯೆರೆ ಇತ್ತಿಜಿ. ಅಂಚೆನೆ ಈ ಕರಪತ್ತಾವುನ ಕ್ರಮ ಆವಂದಿ ಪೊಣ್ಣುಲೆಗ್ ಕಲಿಪೊಣ್ಣುಲು ಪನ್ಪಿನ ಪುದರ್ಡ್ ಲೆತ್ತೊಂದಿತ್ತೆರ್ಗೆ. ಪೊಸಪೊಸ ವಿಷಯೊಲೆನ್ ಕಲ್ತೊಂದು ಬರ್ಪಿನ ನಮ ಇನಿಕ್ಕಾನಗ ನಮ್ಮ ಹಿರಿಯಾಕುಲು ಮಲ್ದಿನ ಪರಕಟ್ಟ್ ಲೆನ್ ಮದತ್ ಬುಡೊಂದುಲ್ಲ. ಇತ್ತೆ ಕರಪತ್ತಾವುನ ಕ್ರಮ ಅಳಿದ್ ಪೋವೊಂದು ದೇವಸ್ಥಾನೊಗು ಪೋದು ಕಲಶ ನೀರ್ ಮೀದ್ ಸುಲಭೊಡು ಮುಗಿತೊಂದುಲ್ಲ ಪೊಣ್ಣು ಮದಿಮಾಲ್ ಆಯಲ್ ಪನ್ಪಿನ ಸಂತೋಷದ ವಿಷಯೊನು. ನಮ್ಮ ಕಟ್ಟ್ ದುಂಬುದಕ್ಲೆಗ್ ತೆರಿಯೊಡು ಪಂದಾಂಡ ಕಟ್ಟ್ ಲೆನ್ ಬುಲೆಪಾವುನ ಕೆಲಸ ನಮ ಮಾತೆರೆರ್ದ್ ಲಾ ಆವೊಡು. ನಮ್ಮ ತುಳುನಾಡ ಸಂಸ್ಕೃತಿನ್ ನಮ್ಮ ಜೋಕುಲೆಗ್ ಕಲ್ಪಾದ್ ಅರ್ಥಮಲ್ಪಾದ್ ಅವೆನ್ ಬುಲೆಪಾವೊಂದು ಪೋಪಿನ ಕೆಲಸೊನು ತುಳುವ ಜನಕುಲು ನಮ ಮಾತ ಒಟ್ಟು ಸೇರ್ದ್ ಮಲ್ಪುಗ...

✍🏻ಕಿಶೋರ್ ಎಕ್ಕಾರ್.