ಬೆಲ್ಲಪತ್ರೊ

ಬೆಲ್ಲಪತ್ರೊ ಮರ
Scientific classification
Kingdom:	ದೈ
Division:	ಹೂ ಬುಡ್ಪುನ ದೈ
Class:	ಮ್ಯಾಗ್ನೋಲಿಯೊಪ್ಸಿಡಾ
Subclass:	ರೊಸಿಡೆ
Order:	ಸಪಿಂಡಲೆಸ್
Family:	ರುಟಾಸಿ
Genus:	ಏಗ್ಲೆ
Species:	ಎ. ಮಾರ್ಮೆಲೋಸ್
Binomial name
	ಏಗ್ಲೆ ಮಾರ್ಮೆಲೋಸ್; (L.) Corr. Serr.

ಬೆಲ್ಲಪತ್ರೊನು ಕನ್ನಡೊಡು ಬಿಲ್ವಪತ್ರೆ, ಇಂಗ್ಲಿಸ್‌ಡ್ Aegle marmelos ಪನ್ಪೆರ್. ಮಹಾ ಶಿವರಾತ್ರಿದಾನಿ ಬೆಲ್ಲಪತ್ರೊದ ಇರೆನ್ ಶಿವನ ಪೂಜೆಗ್ ಜಾಸ್ತಿ ಉಪಯೋಗ ಮಲ್ತ್ಂಡ ಶಿವದೇವೆರ್ ಒಲಿಪೆರ್ ಪನ್ಪಿನ ಜನೊಕುಲೆನ ನಂಬಿಕೆ. ಬೆಲ್ಲಪತ್ರೊದ ಮರ ಜಾಸ್ತಿ ಶಿವಾಲಯದ ವಟಾರೊಡು ನಮ್ಮ ಹಿರಿಯಕುಲು ಬಳಪಾವೊಂದಿತ್ತೆರ್. ಪ್ರಕೃತಿಡ್ ಈ ಮರ ತೋಜಿದ್ ಬರ್ಪುನೆ ಮಸ್ತ್ ಕಡಿಮೆ^[೧]. ಬಿಲ್ವ ಪತ್ರೆದ ಮರಟ್ ಮುಳ್ಳುಲು ಇತ್ತ್‌ದ್ ಸುಮಾರ್ ಎತ್ತರೊಗು ಬಳಪುಂಡು. ಅರೆಗಾಲೊಡು ಇರೆ ಮಾತ ತಾಳ್‌ದ್ ಬೋಳಾದ್ ತೋಜುಂಡು. ಮೂಜಿ ಇರೆಕುಲು ಒಟ್ಟೊಟ್ಟಿಗೆ ಇತ್ತ್‌ದ್ ಶಿವನ ಕಣ್ಣ್‌ದ ಲೆಕ್ಕ ತೋಜುಂಡು. ಈ ಮರ ಮೇ-ಜುಲಾಯಿಡ್ ಪೂ ಬುಡ್ಫುಂಡು ಪೂ ಬೊಲ್ದ್ ಬೆರಕೆ ಪಚ್ಚೆ ಬಣ್ಣೊಡುಪ್ಪುಂಡು. ಉಂದೆತ ಕಾಯಿ ಉರೂಟಾದ್ ಗಟ್ಟಿಯಾಯಿದ್ ಬೂದು ಬಣ್ಣೊಡುಪ್ಪುಂಡು

ಬೇತೆ ಬೇತೆ ಪುದರುಲು

ಉಂದೆನ್ ಬೇತೆ ಪುದರ್ಡ್ ಲೆಪ್ಪುವೆರ್^[೨]

ವೈಜ್ಞಾನಿಕ ಪುದರ್ - ಎಗಿಲ್ ಮಾರ್ಮಿಲೋಸ್
ಕನ್ನಡ - ಬಿಲ್ವಪತ್ರೆ, ಬೆಳವಿನ ಮರ, ಬೇಲಿಪತ್ರೆ, ಮಲಾರ, ಬೇಲ.
ತಮಿಳ್ - ಬಿಲ್ವ, ವಿಲ್ವಂ
ತೆಲುಗು - ಮಾರೇಡು, ಪಂಡು ಬಿಲ್ವ
ಇಂಗ್ಲಿಸ್ - ಬೇಲ್‍ಫ್ರೂಟ್, ಹೋಲಿಫ್ರೂಟ್, ಸ್ಟೋನ್ ಆ‌‌‌‍ಯ್ಪಲ್, ಬೆಂಗಾಲ್ ಕ್ವಿನ್ಸ್.
ಸಂಸ್ಕೃತ - ಬಿಲ್ವ, ಶ್ರೀಫಲ, ಶೈಲೂಷ, ಮಾಲೂರ
ಹಿಂದಿ - ಬೇಲ್
ತುಳು - ಬೆಲ್ಲಪತ್ರೊ

ಉಪಯೋಗ

ಉಂದೆನ್ ಬೇತೆ ಮರ್ದ್‌ಗ್ ಉಪಯೋಗ ಮಲ್ಪುವೆರ್^[೩]

ಬಿಲ್ವ ಪತ್ರೆದ ಬೇರ್‌‍ನ್ ಗೋಮೂತ್ರೊಡು ಅರೆತ್‌ದ್ ಪೇನ್ ತುಚ್ಚಿದ್ ಗಾಯ ಆದಿತ್ತಿನಾಡೆ ಪೂಜಿಂಡ ಗಾಯ ಗುಣ ಆಪುಂಡು.
ಬಿಲ್ವ ಪತ್ರೆದ ಬೇರೆದ ಕಷಾಯ ಮಲ್ತ್‌ದ್ ಅವು ಬೆಚ್ಚ ಉಪ್ಪುನಗನೆ ಅವೆನ್ ಮೂಲವ್ಯಾಧಿದ ತೆಗ್‌ರ್‌ಗ್ ಸೇಕೊ ಕೊರ್ಂಡ ಕೆಲವು ದಿನೊಟೂ ಮೂಲವ್ಯಾಧಿ ಕಡಿಮೆ ಆಪುಂಡು
ಬಿಲ್ವ ಪತ್ರೆದ ಇರೆನ್ ಅರೆತ್‌ದ್ ಎದೆತ ಮಿತ್ತ್ ಪೂಜಿಂಡ ಕಫ ನೀರಾದ್ ಪೊದು ತೆಮ್ಮೊ ಕಡಿಮೆ ಆಪುಂಡು
ಬಿಲ್ವ ಪತ್ರೆದ ಇರೆತ ರಸೊನು ಬೊಲ್ಪುಗು, ರಾತ್ರೆ ರಡ್ಡ್ ಸರ್ತಿ ಪರ್ಂಡ ಕಾಮಾಲೆ ಕಡಿಮೆ ಆಪುಂಡು
ಬಿಲ್ವ ಪತ್ರೆದ ಇರೆತ ರಸೊನು ೮ ಚಮಚದಾತ್ ದಿನೊಕ್ಕು ರಡ್ಡ್ ಸರ್ತಿ ದಿನೋಲ ಪರ್ಂಡ ಮಧುಮೇಹ ಕಡಿಮೆ ಆಪುಂಡು
ಬಿಲ್ವತ್ರೆದ ಕಾಯಿದ ಚೋಲಿನ್ ಮಿರೆ ಪೇರ್‌ದ ಒಟ್ಟೂಗು ಅರೆತ್‌ದ್ ತುಟಿಕ್ ಪೂಜಿಂಡ ತುಟಿಡ್ ಇತ್ತಿನ ಬೊಲ್ದು ಮಚ್ಚೆ ಕ್ರಮೇಣ ಕಡಿಮೆ ಆಪುಂಡು.
೧೪-೨೮ ಮಿ ಲೀ ದಾತ್ ಬಿಲ್ವತ್ರೆದ ಇರೆತ ರಸೊಕು ತಿಗೆತ ನೈಯಿ ಬೆರೆಸ್‌ದ್ ದಿನೊಕ್ಕು ರಡ್ಡ್ ಸರ್ತಿ ಪರ್ಂಡ ಪ್ರಮೇಹ ಕಡಿಮೆ ಆಪುಂಡು.
ಬಿಲ್ವತ್ರೆದ ಲತ್ತ್ ಕಾಯಿದ ತಿರ್ಲ್‌ನ್ ಲುಂಗಾದ್ ಪೊಡಿ ಮಲ್ತ್ ದಿವೊಂದು ಬೋಡಾನಗ ೩-೬ ಗ್ರಾಂ ಪೊಡಿಕ್ ಅಳೆ ಬೆರೆಸದ್ ಅವೆನ್ ಮೂಜಿ ಪಾಲ್ ಮನ್ತ್‌ದ್ ಒಂಜಿ ಪೊರ್ತುಗು ಒಂಜಿ ಪಾಲ್ ದ ಲೆಕ್ಕ ದಿನೊಕು ಮೂಜಿ ಸರ್ತಿ ಪರ್ಂಡ ಅತಿಸಾರ ಬುಕ್ಕೊ ರಕ್ತಾತಿಸಾರ ಕಡಿಮೆ ಆಪುಂಡು
ಬಿಲ್ವತ್ರೆದ ಕಾಯಿದ ಉಲಯಿದ ತಿರ್ಲ್‌ನ್ ಕುರಿತ್ತ ಪೇರ್ ಬುಕ್ಕೊ ಎಡ್ಮೆದ (ಎಳ್ಳು) ಎಣ್ಣೆದ ಒಟ್ಟುಗು ಕಾಯಿಪದ್ ಎಣ್ಣೆ ಮನ್ತ್‌ದ್ ಪುಟ್ಟುಡ್ದ್ ಕೆಬಿ ಕೇನೊಂದಿತ್ತಿಜ್ಜಿಂಡ ಅತ್ತ್ಂಡ ಮದ್ಯೊಡು ಕೆಬಿ ಕೇನಂದಿನಂಚಿನ ತೊಂದರೆ ಆಂಡ ೫-೬ ದಿನ ಈ ಎಣ್ಣೆನ್ ಕೆಬಿಕ್ ಪಾಡ್ಂಡ ಸಮಸ್ಯೆ ಕಡಿಮೆ ಆಪುಂಡು.
ಬಿಲ್ವತ್ರೆದ ಪರ್‌ಂದ್‌ದ ತಿರ್ಲ್ ೧ ಗ್ರಾಂ ಬುಕ್ಕೊ ೧ ಗ್ರಾಂ ಶುಂಠಿ ಸೇರ್ಸದ್ ಅರೆತ್‌ದ್ ದಿನೊಕು ರಡ್ಡ್ ಸರ್ತಿ ಪರ್ಂಡ ಮೂಲವ್ಯಾಧಿ ಗುಣ ಆಪುಂಡು.
ಬಿಲ್ವತ್ರೆದ ಪರ್ಂದ್‌ನ್ ಕೇವು ಬೊಣ್ಯೊಡು ಬೆಯಿಪಾದ್ ೧-೨ ಚಮಚದಾತ್ ಅಯಿತ ತಿರ್ಳ್‌ಗ್ ಬೆಲ್ಲ ಬೆರೆಸದ್ ದಿನೊಕು ರಡ್ಡ್ ಸರ್ತಿ ತಿಂದ್ಂಡ ಅಮಾತಿಸಾರ ಗುಣ ಆಪುಂಡು.
ಬಿಲ್ವತ್ರೆದ ಪರ್ಂದ್‌ದ ತಿರ್ಲ್‌ನ್ ಚೂರು ನೀರ್‌ಡ್ ಕಳಡಾದ್ ಅವೆಡ್ಡ್ ಬುಕ್ಕೊ ಕುಂಟುಡು ಅರಿತ್‌ದ್ ಬೋಡಾಪಿನಾತ್ ಪೇರ್, ಸಕ್ಕರೆ ಸೇರ್ಸದ್ ಪರ್ಂಡ ಪಟಿಕೆದ ಸಮಸ್ಯೆ ಇತ್ತ್ಂಡ ಕ್ರಮೇಣ ಕಡಿಮೆ ಆಪುಂಡು.