ಸತ್ಯಭಾಮ

೧೨-೧೩ ನೇ ಶತಮಾನೊದ ಸತ್ಯಭಾಮೆನ ವಿಗ್ರಹ

ಸತ್ಯಭಾಮ ಕೃಷ್ಣ ದೇವೆರೆನ ಬೊಡೆದಿ. ಸತ್ಯಭಾಮೆ ಭೂದೇವಿನ ಅವತಾರ ಪಂಡ್ದ್‌ಲಾ ಪುರಾಣೊಡು ಪನ್ಪೆರ್. ಸತ್ಯಭಾಮೆ ಯಾದವ ದೊರೆ ಸತ್ರಜಿತನ ಮಗಲ್. ಸತ್ಯಭಾಮೆಗ್ ಕೃಷ್ಣನೊಟ್ಟುಗು ಭಾನು, ಸ್ವಭಾನು, ಸುಭಾನು, ಭಾನುಮಾನ್, ಫ್ರಭಾನು, ಅತಿಭಾನು, ಪ್ರತಿಭಾನು, ಶ್ರಿಭಾನು, ಬೃಹದ್ಭಾನು ಬುಕ್ಕೊ ಚಂದ್ರಭಾನು ಪನ್ಪಿನ ಜೋಕುಲು ಇತ್ತೆರ್.

ಸತ್ಯಭಾಮೆನ ಮದ್ಮೆದ ಚಿತ್ರ

ನರಕಾಸುರ ವದೆಟ್ ಕೃಷ್ಣನೊಟ್ಟುಗು ಯುದ್ದ ಬೂಮಿಡ್

ನರಕಾಸುರ ವಧೆಟ್ ಸತ್ಯಭಾಮೆನ ಪಾತ್ರ

ಕೆಲವು ಪುರಾಣೊದ ಪ್ರಕಾರ ನರಕಾಸುರನ ವದೆ ಸತ್ಯಭಾಮೆನ ಕೈಯ್ಡ್ ಆಯಿನವು. ಬ್ರಹ್ಮನ ವರ ತಿಕ್ಕ್‌ನ ನರಕಾಸುರೆ, ಸ್ವರ್ಗಲೋಕೊದ ಮಿತ್ತ್ ಆಕ್ರಮಣ ಮಲ್ತ್‌ದ್, ಇಂದ್ರನ್ ಸೋಪಾವೆ. ಬುಕ್ಕೊ 16,000 ಪೊಂಜೊವುಲೆನೆ ಆಯನ ಅರಮನೆಡ್ ಬಂದಿ ಮಲ್ಪುವೆ. ಇಂದ್ರನ ವಿನಂತಿಗಾತ್ರ ಶ್ರೀ ಕೃಷ್ಣ ದೇವೆರ್, ಸತ್ಯಭಾಮೆನೊಟ್ಟುಗ್ ನರಕಾಸುರನ್ ಕೆರಿಯರೆ ಪೋಪೆರ್. ಯುದ್ಧೊಡು ನರಕಾಸುರೆ, ಕೃಷ್ಣ ದೇವೆರೆನ ಮಿತ್ತ್ ಶಕ್ತಿ ಪ್ರಯೋಗ ಮಲ್ತ್‌ದ್, ಒಂತೆ ಪೊರ್ತು ಮತಿ ತಪ್ಪುಲೆಕ್ಕ ಮಲ್ಪುವೆ. ಆ ಪೊರ್ತುಡ್ ಬಾಣ ಪ್ರಯೋಗo ಮಲ್ತ್‌ದ್ ಸತ್ಯಭಾಮೆ ನರಕಾಸುರನ್ ಕೆರ್ಪಲ್ ಪನ್ಪುನ ಉಲ್ಲೇಕೊ ಉಂಡು.

ತುಲಾಭಾರದ ಕತೆ

ನಾರದ ಮುನಿನ ಪಾತೆರ ಕೇನ್‌ನ ಸತ್ಯಭಾಮೆ, ತನ್ನ ಮಿತ್ತ್‌ದ ಕೃಷ್ಣನ ಪ್ರೀತಿನ್ ಸಾಬೀತ್ ಮಲ್ಪರೆ, ತುಲಾಭಾರ ಮಲ್ಪುನ ಮನಸ್ ಮಲ್ಪುವೊಲು. ಏತೇ ಬಂಗಾರ್ ಪದ್ದೆಯಿ ಪಾಂಡಲಾ ಕೃಷ್ಣನ ದಿನ್ನೊಗು ಸಮ ಬರಂದೆ ಇಪ್ಪುನಗ, ರುಕ್ಮಣಿ ಕಂತ್ ಪಾದಿನಿ ಒಂಜಿ ತುಳಸಿ ದಳೊಡ್ ಕೃಷ್ಣೆ ಕುಲ್ಲುದಿನ ಬರಿ ಮಿತ್ತ್ ಬತ್ತಿನ ಕತೆ ಅಸ್ಸಾಂದ ಜನಪದೊಟು ಬರ್ಪುಂಡು.

ದ್ರೌಪದಿನೊಟ್ಟುಗು ಸ್ನೇಹೊ

ಮಹಾಭಾರತದ ವನ ಪರ್ವೊಡು, ದ್ರೌಪದಿ ಬುಕ್ಕೊ ಸತ್ಯಭಾಮೆನ ಸ್ನೇಹ ತೂವರೆ ತಿಕ್ಕುಂಡು. ಕೃಷ್ಣೆ ಬುಕ್ಕೊ ಸತ್ಯಭಾಮೆ, ಕಮ್ಯಾಕ ಪನ್ಪಿನ ಕಾಡ್‌ಗ್ ಪಾಂಡವೆರೆನ್ ತೂವರೆ ಪೋಪೆರ್. ಅವ್ಲು ಸತ್ಯಭಾಮೆ, ದ್ರೌಪತಿಡ ಸ್ರ್ತೀದರ್ಮೊದ ಬಗೆಟ್ ಮಸ್ತ್ ಪ್ರಶ್ನೆಲೆನ್ ಕೇನುವಲ್. ದ್ರೌಪದಿ ಆಲೆನ ಅನುಭವದ ಮಿತ್ತ್ ಮಸ್ತ್ ಗುಟ್ಟುಲೆನ್ ಪನ್ಪೊಲು. ಅಕುಲು ಅವ್ಲು ಕುಟುಮ್ಮೊ, ಸಮ್ಮಂದೊ, ಗೌರವ ಬುಕ್ಕೊ ಕೆಲಸದ ಬಗೆಟ್ ಪಾತೆರ್‌ನ ಉಲ್ಲೇಕೊ ತಿಕ್ಕುಂಡು.

ಕಡೆತ ದಿನೊಕುಲು

ಕೃಷ್ಣ ದೇವೆರೆನ ಕೆಲವು ಪ್ರೀತಿದ ಬೊಡೆದಿಯರೆನೊಟ್ಟುಗು ಕಾಡ್ ಗ್ ಪೋಪಿನ ಸತ್ಯಭಾಮೆ, ಅವ್ಲು ಪಂರ್ದ್, ಗೆಡ್ಡೆಲೆನ್ ತಿನೊಂದು ಹರಿನ ಧ್ಯಾನ ಮಲ್ಪುವೆರ್. ಹಿಮಾವತ್ ದ ಅಂಚಿದ ಕಲ್ಪ ಪನ್ಪಿನ ಜಾಗೊಟು ಸ್ವರ್ಗಸ್ಥರಾಪೆರ್.