ರಜನಿ ಶೆಟ್ಟಿ

ರಜನಿ ಶೆಟ್ಟಿ ಮೂಕ ಪ್ರಾಣಿಲೆನ ಸಂರಕ್ಷಕಿ ಪಂದೇ ಪುದರ್ ಮಂದಿನ ಶ್ರೀಮತಿ ರಜನಿ ಶೆಟ್ಟಿ ಅರೆಗ್ ಪ್ರಾಣಿ -ಪಕ್ಷಿಲೆನ ಬಗ್ಗೆ ಅಪಾರವಾಯಿನಂಚಿನ ಪ್ರೇಮ. ಅಯಿಟಲಾ ಅಸಹಾಯಕವಾಯಿನ ಪ್ರಾಣಿ -ಪಕ್ಷಿಲೆನ ಮಿತ್ತ್ ಅಂತು ಒಂತೆ ಜಾಸ್ತಿಯೇ ಒಲವು.

ಜನನೊ

ಮುಂಬೈಡ್ ವಾಸವಾದುಪ್ಪುನ ರಘುರಾಮ ಬೊಕ್ಕ ರತ್ನ ದಂಪತಿನಕಲೆನ ರಡ್ಡ್ ಜೋಕುಲೆನೆಟ್ ಹಿರಿಯವರಳಾದ್ 1979ಡ್ ರಜನಿ ಜನಿಸಿಯೆರ್. . ಪತ್ತನೇ ತರಗತಿ ಮುಟ್ಟ ಮಾತ್ರ ಮೆರೆನ ವಿದ್ಯಾಭ್ಯಾಸ. ಬಾಲ್ಯೊಡೇ ಪ್ರಾಣಿ ಪಂಡ ಮಸ್ತ್ ಮೋಕೆ. ನಾಯಿ ಪುಚ್ಚೆಲೆಗ್ ಬಿಸ್ಕತ್ತು ಕೊರೊಂದು ಇತ್ತೆರ್. 1997 ಡ್ ಮಂಗಳೂರು ನಿವಾಸಿ ಆಯಿನ ದಾಮೋದರ ಶೆಟ್ಟಿ ಅರೆನ್ ಮದಿಮೆ ಆಯಿ ಬೊಕ್ಕ ಮಂಗಳೂರುಗು ಬತ್ತು ನೆಲೆಸಿಯೆರ್.

ಪ್ರಾಣಿಲೆನ ಮಿತ್ತುದ ಪ್ರೇಮ

ಮದಿಮೆ ಆದ್ ಮಂಗಳೂರುಗ್ ಬತ್ತಿ ಬೊಕ್ಕ ತಾನು ವಾಸಿಸುನ ಇಲ್ಲದ ಅಕ್ಕಪಕ್ಕೊಡು ಇತ್ತಿನ ಬೀದಿ ನಾಯಿಲೆನ ಮಿತ್ತು ಮೆರೆನ ದೃಷ್ಟಿ ಹರಿಂಡ್. ಇಲ್ಲದ ಕೈತಲ್ ಅಡ್ಡಾಡುನ ನಾಯಿಲೆಗ್ ಆಹಾರೊ ಕೊರ್ರೆ‌ ಸುರು ಮಂತೆರ್ ಬೊಕ್ಕ ಬೀದಿ ಬೀದಿದ ನಾಯಿಲೆಗೂ ಲಾ ತಿಂಡಿ ಪಟ್ಟರೆ ತಿನಿಸು ಕೋರ್ರೆ ಸುರು ಮಂತೆರ್. ಇಂಚೆನೇ ದಿನಡ್ ದ್ ದಿನಕ್ ಆರ್ ಆಹಾರ ಕೊರ್ಪಿನ ಪ್ರಾಣಿಲುನ ಸಂಖ್ಯೆಲೋ, ಕಾರ್ಯಕ್ಷೇತ್ರಲುಲ ವೃದ್ಧಿಯಾವರೆ ಸುರು ಅಂಡ್. ಇಂಚ ಆಹಾರ ಕೊರ್ಪಿನಿ ಮಾತ್ರ ಅತ್ತವಂದೆ ,ಕಸೊದ ತೊಟ್ಟಿಡೋ, ರಸ್ತೆ ಬದಿಟ್ ಒಲ್ಪ ಪೂರಾ ತಿಕ್ಕುಂಡ್ ಅಲ್ಪ, ಅನಾಥವಾಯಿನ, ಅಪಘಾತಡು ಕೈ ಕಾರ್ ಕಳೆವೊಂದಿನ ಅಥವೋ ಒವ ಕಾರಣೊದ ಮೈ ಅಥವೋ ಅಂಗಾಂಗ ಊನ ಆತಿನ ಪ್ರಾಣಿಲೆನ್ ಇಲ್ಲಗ್ ಕಂತುದು, ಅಯಿಕುಲೆಗ್ ಮರ್ದು ಮಂತುದು ಸಾಕೊಂದು ಉಲ್ಲೆರ್. ದಿನ ನಿತ್ಯೊಲ ಅಯಿಕುಲೆಗ್ ಚಿಕಿತ್ಸೆ ಮಂತುದು ಚಾಕರಿ ಮನ್ಪರೆ ಸುರು ಮನ್ಪುವೆರ್. ಗಾಯ ಆತಿನ ಅಥವೋ ಅನಾಥ ನಾಯಿ ಪುಚ್ಚೆಲೆನ ಪಾಲನೆ ರಜನಿ ಶೆಟ್ಟಿ ಮನ್ಪುನ ಈ ಕೆಲಸ ಜನಕುಲೆಗ್ ಗೊತ್ತಾಯಿಲೆಕ್ಕನೇ‌ ಅಂಚಿನ ಅವು ಏತೋ ಪ್ರಾಣಿಲೆನ ರಕ್ಷಣೆಗ್ ಬೋಡಾದ್ ರಜನಿ ಶೆಟ್ಟಿ ಗ್ ಫೋನ್ ಕರೆಲು ಆಸುಪಾಸು ಡ್ದ್, ದೂರದೂರದ ಊರುಡ್ದು ಬರ್ರೆ ತೊಡಗುದುಂಡು. ದೂರವಾಣಿ ಕರೆಗ್ ಮೇರ್ ಏಪೋಲ ಸ್ಪಂದಿಸಾದ್ , ಆಯಾಯ ಪ್ರದೇಶಗಳಿಗ್ ಪೋದು ಅಸಹಾಯಕ ಸ್ಥಿತಿಟ್ ಉಪ್ಪುನ ಪ್ರಾಣಿಲೆನ್ ಕಂತುದು, ಅಯಿತ ಸೇವೆ ಮನ್ಪುನ ಮೆರೆಗ್ ರೂಢಿ ಆತುಂಡು. ಹೆಚ್ಚಾದ್ ನಾಯಿಲು ಆಂಡಾಲ, ಪುಚ್ಚೆಲು, ಉಚ್ಚುಲು, ಚನಿಲುಲು, ಎಮೆಲು ಒವ್ವೇ ಒಂಜಿ ಮೂಕ ಪ್ರಾಣಿ ಆವಾಡ್ ಅವೆನ್ ರಕ್ಷಿಸಾದು-ಕಂತು ಸಾಕುನು ಅರೆನ ದಿನನಿತ್ಯದೊ ಕಾಯಕ ಆದು ಪೋತುಂಡು.

ಅ೦ಗವಿಅಕಲ ಅನಾಥ ನಾಯಿ-ಪುಚ್ಛೆದ ಪಾಲನೆಡ್ ರಜನಿ ಶೆಟ್ಟಿ

ನಮ್ಮ tv- ಡ್ಯಾನ್ಸ್ ಮಮ್ಮಿ ಡ್ಯಾನ್ಸ್ -4

ಸುಮಾರು ಪತ್ತು ಪದಿನೈನ್ ವರ್ಷ ಅರೆನ ಸ್ವಂತ ಪಣವುನೇ ಪ್ರಾಣಿಲೆನ ಸೇವೆಗ್ ಉಪಯೋಗ ಮಂತೊಂದು ಇತ್ತೆರ್. ಮಾಧ್ಯಮೊಡು -ಪ್ರಚಾರೊಡು ಪೂರಾ ದೂರ ಇತ್ತೆರ್. 2019ಡ್ ಲೋಕಲ್ ಟಿವಿ ಚಾನೆಲ್ ಡ್ ಪ್ರಸಾರ ಆಯಿನ Namma tv- Dance Mummy Dance-4 ಡ್ ಭಾಗವಹಿಸಾದ್ , ನಾಲ್ ಐನ್ ಸುತ್ತುಲೆನ್ ದಾಟುದು Quarter Final ತನಕ ಬತ್ತು ಇತ್ತೆರ್. ಅದಾಗ ಆರ್ ಮಂತೊಂದು ಇತ್ತೀನ ಈ ಸೇವೆಲು ಪೂರಾ ಬೊಳ್ಪುಗು ಬತ್ತುಂದು , ಅವೇತೋ ದಾನಿಲು ಮೆರೆನ ಸೇವೆಗ್ ಸಹಕಾರ ಕೊರ್ರೆ ದುಂಬು ಮಂತೆರ್. ಆ ಸಮಯೊಡು ಮೇರ್ ಆಹಾರ ಕೊರೊಂದಿತಿನ ನಾಯಿಲೆನ ಸಂಖ್ಯೆ 500ದ ಅಂಚಿ ಇಂಚಿ ಇತ್ತುಂಡು.

ಕೊರೋನ ಲಾಕ್ ಡೌನ್

ಕೊರೋನ ಆರಂಭ ಆನಗ ಲಾಕ್ ಡೌನ್ ಸಮಯೊಡುಲ ಅರೆಗ್ ಲಾ ಅರೆನ ಕಂಡನಿಗ್ ಲಾ ತೊಂದರೆ ಆದು ಇತ್ತುಂಡು. ಜನಲೆನ ಓಡಾಟ ಕಡಿಮೆ ಉಪ್ಪುನಗ ಬೀದಿನಾಯಿಲೆಗ್ ಸಾಮಾನ್ಯವಾದ್ ತಿಕ್ಕುನ ಆಹಾರಲಾ ತಿಕ್ಕೊಂದು ಇತ್ತುಜಿ. ಅವೇತೋ ಜನತ ಸಹಕಾರನ್ ಯಾಚಿಸಿ, ಆ ಸಮಯೊಡುಲ ಆಹಾರ ಕೊರ್ತೆರ್. ವಾ ಸಮಯೊಡುಲ ಪ್ರಾಣಿಯಾವಾಡ್ ಸಂಕಷ್ಟ ಪರಿಸ್ಥಿತಿಟ್ ಇತ್ತುಂಡ ಸಹಾಯ ಮನ್ಪರೆ ಅಲ್ಪ ಬಲ್ಪುವೆರ್. ಒಂಜಿ ದಿನ ಕುಡ್ಲದ ದೇರೇಬೈಲ್ ಕೊಂಚಾಡಿದಲ್ಪ 30 ಅಡಿ ಆಳೊದ ಪರತ್ತ್ ಗುವ್ವೆಲ್ ಗ್ ಪುಚ್ಚೆ ಒಂಜಿ ಬುರುದು ದಿನ ಇಡೀ ಗುವ್ವೆಲ್ ದ ಉಲಯಿ, ಆಹಾರ ಉಪ್ಪಂದೆ ಏರ್ಡಲೋ ರಕ್ಷಣೆ ಮನ್ಪರೆ ಆವಂದೆ ಉಪ್ಪುನಗ ರಜನಿ ಶೆಟ್ಟಿನ್ ಸಂಪರ್ಕ ಮಂತೆರ್ . ಅದಗ ಸ್ಥಳೀಯರ್ನ ಸಹಕಾರೊಡು ಗುವ್ವೆಲ್ ಗ್ ಜತ್ತುದು ಪುಚ್ಚೆನ್ ರಕ್ಷಣೆ ಮಂತೆರ್.

ಅಂಚೆನೇ ಕುಡ್ಲದ ಬಿರುವೆರ್ ಕುಡ್ಲ ಮೈದಾನೊಡು ಆವರಣ ಉಪ್ಪಂದಿನ ಗುವ್ವೆಲ್ ಡ್ ನಾಯಿಯೊಂಜಿ ಬುರುದಿಪ್ಪುನಗ ಅವೆನ್ಲ ರಕ್ಷಣೆ ಮಂದಿನಾರ್ ರಜನಿ ಶೆಟ್ಟಿ.

ಅಂಚೆನೇ ಅವ್ವೆ ರೀತಿ ಏಪ್ರಿಲ್ ತಿಂಗಳುಡು ಕುಡ್ಲದ ಬಿಜೈದ ಕೈತಲ್ 50 ಅಡಿತ ಗುವ್ವೆಲ್ ಗ್ ನಾಯಿ ಒಂಜಿ ಬುರುದುಪ್ಪುನಗ ಮೆರೆಗ್ ದೂರವಾಣಿ ಕರೆ ಬತ್ತುಂಡು. ಅದಗನೇ ಕಂಡನಿ -ಮಗಳ್ ನೊಟ್ಟು ಅಲ್ಪ ಪೋದು ರಜನಿ ಸೊಂಟಕ್ ಬಲ್ಲ್ ಕಟ್ಟುದು ಗುವ್ವೆಲ್ ಗ್ ಜತ್ತುದು, ರಾತ್ರೆಯಿಡೀ ನೀರ್ ಡ್ ಈಜಿ ನಡುಗೊಂದು ಇತ್ತಿನ ನಾಯಿದ ಸೊಂಟಕ್ ಬಲ್ಲು ನ್ ಕಟ್ಟುದು ಮಿತ್ತು ದೆರ್ಪುನೆಟ್ ಯಶಸ್ವಿಯಾದ್ ಇತ್ತೆರ್ . ಅವೆತೋ ಪ್ರಾಣಿಲೆನ್ ಈ ರೀತಿ ರಕ್ಷಿಸಾದ್ ಈತ್ ಆಳೊದ ಗುವ್ವೆಲುಗ್ ಒಂಜಿ ಪ್ರಾಣಿಕ್ ಪುನರ್ಜನ್ಮ ಕೊರಿನ ಮಸ್ತ್ ಜನಕ್ ನೆಮ್ಮದಿನ್ ಕಂತು ಕೊರ್ತುಂಡು.

ಸಂಸಾರ ಜೀವನೊ

1997 ಟ್ ಮದಿಮೆ ಆದ್ ಬತ್ತಿ ಬೊಕ್ಕ ಕುಡ್ಲಡ್ ಬಾಡಿಗೆದ ಇಲ್ಲಡ್ ವಾಸ. ಕಂಡನಿ ಚಾಲಕ ವೃತ್ತಿ. ಮೂಜಿ ಜನ ಜೋಕುಳು. ಕಂಡನಿನ ಸಂಬಳನೇ ಜೀವನೊಕು ಆಧಾರ.ಒಂಜಿ ರಡ್ಡ್ ಇಲ್ಲಗ್ ತಾನೂ ಮನೆಕೆಲಸಕ್ ಪೋಪೆರ್. ಕೆಲವೊರ ಶ್ರೀಮಂತೆರ್ ನ ಇಲ್ಲದ ನಾಯಿಲೆನ್ ಮೀಪಾವುನ ಕೆಲಸ ಮನ್ಪುವೆರ್.

ಬಾಡಿಗೆದ ಇಲ್ಲಡ್ ಉಪ್ಪುನಕುಲು

ತನ್ನ ಬಾಡಿಗೆ ಡ್ ಉಪ್ಪುನ ಇಲ್ಲಡ್ 29 ನಾಯಿಲು, 15 ಪುಚ್ಚೆಲು, 4 ಹದ್ದುಲೆನ್ ಸಾಕೊಂದುಲ್ಲೆರ್. ಪೂರಾ ರಸ್ತೆ ಬದಿಟೋ, ಒಲ್ಪ ಒಲ್ಪ ಏರೇರೋ ಬುಡ್ದು ಪೋತಿನ , ಅನಾಥ ಆತಿನನೇ ಜಾಸ್ತಿಯಾದ್ ಉಲ್ಲ . ಹೆಚ್ಚಿನಕುಲು ವಿಕಲಾಂಗ ಪ್ರಾಣಿಲು. ಕಣ್ಣ್ ತೋಜಂದಿನ ನಾಯಿ- ಪುಚ್ಚೆಲು ಲಾ ಉಲ್ಲಾ, ಲಕುದು ನಡೆಪರೆ ಆವಂದಿನ ,ಪ್ರಾಯದೊ, ಗಾಯ ಆತಿನ ಅವೇತೋ ನಾಯಿಲು ಉಲ್ಲಾ. ನಾಯಿ ಲೆಗ್ ಮೀಪಾದ್, ಅಯಿಕುಲು ಜೆಪ್ಪುನ ಕುಂಟಕಲೆನ್ ದೆಕ್ಕುದು ಶುಚಿಟ್ ದೀಪೆರ್.ಕಾಲಕಾಲಕು ಔಷಧಿಲು- ವೈದ್ಯಕೀಯ ಚಿಕಿತ್ಸೆಲು ಪೂರಾ ಕೊರ್ಪಾವೆರ್. ತಾನು ಸಾಂಕುದಿನ ಪೂರಾ ನಾಯಿದ ಸಂತಾನಹರಣ ಶಸ್ತ್ರಚಿಕಿತ್ಸೆನ್ ಮನ್ಪದೇರ್. ರಾವರೆ ಆವಂದಿನ ಹದ್ದುಲೆನ್ ಆರೈಕೆ ಮಂದೆರ್. ಸ್ವಸಾಮರ್ಥ್ಯಡ್ ಪಾರುನಾಂಡಾ ಅವೆನ್ ಬುಡುದು ಬುಡ್ಪೇರ್. ಪಾರರೆ ಆಯಿಜಿಡ ಆರೇ ತಾಂಕುವೆರ್. ನಾಯಿಲು ಅಯಿಕುಲು ಅಯಿಕುಲೇ ಆವಾಡ್ ಅತ್ತ್ ನಾಯಿ ಪುಚ್ಚೆಲು ಆವಾಡ್ , ಲಡಾಯಿ ಮನ್ಪಂದೆ ಒಟ್ಟುಗು ಜೊತೆ ಜೊತೆಯಾದ್ ಜೀವಿಸುಂಡು.ಕುಡ್ಲದ ಬಲ್ಲಾಳ್ ಭಾಗ್ ದ ಕೈತಲ್, ತನ್ನ ಪುಟ್ಟ ಬಾಡಿಗೆದ ಇಲ್ಲಡ್ ತನ್ನ ಸಂಸಾರದೊ ಒಟ್ಟುಗು ಜೊತೆಗ್ ಇಲ್ಲದ ಉಲಯಿ ಇಪ್ಪುನ ನಾಯಿ-ಪುಚ್ಚೆಲೆನ್ ತನ್ನ ಸಂಸಾರದೊ ಲೆಕ್ಕನೇ ತೂವೊಂದು. ತನ್ನ ಕಂಡನಿ, ಬೊಕ್ಕ ಜೋಕುಲೆನ ಸಂಪೂರ್ಣ ಸಹಕಾರೊಡು ಶ್ರೀಮತಿ ರಜನಿ ಶೆಟ್ಟಿ ಖುಷಿಟ್ ಉಲ್ಲೆರ್.

ದಿನತೋ ಬೇತೆ ಕೆಲಸ

ಅರೆನ ಇಲ್ಲಡ್ ಅತ್ತಂದೆ , ಸುಮಾರು 5೦೦ ಬೀದಿನಾಯಿಲೆಗ್ ಪ್ರತಿ ನಿತ್ಯಲಾ ಆಹಾರ ಪಾಡುವೆರ್. ಕಾಂಡೆದ ಅರೆನ ಕಾರ್ಯೊನು ಮುಗಿಸಾದ್ ಪ್ರಾಣಿಲೆಗ್ ಆಹಾರೊದ ತಯಾರಿಡ್ ತೊಡಗುವೆರ್.

ಪ್ರಾಣಿಲೆಗ್ ಊಟದ ತಯಾರಿ

ದಿನ ನಿತ್ಯ ಗ್ ಐವ್ವ ಕಿಲೋ ಅರಿತ ನುಪ್ಪು‌ಮಂತುದು .ಅಯಿಕ್ ಮಾಂಸದಂಗಡಿ ಡ್ ಕಂತಿನ ಒರಿದಿನ ವೇಸ್ಟ್ ಮಾಂಸದ ತುಂಡುಲೆನ್ , ಸ್ವಲ್ಪ ಮಂಜಲ್ ಪುಡಿ ಬೊಕ್ಕ ಉಪ್ಪು ಪಾಡುದು ಮಲ್ಲ ಪಾತ್ರೆಡ್ ಬೇಯಿಪಾವೇರ್.ಕತ್ತಲಾಯಿ ಬೊಕ್ಕ ತನ್ನ ಕಂಡನಿ ಅಥವೋ ಮಗಳ್ ನ ಒಟ್ಟುಗು ಬೇತೆ ಬೇತೆ ಜಾಗೊಲೆಗ್ ಪೋದು. ನಾಯಿ ಲೆಗ್ ಆಹಾರ ಕೊರ್ರೆ ಶುರು ಮನ್ಪುವೆರ್. ಸ್ಟೇಟ್ ಬ್ಯಾಂಕ್, ಬಂದರು, ಡಿ.ಸಿ.ಆಫೀಸ್, ಬಿಜೈ, ಲಾಲ್ ಭಾಗ್,ಲೇಡಿಹಿಲ್, ಮಣ್ಣಗುಡ್ಡೆ, ಪಿ.ವಿ.ಎಸ್, ಚಿಲಿಂಬಿ ಇಂಚಾ ಅವೇತೋ ಕಡೆಟ್ ಆಹಾರ ಕೊರ್ದು ಪಿರಾ ಇಲ್ಲಗ್ ತಲುಪುನಗ ನಡುರಾತ್ರಿ ಗಂಟೆ ರಡ್ಡ್ ಆಪುಂಡು. ಬತ್ತಿ ಬೊಕ್ಕ ಇಲ್ಲದ ನಾಯಿಲೆನ ಉಪಚಾರ ಮಂತುದು ತನ್ನ ಕೆಲಸೊಲೆನ್ ಪೂರೈಸಾದ್ ಪಜೆ ಬುಡ್ಪಾದ್ ಜೆತ್ತೆರ್ಡ ಅರೆನ ಸುತ್ತೊಲ ಇಲ್ಲದ ನಾಯಿ ಪುಚ್ಚೆಲು ಲಾ ಜೆತ್ತುದು ನಿದ್ರೆ ಮನ್ಪುವ. ಉಂದು ಸುಮಾರು ಪದಿನೈನ್ ವರ್ಷೊಡುಲ ಜಾಸ್ತಿ ವರ್ಷೊಡು ಮನ್ಪುನ ಮೆರೆನ ಕಾಯಕ. ಕಾಂಡೆಲ ಕೆಲವು ಕಡೆ ಪೋದು ಒನಸ್ ಬಲಸುದು ಬರ್ಪೆರ್. ನಿದ್ರೆ ಮನ್ಪುನು ಮೂಜಿ ನಾಲ್ ಗಂಟೆ ಮಾತ್ರ ಆಂಡಾಲ ಪ್ರಾಣಿಲೆನ ಬಂಜಿ ತುಂಬಂದೆ ನೆಮ್ಮದಿದ ತೃಪ್ತಿದ ನಿದ್ರೆ ಬರುಪುಜಿ ಪಂದ್ ಪನ್ಪೆರ್. ಉಪ್ಪುನು ಕಿನ್ಯ ಬಾಡಿಗೆದ ಇಲ್ಲಡ್, ಆರ್ಥಿಕ ಪರಿಸ್ಥಿತಿ ಆತೇಕ್ ಆತೆ. ಆಂಡಾಲ ಬೀದಿನಾಯಿಲೆನ ಬೊಕ್ಕ ಇಲ್ಲದ ನಾಯಿ-ಪುಚ್ಚೆ ಒವ್ವೆ ಪ್ರಾಣಿ ಆವಾಡ್ ಬಂಜಿಗ್ ಕಡಿಮೆ ಆವಂದಿಲೆಕ್ಕ ಕಷ್ಟೊಡು ಆಹಾರ ಹೊಂದಿಸಾವೆರ್. ದಾನಿಲು ,ಪ್ರಾಣಿಪ್ರಿಯೆರ್, ಕೆಲವೊಂಜಿ ಸಂಘ-ಸಂಸ್ಥೆಲು ಪಣವು ಅಥವೋ ಅರಿನ್ ಕೊರ್ದು ಸಹಕರಿಸಾಂಡಲ ಒರೊರ ದಾಲಾ ತಿಕ್ಕಂದಿಲೆಕ್ಕದ ಪರಿಸ್ಥಿತಿಲಾ ಎದುರಿಸೊಡಾಪುಂಡು. ಲಾಕ್ ಡೌನ್ ದ ಸಮಯೊಡು ಪ್ರಾಣಿಲೆಗ್ ಆಹಾರ ಕೊರ್ರೆ ಪರದಾಡುದೆರ್.

ಕನಸ್

ಅರೆನ ಈ ಪ್ರಾಣಿ ಪ್ರೇಮ- ರಕ್ಷಣೆ- ಸೇವೆನ್ ಗುರುತಿಸಾದ್, *ಲಯನ್ಸ್ ಕ್ಲಬ್- ರೋಟರಿ ಕ್ಲಬ್,ಕುಡ್ಲ

• ಬಂಟರ ಸಂಘ ಜೆಪ್ಪು,ಕುಡ್ಲ
• ಫ್ರೆಂಡ್ಸ್ ಮೊಗವೀರ, ಕುಡ್ಲ

ಅಂಚೆನೆ ಅವೇತೊ ಸಂಸ್ಥೆಲು ಅರೆನ್ ಸನ್ಮಾನ ಮಂದುಂಡು.

ಅಭಿಲಾಷೆ

ಸರಕಾರೊಡ್ದ್ ದಾದಾಂಡಲ ಸಹಾಯೊಡು ಮಿನಿ ಚೂರಾಂಡಲ ಜಾಗ ತಿಕ್ಕುಂಡ , ನಾಯಿ ಲೆಗ್ ಆಶ್ರಯತಾಣ ನಿರ್ಮಾಣ ಮಂತುದು ,ಅಯಿಕುಲೆಗ್ ವೈದ್ಯಕೀಯ ವ್ಯವಸ್ಥೆನ್ ಕಲ್ಪಿಸಿ ಕೊರ್ಪಿನ ಇಚ್ಛೆ ರಜನಿ ಶೆಟ್ಟಿ ನ.