ಪಿಶಾಚಿ
ಜನಪದ ಕತೆಕ್ಲೆಡ್ ಪಿಶಾಚಿ ಪಂಡ ಸೈತಿನ ವ್ಯಕ್ತಿ ಅತ್ತಂಡ ನರಮಾನಿ ಅತ್ತ್ಂಡ ಮುರ್ಗೊಲೆನ ಆತ್ಮೊ. ಉಂದು ಕೆಲವೆರೆಗ್ ತೋಜಿದ್ ಬರ್ಪುಂಡು ಪನ್ಪುನ ನಂಬಿಕೆ ಉಂಡು. ಪಿಶಾಚಿ ಬುಕ್ಕೊ ಬೂತೊಲೆನ ವರ್ಣನೆಡ್ ಮಲಸ್ತ್ ವ್ಯತ್ಯಾಸೊ ಉಂಡು. ಸೈತಿನ ವ್ಯಕ್ತಿನ ಆತ್ಮೊನು ಸಂಪರ್ಕೊ ಮಲ್ಪುನ ಉದ್ದೇಶಪೂರ್ವಕ ಪ್ರಯತ್ನೊನು ಪ್ರೇತೊವಿದ್ಯೆ ಪಂಡ್ದ್ ಲೆಪ್ಪುವೆರ್. ಅತ್ತಂದೆ ಆತ್ಮವಾದೊಡು ಸೈತಿನಕ್ಲೆನೊಟ್ಟುಗು ಪಾತೆರುನೆ ಪಂಡ್ದ್ ಲೆಪ್ಪುವೆರ್. ಇಂದೆಕ್ ಸಮ್ಮಂದ ಆಪುನ ಬೇತೆ ಪದೊಕುಲು ಪ್ರೇತೊ, ಬೂತೊ, ನಿರೆಲ್, ಕಡಪು, ಮಾಯೊ, ಪೀಡೆ ಇಂಚಿತ್ತಿ ಪದೊಕುಲು ಉಂಡೊ. ಪ್ರೇತವಿದ್ಯೆ (ಇಂಗ್ಲಿಷ್ಡ್ ನೆಕ್ರೊಮ್ಯಾನ್ಸಿ (/ˈnɛkrəmænsi/) ಪಂಡ ಸೈತಿನಕ್ಲೆನ ಆತ್ಮೊಲೆನ್ ಬವಿಷ್ಯವಾಣಿದ ಉದ್ದೇಸೊಗು ರೂಪೊಲು ಅತ್ತಂಡ ದರ್ಶನೊಲೆನ ರೂಪೊಡು ಲೆಪ್ಪುನ ನಿಲೆಟ್ ಅಕ್ಲೆನೊಟ್ಟುಗು ಪಾತೆರಕತೆ ಮಲ್ಪುನ ಮಾಂತ್ರಿಕತೆದ ಅಬ್ಯಾಸೊ. ದುಂಬುದ ಗಟನೆಲೆನ್ ಮುನ್ಸೂಚನೆ ಮಲ್ಪುನ ಬುಕ್ಕೊ ಗುಪ್ತ ಜ್ಞಾನೊನು ತೋಜ್ಪಾವುನ ಸಾದನೊಲೆನ್ ಒದಗಾವುನವು.
ಪಿಶಾಚಿ ಪಂಡ್ಂಡ ಮಾಸ ತಿನ್ಪುನಾಯೆ ಪನ್ಪುನ ಆರ್ತೊ ಉಂಡು. (A demon or evil spirit) ಲೋಕದ ಸುಕೊ ಬೋಗೊನು ಅನುಬವಿಸವಂದೆ, ಮದ್ಮೆಮಸ್ತಿ ಆವಂದೆ ಸೈತ್ಪೋಯಿ ಅತ್ಮೊಳು, ಕೆಕ್ಕಿಲ್ಗ್ ಬಲ್ಲ್ ಪಾಡೊಂದು, ಗುವೆಲ್ಗ್ ಲಾಯ್ತ್ದ್ ಸೈತಿನವು, ಗತಿಗೋತ್ರ ಇದ್ಯಾಂತೆ ಓಲಾಂಡಲಾ ಪೋದು ಸೈತ್ದ್ ಬೊಜ್ಜದ ಕ್ರಮೊ ಅವಂದಿನವು. ಇಂಚಿತ್ತಿ ಕೀಳು ಅತ್ಮೊಳೆನ್ ಪಿಶಾಚಿ ಆದ್ ಇಪ್ಪುಂಡು ಪಂದ್ ಪನ್ಪೆರ್. ಈ ಅತ್ಮೊಳು ರಕ್ಕಸೆ ಆದ್ ಸೇರ್ನೆಡ್ದಾವರೊ ಬೆರ್ಮರಕ್ಕಸೆ ಇಜ್ಜಿಂಡ ಬ್ರಹ್ಮಪಿಶಾಚಿಂದ್ ಪನ್ಪೆರ್. ಇಂಚಿತ್ತಿ ಪಿಶಾಚಿಲು ಕಾಡ್ ಗುಡ್ಡೆಲೆಡ್ಲಾ, ಸಾದಿ, ಮಾರ್ಗೊಡುಲಾ ಇತ್ತ್ದ್ ಪೋಪುನ ಬರ್ಪುನಗ್ಲೆಗ್ ಗಾಳಿ, ತೂ, ಬೊಳ್ದುದ ಮರ ಇಂಚಿತ್ತಿ ರೂಪೊಡು ತೋಜಿದ್ ಉಪದ್ರ ಕೊರ್ಪಗೆ.
ಪಿಶಾಚಿಲೆನ್ ಸಾಮಾನ್ಯವಾದ್ ಒಂಜಿ ಒಂಟಿಯಾದಿಪ್ಪುನ ನರಮಾನ್ಯನಂಚಿನ ಸಾರೊಲೆನ್ ವರ್ಣನೆ ಮಲ್ಪುವೆರ್. ಆಂಡಲಾ ಪಿಶಾಚಿದ ಸೈನ್ಯೊಲೆನ ಕತೆಕುಲು ಬೊಕ್ಕ ನರಮಾನಿಲೆನ್ ಬುಡ್ದು ಬೇತೆ ಪ್ರಾಣಿಲೆನ ಪ್ರೇತೊಲೆನ್ಲಾ ನೆಂಪು ಮಲ್ಪುವೆರ್.[೧]
ತುಳು ಜನೊಕುಲು ಪಾತೆರ್ನಗ ಒಂಜಿ ನರಮಾನಿ ಮನುಷತ್ವ ಇದ್ಯಾಂತೆ ಬದುಕೊಂದು ಇತ್ತೆಂಡ ಆಯಗ್ ಪಿಶಾಚಿ ಪೊಗ್ಗುದುಂಡು, ಪಿಶಾಚಿಲೆಕ್ಕ ಮಲ್ಪುವೆ ಪಂಡ್ದ್ ಪನ್ಪೆರ್. ಒಂತೆ ಬೆಚ್ಚದಲೆಕ್ಕ ಮಲ್ತೊಂದು ಇತ್ತೆಂಡ ಆಯಗ್ ಪಿಶಾಚಿ ಎದುರಾತ್ಂಡ್ ಪಂಡ್ದ್ಲಾ ಪನ್ಪುನ ನಂಬಿಕೆದ ಪಾತೆರೊ ಉಂಡು.
ಉಲ್ಲೇಕೊಲು
[ಸಂಪೊಲಿಪುಲೆ]- ↑ Cohen, Daniel (1984). The encyclopedia of ghosts. Dodd, Mead. p. 8. ISBN 978-0-396-08308-5. Archived from the original on 2023-08-14. Retrieved 2016-03-14.