ರಾಮದಾಸ್ ಪಾಣೆಮಂಗಳೂರು ಶೆಣೈ

ರಾಮದಾಸ್ ಪಾಣೆಮಂಗಳೂರು ಶೆಣೈ
Cause of death	ವಯೋಸಹಜ ಅನಾರೋಗ್ಯ
ದೇಶ	ಭಾರತೀಯ
ವಿದ್ಯಾಭ್ಯಾಸ	ಭೌತಶಾಸ್ತ್ರೊಡು ಬಿಎಸ್‍ಸಿ ಬೊಕ್ಕ ಎಮ್‍ಎಸ್‍ಸಿ, ಎಲೆಕ್ಟ್ರಿಕಲ್ ಕಮ್ಯುನಿಕೇಶನ್ ಇಂಜಿನಿಯರಿಂಗ್‍‌‍ಡ್ ಪಿಜಿ ಡಿಪ್ಲೋಮಾ, ಇಲೆಕ್ಟ್ರಿಕಲ್ ಇಂಜಿನಿಯರಿಂಗ್‌‍ಡ್ ಪಿಎಚ್‍.ಡಿ.
Alma mater	ಕೆನರಾ ಹೈಸ್ಕೂಲ್ ಮಂಗಳೂರು, ಪ್ರೆಸಿಡೆನ್ಸಿ ಕಾಲೇಜ್ ಮದ್ರಾಸ್, ಬನಾರಸ್ ಹಿಂದೂ ವಿಶ್ವವಿದ್ಯಾಲಯ ಬನಾರಸ್, ವಿಸ್ಕಾನ್ಸಿನ್ ವಿಶವಿದ್ಯಾಲಯ, ಅಮೇರಿಕ
ವೃತ್ತಿ	ರಕ್ಷಣಾ ವಿಜ್ಞಾನಿ
Years active	೧೯೬೦ಡ್ದ್ ೧೯೮೭ ಮುಟ್ಟ
Employer	ರಕ್ಷಣಾ ಸಂಸೋಧನೆ ಬೊಕ್ಕ ಅಭಿವೃದ್ಧಿ ವಿಭಾಗ
Known for	ರಾಡಾರ್ ತಂತ್ರಜ್ಞಾನೊ
Spouse	ಅಮಿತಾ ಆರ್ ಶೆಣೈ
Parent(s)	ಅಮ್ಮೆರ್ ಮಂಗಳೂರು ನರಸಿಂಹ ಶೆಣೈ, ಅಪ್ಪೆ ಪಿ ಸಂಜೀವಿ ಶೆಣೈ
ಪ್ರಶಸ್ತಿ	ಪದ್ಮಶ್ರೀ ಪ್ರಶಸ್ತಿ(೧೯೮೬) ಆರ್ಯಭಟ ಪ್ರಶಸ್ತಿ (೨೦೦೦)

ರಾಮದಾಸ್ ಪಾಣೆಮಂಗಳೂರು ಶೆಣೈ(೨೮.೦೪.೧೯೨೯ - ೧೬.೦೮.೨೦೧೨) ಇಂಬೆರ್ ರಾಡಾರ್ ಕ್ಷೇತ್ರೊಡು ಸಂಶೋಧನೆ ಮಲ್ತ್‍ದ್, ಭಾರತೀಯ ರಾಡಾರ್ ಕ್ಷೇತ್ರದ ಪಿತಾಮಹ ಪಂದ್ ಪುದರ್ ಪಡೆಯಿನ, ಕುಡ್ಲದ ವಿಜ್ಞಾನಿ.

ಪುಟ್ಟು ಬೊಕ್ಕ ವಿದ್ಯಾಭ್ಯಾಸ

ರಾಮದಾಸ್ ಪಿ ಶೆಣೈ ಪುಟ್ಟುದಿನಿ ಕುಡ್ಲದ ಕೈತಲ್‍ದ ಪಾಣೆಮಂಗಳೂರುಡು. . ಅಮ್ಮೆರ್ ಮಂಗಳೂರು ನರಸಿಂಹ ಶೆಣೈ, ಅಪ್ಪೆ ಪಿ ಸಂಜೀವಿ ಶೆಣೈ

ರಾಮದಾಸೆರ್ ಆರೆನ ಪ್ರಾಥಮಿಕ ಬೊಕ್ಕ ಹೈಸ್ಕೂಲ್ ವಿದ್ಯಾಭ್ಯಾಸೊನು ಕೆನರಾ ಹೈಸ್ಕೂಲ್ ಕುಡ್ಲಡ್ ಮಲ್ತೆರ್. ಭೌತಶಾಸ್ತ್ರೊಡು ಬಿಎಸ್‍ಸಿ ಪದವಿ ಕಲ್ಪರೆ ಪ್ಂಡ್ದ್ ಮದ್ರಾಸ್‍ದ ಪ್ರೆಸಿಡೆನ್ಸಿ ಕಾಲೇಜ್‍ಗ್ ಸೇರಿಯೆರ್. ಬಿಎಸ್ಸಿ ಮುಗಿತ್‍ದ್ ಅವ್ವೇ ವಿಷಯೊಡು ಎಮ್‍ಎಸ್ಸಿ ಕಲ್ಪರೆಗಾತ್ರ ಬನಾರಸ್ ಹಿಂದೂ ವಿಶ್ವವಿದ್ಯಾನಿಲಯಗ್ ಸೇರ್ಪಡೆ ಆಯೆರ್. ಔಲು ಆರೆನ ಕಲ್ಪಟಿಗೆ ಮುಗಿತ್‍ದ್ ರಾಮದಾಸೆರ್, ಎಲೆಕ್ಟ್ರಿಕಲ್ ಕಮ್ಯುನಿಕೇಶನ್ ಇಂಜಿನಿಯರಿಂಗ್ ವಿಷಯೋಡು ಪಿಜಿ ಡಿಪ್ಲೋಮಾ ಕಲ್ಪರೆಗಾದ್ ಬೆಂಗಳೂರುದ ಭಾರತೀಯ ವಿಜ್ಞಾನ ಮಂದಿರಗ್ ಸೇರಿಯೆರ್.

ಸ್ವದೇಸೊಡು ವಿದ್ಯಾಭ್ಯಾಸ ಮುಗಿತ್ತಿನ ರಾಮದಾಸೆರ್ ಎಲೆಕ್ಟ್ರಿಕಲ್ ಕಮ್ಯುನಿಕೇಶನ್ ಇಂಜಿನಿಯರಿಂಗ್ ವಿಷಯೋಡೆ ಪಿಎಚ್‍ಡಿ ಮಲ್ಪರೆಗಾತ್ರ ಅಮೇರಿಕಾಡ್ ಇಪ್ಪುನ ವಿಸ್ಕಾನ್ಸಿನ್ ವಿಶ್ವವಿದ್ಯಾನಿಲಯಗ್ ಸೇರಿಯೆರ್.

ಬೇಲೆ

೧೯೫೭ಡು ಪಿಎಚ್‍ಡಿ ಕಲ್ಪಟಿಗೆನ್ ಮುಗಿತ್‍ದ್ ರಾಮದಾಸೆರ್ ಅಮೇರಿಕಾಡ್ ರೇಡಿಯೋ ಕಾರ್ಪೋರೇಶನ್ ಆಫ್ ಅಮೇರಿಕಾ ಕಂಪನಿದ ಟಿವಿ ವಿಭಾಗೊಡು ಬೇಲೆಗ್ ಸೇರಿಯೆರ್ ಮುಲ್ಪ ೩ ವರ್ಸೊ ಬೇಲೆ ಮಲ್ತ್‌ದ್ ೧೯೬೦ಡ್ ಭಾರತಗ್ ಪಿರ ಬತ್ತೆರ್.

೧೯೬೦ಡ್ದು ೧೯೮೭ ಮುಟ್ಟ ರಕ್ಷಣಾ ಸಂಸೋಧನೆ ಬೊಕ್ಕ ಅಭಿವೃದ್ಧಿ ಸಂಸ್ಥೆದ ಬೇತೆ ಬೇತೆ ವಿಭಾಗೋಡು ಬೇಲೆ ಮಲ್ಪುನ ಮೂಲಕ, ತನ್ನ ಬುದ್ದಿವಂತಿಕೆ, ಸಾಮರ್ಥ್ಯೊನು ತಾನ್ ಪುಟ್ಟಿನ ದೇಸೊದ ಸೇವೆ ಮಲ್ಪರೆಗಾತ್ರ ಉಪಯೋಗಿಸಾಯೆರ್. ಐಟ್ ಕೆಲವೊಂಜಿ ಮಾಹಿತಿ ಇಂಚ ಉಂಡು.

• ೧೯೬೦ಡ್ದು ೧೯೬೭ ಮುಟ್ಟ ವಿಜ್ಞಾನಿ ಆದ್- ಎಲೆಕ್ಟ್ರಾನಿಕ್ಸ್ ಮತ್ತು ರಾಡಾರ್ ಅಭಿವೃದ್ದಿ ವಿಭಾಗೊಡು (ಬೆಂಗಳೂರು)
• ೧೯೬೭ಡ್ದು ೧೯೭೧ ಮುಟ್ಟ ಉಪ ನಿರ್ದೇಶಕೆರಾದ್- ರಕ್ಷಣಾ ಸಂಶೋಧನೆ ಬೊಕ್ಕ ಅಭಿವೃದ್ಧಿ ಪ್ರಯೋಗಾಲಯಡ್ (ಹೈದರಾಬಾದ್)
• ೧೯೭೧ಡ್ದ್ ೧೯೭೩ ಮುಟ್ಟ ಮುಖ್ಯ ತಾಂತ್ರಿಕ ಅಧಿಕಾರಿಯಾದ್- ಭಾರತ್ ಎಲೆಕ್ಟ್ರಾನಿಕ್ಸ್ ಲಿಮಿಟೆಡ್ (ಘಾಝಿಯಾಬಾದ್, ಉತ್ತರಪ್ರದೇಶ)
• ೧೯೭೩ಡ್ದ್ ೧೯೮೭ಮುಟ್ಟ ನಿರ್ದೇಶಕೆರಾದ್- ಎಲೆಕ್ಟ್ರಾನಿಕ್ಸ್ ಬೊಕ್ಕ ರಾಡಾರ್ ಅಭಿವೃದ್ಧಿ ವಿಭಾಗೊಡು.

ಬೇತೆ ಸಂಸ್ಥೆಲೆಡ್

ರಾಮದಾಸ್ ಪಿ ಶೆಣೈಯೆರ್ ರಕ್ಷಣಾ ಸಂಸೋಧನೆ ಬೊಕ್ಕ ಅಭಿವೃದ್ಧಿ ಸಂಸ್ಥೆದ ಬೇತೆ ಬೇತೆ ವಿಭಾಗೊಲು ಅತ್ತಂದೆ, ರಕ್ಷಣಾ ಕ್ಷೇತ್ರೊಡು ಇಪ್ಪುನ ಬೇತೆ ಬೇತೆ ಖಾಸಗಿ ಸಂಸ್ಥೆಲೆಡ್‍ಲಾ ಬೇಲೆ ಮಲ್ತ್‍ದೆರ್. ಐತ ಪಟ್ಟಿ ತಿರ್ತ್ ಉಂಡು.

ಸಂಸ್ಥೆ	ಪದನಾಮ	ಸಮಯ
ನಾಲ್ಟೆಕ್ ಪ್ರೈವೇಟ್ ಲಿಮಿಟೆಡ್, ಬೆಂಗಳೂರು	ನಿರ್ದೇಶಕೆ	೧೯೯೩ಡ್ದ್ ೨೦೦೬ ಮುಟ್ಟ
ಎ ಎಸ್ ಎಮ್ ಟೆಕ್ನಾಲಜೀಸ್ ಲಿಮಿಟೆಡ್, ಬೆಂಗಳೂರು	ನಿರ್ದೇಶಕೆ	೧೯೯೩ಡ್ದ್ ೨೦೦೨ ಮುಟ್ಟ
ಅಸ್ತ್ರ ಮೈಕ್ರೋವೇವ್ ಪ್ರಾಡಕ್ಟ್ಸ್ ಲಿಮಿಟೆಡ್, ಹೈದರಾಬಾದ್	ಅಧ್ಯಕ್ಷೆ	೧೯೯೫ಡ್ದ್ ೨೦೦೯ ಮುಟ್ಟ

ಉಂದು ಅತ್ತಂದೆ, ಸಾರ್ವಜನಿಕ ಕ್ಷೇತ್ರೊದ ಮುಖ್ಯ ಸಂಸ್ಥೆಲಾಯಿನ ಭಾರತ್ ಎಲೆಕ್ಟ್ರಾನಿಕ್ಸ ಲಿಮಿಟೆಡ್, ಕಿಯೋನಿಕ್ಸ್, ಎಲೆಕ್ಟ್ರಾನಿಕ್ಸ್ ಕಾರ್ಪೋರೇಶನ್ ಆಫ್ ತಮಿಳುನಾಡು ಮುಲ್ಪದ ನಿರ್ದೇಶಕೆರೆನ ಮಂಡಳಿಲೆಡ್ ಸೇರ್‌ದ್ ಈ ಕಂಪೆನಿಲೆನ ಅಬಿವೃದ್ಧಿಗ್ ಮಸ್ತ್ ಕೊಡುಗೆ ಸಂದಾದೆರ್. ನನ, ಭಾರತೀಯ ವಿಜ್ಞಾನ ಮಂದಿರ ಬೊಕ್ಕ ಜವಹರಲಾಲ್ ನೆಹರೂ ಸೆಂಟರ್ ಫಾರ್ ಅಡ್ವಾನ್ಸ್ಡ್ ಸೈಂಟಿಫಿಕ್ ರೀಸರ್ಚ್ ಮೂಲು ವಿಸಿಟಿಂಗ್ ಪ್ರೊಫ಼ೆಸರ್ ಆದ್‍ಲಾ ಸೇವೆ ಸಂದಾದೆರ್.

ಬರೆತಿನ ಬೂಕುಲು

ಶೆಣೈಯೆರ್ ತಾನ್ ಬೇಲೆಡ್ ಉಪ್ಪುನಗ ಪಡೆಯಿನ ಅನುಭವದ ಆಧಾರೊಡು ರಾಡಾರ್ ಕ್ಷೇತ್ರೊಗು ಉಪಯೋಗ ಆವಡ್ ಪಂಡ್‍ದ್ ಮೂಜಿ ಬೂಕುಲೆನ್ ಬರೆದೆರ್. ಅವು:

• ಅಡ್ವಾನ್ಸ್ಡ್ ರಾಡಾರ್ ಟೆಕ್ನಿಕ್ಸ್ ಅಂಡ್ ಸಿಸ್ಟಮ್ಸ್
• ಐಇಟಿಇ: ದ ಫಸ್ಟ್ ಫೋರ್ ಡಿಕೇಡ್ಸ್
• ಡಿಫೆನ್ಸ್ ರೀಸರ್ಚ್ ಅಂಡ್ ಡೆವಲಪ್ಮೆಂಟ್ ಆರ್ಗನೈಸೇಶನ್ (೧೯೫೮-೧೯೮೨)

ಮಾನಾದಿಗೆಲು

ರಕ್ಷಣಾ ಕ್ಷೇತ್ರೊಡು, ಐಟ್‌ಲಾ ರಾಡಾರ್ ವಿಭಾಗೊಡು ರಾಮದಾಸೆರ್ ಮಲ್ತಿನಾತ್ ಸಂಶೋಧನೆ, ಬೊಕ್ಕ ಆ ಕ್ಷೇತ್ರೊದ ಅಭಿವೃದ್ಧಿಗಾದ್ ಆರ್ ಸಂದಾಯಿನಾತ್ ಸೇವೆ ಬೇತೆ ಏರ್‌ಲ ಮಲ್ತ್‌ದ್ ಇಪ್ಪರೆ ಇಜ್ಜಿ ಪಣೊಲಿ. ಅಂಚಾದೇ ಸುಮಾರ್ ಪ್ರಶಸ್ತಿ ಪುರಸ್ಕಾರೊಲು ರಾಮದಾಸೆರೆಗ್ ಸಂದ್‍ದ್ಂಡ್. ಐಟ್ ಕೆಲವೊಂಜಿ:

• ೧೯೮೬ಡ್ ಸಿಕ್ಕಿನ ಪದ್ಮಶ್ರೀ ಪ್ರಶಸ್ತಿ
• ಎಲೆಕ್ಟ್ರಿಕ್ ಬೊಕ್ಕ ಎಲೆಕ್ಟ್ರಾನಿಕ್ ಸೈನ್ಸ್ ಬೊಕ್ಕ ಟೆಕ್ನಾಲಜಿ ಕ್ಷೇತ್ರೊಡು ಮಲ್ತಿನ ಬೇಲೆಗಾದ್, ವಿವಿಧಲಕ್ಶ್ಮಿ ಔದ್ಯೋಗಿಕ ಸಂಶೋಧನಾ ವಿಕಾಸ ಕೇಂದ್ರೊ ಕೊರ್ತಿನ ವಾಸ್ವಿಕ್(VASVIK) ಸಂಶೋಧನಾ ಪುರಸ್ಕಾರ (೧೯೮೩ನೇ ಇಸವಿಡ್)
• ಭಾರತದ ರಾಡಾರ್ ಕ್ಷೇತ್ರೊಡು ಮಲ್ತಿನ ಸಾಧನೆಗಾದ್ ಇನ್ಸ್ಟಿಟ್ಯೂಟ್ ಆಫ್ ಎಲೆಕ್ಟ್ರಾನಿಕ್ಸ್ ಬೊಕ್ಕ ಟೆಲಿಕಮ್ಯೂನಿಕೇಶನ್ ಇಂಜಿನಿಯರ್ಸ್ (IETE) ಕೊಡಮಾಡಿದ IETE-IRSI ಪುರಸ್ಕಾರ (೧೯೮೫ನೇ ಇಸವಿಡ್)
• ಆರ್ಯಭಟ ಪ್ರಶಸ್ತಿ (೨೦೦೦ನೇ ಇಸವಿಡ್)
• ಬೆಂಗಳೂರುದ ಭಾರತೀಯ ವಿಜ್ಞಾನ ಮಂದಿರದ ಪರವಾದ್ ಕೊರ್ತಿನ ವಿಶೇಷ ಪರ ವಿದ್ಯಾರ್ಥಿ ಪುರಸ್ಕಾರ (೨೦೦೦ನೇ ಇಸವಿಡ್)
• ರಕ್ಷಣಾ ಸಂಸೋಧನೆ ಬೊಕ್ಕ ಅಭಿವೃದ್ಧಿ ಸಂಸ್ಥೆದಕುಲು ಕೊರ್ತಿನ ಜೀವಮಾನದ ಸಾಧನೆ ಪುರಸ್ಕಾರ (೨೦೦೧ನೇ ಇಸವಿಡ್)

ತೀರಿನಿ

ರಕ್ಷಣಾ ಕ್ಷೇತ್ರೊಡು, ಐಟ್‌ಲಾ ರಾಡಾರ್ ವಿಭಾಗೊಡು ಈತ್ ಮಾತಾ ಸಂಶೋಧನೆ, ಬೊಕ್ಕ ಆ ಕ್ಷೇತ್ರೊದ ಅಭಿವೃದ್ಧಿಗಾದ್ ಬೋಡಾದ್ ಮಸ್ತ್ ಸೇವೆ ಮಲ್ತಿನ ರಾಮದಾಸ ಪಾಣೆಮಂಗಳೂರು ಶೆಣೈಯೆರ್ ಅಗೋಸ್ತು ೧೬ನೇ ತಾರೀಕ್ ೨೦೧೨ನೇ ಇಸವಿಡ್ ಬೆಂಗಳೂರುಡು ತೀರಿಯೆರ್. ಅಪಗ ಆರೆಗ್ ೮೩ ವರ್ಷ ಪ್ರಾಯ ಆದಿತ್ತ್ಂಡ್.

ಉಂದೆನ್‍ಲಾ ತೂಲೆ

ರಾಡಾರ್ ಬಗ್ಗೆ ನಿಕುಲೆಗ್ ನನಲಾ ಹೆಚ್ಚಿಗೆ ತೆರಿಯೋನೊಡಾಂಡ ಮೂಲೊಂಜಿ ಬರವು ಉಂಡು. ಉಂದೆನ್ ತೂವೊಲಿ, ಉಂದು ಕನ್ನಡೊಡು ಉಂಡು.ರೇಡಾರ್