ಗಾಂಧಿ ಜಯಂತಿ

ಗಾಂಧಿ ಜಯಂತಿ
ಆಚರಣೆ	India
ಬಗೆ	National
ಮಹತ್ವೊ	Honours Mahatma Gandhi's role in Indian Independence.
ಆಚರಣೆಲು	Community, historical celebration
ತಾರೀಕ್	2 October
ಆವರ್ತನೊ	Annual
ಸಮ್ಮಂದಿಸಯಿನ	International Day of Non-Violence Republic Day Independence Day

ಗಾಂಧಿ ಜಯಂತಿ – ಮಹಾತ್ಮ ಗಾಂಧಿಯೆರೆ ಜನ್ಮೊ ದಿನಾಚರಣೆ. ಉಂದು ರಾಷ್ಟೀಯ ಪರ್ಬ, ಪ್ರತಿ ಒರ್ಸೊ ಅಕ್ಟೋಬರ್ ೦೨ ದಾನಿ ಗಾಂಧಿ ಜಯಂತಿ ಆಚರಿಸವುನೆ. ಭಾರತೊದ ಸ್ವಸಂತ್ರೊ ಹೋರಾಟಗಾರೆರೆಡ್ ಒರಿಯಾಯಿನ ಲಾಲ್ ಬಹದ್ದೂರ್ ಶಾಸ್ತ್ರಿಯೆರೆನ ಜನ್ಮೊ ದಿನಾಚರಣೆನ್‍ಲಾ ಇಂದುವೇ ದಿನೊ ಆಚರಿಸವುನೆ.

ಮಹಾತ್ಮ ಗಾಂಧೀಜಿ ೧೮೮೬

ಗಾಂಧಿ ಜಯಂತಿದ ಇಸೇಸೊ

ಕರಮಚಂದ ಗಾಂಧಿ

• ಅಕ್ಟೋಬರ್ 2 ನಮೊನ ದೇಸೊ ಇಡೀಕ ಆಚರಿಸುನ ರಾಷ್ಟ್ರೀಯೊ ಪರ್ಬೊಗು ಕಾರಣೊ ಆನಿ ಗಾಂಧಿ ಜಯಂತಿ. ಮಾಂತ ಸಾಲೆಲೆಡ್, ಸರ್ಕಾರಿ ಕಚೇರಿಲೆಡ್ ಗಾಂಧಿಜಿಯೆರೆ ಪಟೊನು ದೀಡ್ದ್ ಪೂಜೆ ಮಲ್ಪುವೆರ್. ಸಾಲೆಲೆಡ್ ಬುಕ್ಕೊ ಕೋಲೇಜಿಲೆಡ್ ಆನಿ ಗಾಂಧಿಜಿಯೆರೆ ಬಗೆಟ್ ಬುಕ್ಕೊ ಆರೆನ ಸಾದನೆತ ಬಗೆಟ್ ಒಟ್ಟಾದ್ ಆರೆನ ಬದ್ಕ್‌ದ ಚರಿತ್ರೆನ್ ಜೋಕ್ಲೆಗ್ ಪನ್ಪೆರ್. ಅಯಿತ ಜೊತೆಟ್ ಆನಿ ಇಸೇಸೊ ಆದ್ ಸ್ವಚ್ಚ ಮಲ್ಪುನ ಬೇಲೆನ್ ದೀಡೊಂದು ಪ್ರತೀ ಗ್ರಾಮೊಲೆಡ್ ಸ್ರಮದಾನೊ ಮಲ್ಪುವೆರ್.
• ಸಾಲೆದ ಜೋಕುಲು ಪುಲ್ಯಕಾಂಡೆ ಮೀದ್, ರಾಷ್ಟ್ರಪಿತೆರೆಗ್ ಅಡ್ಡ ಬೂರ್‌ದ್ ಆರೆನ ತತ್ವೊಲೆನ್ ಜೀವನೊಡು ಅಲವಡಿಸಯರ ತಯಾರಾದ್ ಸಾಲೆಗ್ ಬರ್ಪೆರ್. ಇಂಚಿತ್ತಿ ಮಲ್ಲ ನರಮ್ಮಾನಿನ ಜನ್ಮೊ ದಿನೊ ಆಯಿನ ಅಕ್ಟೋಬರ್ ೨ ನಾನಿ ಇಡೀ ದೇಸೊಡು, ರಾಜ್ಯೊಡು, ಗ್ರಾಮೊ ಗ್ರಾಮೊಡುಲಾ ಕಲಿ ಗಂಗಸರೊನು ಪರಿಯರ ಬಲ್ಲಿ, ಮಾರಿಯರ ಬಲ್ಲಿ ಪನ್ಪನೆನ್ ಸರ್ಕಾರೊ ನಿಸೇದೊ ಮಲ್ತಿನವು ನಮೊಕು ಪೆರ್ಮೆದ ಸಂಗತಿ.

ಗಾಂಧಿಯೆರೆ ಪುಟ್ಟು ಬುಕ್ಕೊ ಬದ್‍ಕ್

ಪುತಲೀಬಾಯಿ

• ಇಂಬೆರೆ ಪೂರ್ತಿ ಪುದರ್ ಮೋಹನದಾಸ್ ಕರಮ‍ಚಂದ್ ಗಾಂಧಿ. ಇಂಬೆರ್ ಅಕ್ಟೋಬರ್ ೨, ೧೮೬೯ಡ್ ಭಾರತೊದ ಗುಜರಾತ್ ರಾಜ್ಯೊದ ಪೋರಬಂದರ್ಡ್ ಪುಟ್‍ದೆರ್. ಇಂಬೆರೆ ಅಮ್ಮೆರ್ ಕರಮಚಂದ್ ಗಾಂಧಿ. ಅಪ್ಪೆ ಪುತಲೀಬಾಯಿ. ೧೩ನೆ ಪ್ರಾಯೊಡು ಗಾಂಧೀಜಿ ಕಸ್ತೂರಿ ಬಾ ಇಂಬೆರೆನ್ ಮದಿಮೆ ಆಯೆರ್. ಅಯಿನೆಡ್ದ್ ಬುಕ್ಕೊ ಇಂಬೆರೆಗ್ ನಾಲ್ ಜೋಕ್ಲು ಪುಟ್ಟಿಯೆರ್. ಹರಿಲಾಲ್ ಗಾಂಧಿ, ಮಣಿಲಾಲ್ ಗಾಂಧಿ, ರಾಮದಾಸ್ ಗಾಂಧಿ ಬುಕ್ಕೊ ದೇವದಾಸ್ ಗಾಂಧಿ. ೧೯ನೆ ಪ್ರಾಯೊಡು ಗಾಂಧೀಜಿ ಲಂಡನ್ ನಗರೊದ ಯೂನಿವರ್ಸಿಟಿ ಕಾಲೇಜಿಡ್ ವಕಲತ್ ಬೇಲೆಗ್ ತರಬೇತಿ ಪಡೆಯರ ಪೋದು ತರಬೇತಿನ್ ಮುಗಿತ್ ಬತ್ತೆರ್. ಅಲ್ಪಡ್‌ದ್ ಬತ್ತ್‌ದ್ ಬೊಂಬಾಯಿ ನಗರೊಡು ವಕಲತ್ ಬೇಲೆ ಸುರು ಮಲ್ಪಿಯರ ಪ್ರಯತ್ನಿಸಯೆರ್.
• ವಕಾಲತ್‍ಡ್ ಜಾಸ್ತಿ ಪ್ರೇಜನೊ ಆವಂದಿನೆಡ್ದಾವರೊ ರಡ್ಡ್ ಒರ್ಸೊಡ್ದ್ ಬುಕ್ಕೊ ದಕ್ಷಿಣ ಆಫ್ರಿಕೊಗು ಕೆಲಸೊದ ಮಿತ್ತ್ ಪೋಯೆರ್. ಅಲ್ಪ ಬಾರತೊಡ ನಿವಾಸಿಲೆಗ್ ಸಮಾನ ಹಕ್ಕ್‌ನ್ ಕೊರಂದಿನ ಬ್ರಿಟಿಷ್ ಸರ್ಕಾರೊದ ವರ್ಣಭೇದೊ ನೀತಿನ್ ತೂದು ಬೇಜಾರಾದ್ ಗಾಂಧೀಜಿ ಅಲ್ಪದ ವರ್ಣಭೇದ ನೀತಿನ್ ಅಲಿಪಾಯರ ಚಳುವಳಿನ್ ಪುಟ್ಟ್‌ದ ಪಾಡ್ಯೆರ್. ಅಲ್ಪದ ಪೀಟರ್ ಮ್ಯಾರಿಟ್ಸ್ ಬರ್ಗ್ ಪನ್ಪಿನ ನಗರೊಡು ರೈಲ್‍ಡ್ ಒಂಜನೆ ದರ್ಜೆ ಟಿಕೆಟ್ ದೆತೊಂಡಲಾ ಅಲ್ಪ ಕುಲ್ಯರ ಬುಡಂದೆ ರೈಲ್‍ಡ್ದ್ ಪಿದಯಿ ಪಾಡ್‌ನಗ ಅಕ್ಲೆನ ವರ್ಣಭೇದೊ ನೀತಿದ ಇರುದ್ದೊ ಹೋರಾಟ ಮಲ್ಪೆರೆ ನಿಚ್ಚಯೊ ಆಂಡ್. ನವಂಬರ್ ೬, ೧೯೧೩ಡ್ ಬಾರತೊದ ಗಣಿಗಾರೆರೆ ಒಂಜಿ ಮೆರವಣಿಗೆಡ್ ಪೋನಗ ಗಾಂಧೀಜಿ ಬಂಧಿತೆರಾಯೆರ್.