ಮುಂಬಯಿ

ಮುಂಬಾಯಿ

ಬೊಂಬಾಯಿ
ಮುಂಬಾಯಿ ಬೊಂಬಾಯಿ
ಮಹಾನಗರ
	ಮಿತ್ತ್ ಡುದು ತಿರ್ತು: ಕಫ್ ಪೇರೆಡ್ ಬಾನರೇಖೆ, ಗೇಟ್ ವೇ ಆಫ್ ಇಂಡಿಯಾ, ತಾಜ್ ಮಹಲ್ ಪೇಲೆಸ್ ಹೋಟೆಲ್, ಛತ್ರಪತಿ ಶಿವಾಜಿ ಟರ್ಮಿನಸ್ ಬುಕ್ಕೊ ಬಾಂದ್ರ - ವೋರ್ಲಿ ಕಡಲ ಕೊಂಡಿ.

ಮುಂಬಯಿ (ಬೊಂಬಾಯಿ, ಬಾಂಬೆ ಪುದರ್‌ಲಾ ಉಂಡು) ಭಾರತದ ಮಲ್ಲ ಪೆಂಟೆಲೆಡ್ ಒಂಜಿ. ಮಹಾರಾಷ್ಟ್ರ ರಾಜ್ಯದ ರಾಜಧಾನಿ. ಭಾರತೊಡು ಉದ್ದಿಮೆಲೆಡ್ ಪಣವುದ ಬೇರೊಲೆಡ್ ಬಾರೀ ಪುದರ್ ಉಪ್ಪುನ ಪೇಂಟೆ. ಭಾರತ ದೇಶೊಡು ಮಸ್ತ್ ದಿಂಜ ಜನಸಂಖ್ಯೆ ಉಪ್ಪುನ ನಗರ ಮುಂಬಯಿ. ಮುಂಬಯಿ ಭಾರತ ದೇಶದ ಪಶ್ಚಿಮ ಕರಾವಳಿಡ್ ಉಂಡು. ಮುಂಬಯಿಡ್ ಶೈಕ್ಷಣಿಕ ಬೆಳವಣಿಗೆ ಮಸ್ತ್ ಎಡ್ಡೆ ಉಂಡು. ಮುಲ್ಪದ ಸಾರಿಗೆ ವ್ಯವಸ್ಥೆಲಾ ಎಡ್ಡೆ ಉಂಡು. ಭಾರತದ ಸಿನೆಮಾ ಉದ್ಯಮದ ಮಲ್ಲ ಕೇಂದ್ರ ಮುಂಬಯಿ ಆದುಂಡು. ಆಯಿನೆಡ್ದಾವರ ಈ ಮಲ್ಲ ಪೇಂಟೆಗ್ "ಭಾರತದ ಹಾಲಿವುಡ್" ಬುಕ್ಕೊ ಬಾಲಿವುಡ್ ಪನ್ಪಿನ ಪುದರುಲು ಬೈದ್ಂಡು.

ಚರಿತ್ರೆ

ಕ್ರಿಸ್ತ ಪೂರ್ವ ೩೦೦ ದುದ ಸುಮಾರುಗ್ ಈ ಪ್ರದೇಶೊ ಸಾಮ್ರಾಟೆ ಅಶೋಕನ ಆಳ್ವಿಕೆಗ್ ಸೇರ್ದಿತ್ತ್ಂಡ್ ಪಂಡ್‌ದ್ತೆರಿದ್ ಬರ್ಪುಂಡು. ಬುಕ್ಕೊ ಇನ್ನಗ ಸುಮಾರು ಕ್ರಿಶ್ತ ಶಕ ೨೫೦ ದ ಗ್ರೀಕೆರೆನ ಸಾಹಿತ್ಯೊಲೆಡ್ ಹೆಪ್ತಾನೆಸಿಯಾ (ಏಳ್ ದ್ವೀಪೊಲೆನ ಊರು) ಪನ್ಪುನ ಪುದರು ಮುಂಬಾಯಿದ ಪ್ರಾಕ್ದ ಪುದರುಂದ್ ನಂಬಿಗೆ ಉಂಡು.

ಮುಂಬಾದೇವಿ

ಮುಂಬಾಯಿ ಪನ್ಪುನ ಪುದರ್ ಈ ಊರುಡು ಉಪ್ಪುನ ಮುಂಬಾ ದೇವಿನ ದೇವಸ್ಥಾನೊಡುದು ಬೈದ್ಂಡ್ ಪಂಡ್‌ದ್ಪಣ್ಪೆರ್. ಈ ಮುಂಬಾ ದೇವಿನ ಮಂದಿರ ಝವೇರಿ ಬಜಾರ್ ಪನ್ಪುನ ತಾಣೊಡು ಉಂಡು.

ಪೋರ್ಚುಗೀಸೆರ್ ಈ ಊರುಗು ಬೊಂಬಾಹಿಯಾ ಪಂಡ್‌ದ್ಪಣೊಂದಿತ್ತೆರ್ ಪನ್ಪುನ ಪಾತೆರ ಉಂಡು. ಬೊಂಬಾಹಿಯಾ ಕ್ರಮೇಣ ಬೊಂಬಾಯಿ ಆಂಡ್. ಬ್ರಿಟಿಷೆರ್ ಅವೆನ್ ಬೊಂಬೇ ಪಂಡ್‌ದ್ಮಲ್ತೆರ್. ೧೯೯೫ನೆ ಇಸವಿಡ್ ಈ ಮಹಾನಗರದ ಪುದರುನ್ ಮುಂಬಾಯಿ ಪಂದ್ ಬದಲ್ ಮಲ್ತೊಂಡೆರ್.

ಜನಸಂಖ್ಯೆ - ವಿಸ್ತೀರ್ಣ

೨೦೧೧ ಇಸವಿದ ಜನಗಣತಿಡ್ ಮುಂಬಾಯಿದ ಜನಸಂಖ್ಯೆ ೧೨೪,೪೨,೩೭೩. ಮುಂಬಯಿ ನಗರದ ಇತ್ತೆದ ಜನಸಂಖ್ಯೆ ಸುಮಾರ್ ೧೮.೪ ಮಿಲಿಯನ್ ಪಂದ್ ಅಂದಾಜಿ ಮಲ್ತ್‌ದೆರ್. ಇಡೀ ವಿಶ್ವೊಡು ಮಸ್ತ್ ಜನಸಂಖ್ಯೆ ಉಪ್ಪುನ ೮ನೇ ನಗರ ಮುಂಬಯಿ.^[೧] ಮುಂಬಾಯಿ ನಗರ ಸಮುದ್ರ ಮಟ್ಟೊಡುದು ಸರಾಸರಿ ೧೪ ಮೀಟರ್ ಎತ್ತರೊಡು ಉಂಡು. ಮುಂಬಾಯಿ ನಗರೊದ ವಿಸ್ತೀರ್ಣ ೬೦೩ ಚದರ ಕಿಲೊಮೀಟರ್. ಮಹಾನಗರ (ಮೆಟ್ರೊಪಾಲಿಟನ್) ಪ್ರದೇಶದ ವಿಸ್ತೀರ್ಣ ೪೩೫೫ ಚದರ ಕಿಲೊಮೀಟರುಲು.

ಬೊಂಬಾಯಿ-ಮುಂಬಾಯಿ

ಬೊಂಬಾಯಿ ಒಂಜಿ ಪೇಂಟೆ ಆದ್ ಅಸ್ತಿತ್ವೊಗು ಬತ್ತಿನಿ ೧೫೦೭ ಇಸವಿಡ್ ಪಂಡ್‌ದ್ಪಣ್ಪೆರ್. ಮುಂಬಯಿಗ್ ದುಂಬು ಬ್ರಿಟಿಷೆರೆನ ಕಾಲೊಡು ಬಾಂಬೆ (Bombay ) ಪನ್ಪುನ ಪುದರ್ ಇತ್ತ್ಂಡ್. ಊರುದಕುಲು ಬೊಂಬಾಯಿ ಪಂಡ್‌ದ್ಪಣೊಂದು ಇತ್ತೆರ್. ಭಾರತೊಗ್ ಸ್ವಾತಂತ್ರ್ಯ ತಿಕ್ಕಿಬುಕ್ಕೊ ಬಾಂಬೆ ಒಂಜಿ ರಾಜ್ಯ ಪಂದ್ ಅಸ್ತಿತ್ವಗ್ ಬತ್ತ್ಂಡ್. ೧೯೬೦ರ್ದ್ ಬುಕ್ಕೊ ನಡತಿನ ಸಂಯುಕ್ತ ಮಹಾರಾಷ್ಟ್ರ ಆಂದೋಲನದ ಪರಿಣಾಮ ಪೊಸ ರಾಜ್ಯ ಮಹಾರಾಷ್ಟ್ರ ಅಸ್ತಿತ್ವಗ್ ಬತ್ತ್ಂಡ್. ಬಾಂಬೆ ಐತ್ತ ರಾಜಧಾನಿ ಆಂಡ್. ಬಾಂಬೆಗ್ ೧೯೯೬ಡ್ ಮುಂಬಯಿ ಪನ್ಪುನ ಪುದರ್ ಕೊರಿಯೆರ್.