ರೋಸಾಲಿಂಡ್ ಎಲ್ಸೀ ಫ್ರಾಂಕ್ಲಿನ್

ರೋಸಾಲಿಂಡ್ ಎಲ್ಸೀ ಫ್ರಾಂಕ್ಲಿನ್
ಜುಲೈ 10, 1984
ಪುಟ್ಟಿನ	ರೋಸಾಲಿಂಡ್ ಎಲ್ಸೀ ಫ್ರಾಂಕ್ಲಿನ್ 25 ಜುಲೈ 1920 ನಾಟಿಂಗ್ ಹಿಲ್, ಲಂಡನ್, ಇಂಗ್ಲೆಂಡ್
ಮರಣ	16 ಎಪ್ರಿಲ್ 1958 ಚೆಲ್ಸೀ, ಲಂಡನ್, ಇಂಗ್ಲೆಂಡ್
ಸಾವಿಗೆ ಕಾರಣ	ಅಂಡಾಶಯ ಕ್ಯಾನ್ಸರ್
ರಾಷ್ಟ್ರೀಯತೆ	ಬ್ರಿಟಿಷ್
ವೃತ್ತಿ	ಕ್ಷ-ಕಿರಣ ಸ್ಫಟಿಕ ವಿಜ್ಞಾನಿ

ರೋಸಾಲಿಂಡ್ ಎಲ್ಸೀ ಫ್ರಾಂಕ್ಲಿನ್ ಪ್ರಖ್ಯಾತವಾಯಿನ ಆಂಗ್ಲ ರಸಾಯನ ತಜ್ಞೆರ್ ಬೊಕ್ಕ ಕ್ಷ-ಕಿರಣ ಸ್ಫಟಿಕ ದ ವಿಜ್ಞಾನಿ.ಡಿ.ಎನ್.ಎ (ಡಿ ಆಕ್ಸಿ ರೈಬೊನ್ಯುಕ್ಲಿಕ್ ಆಸಿಡ್) ,ಆರ್.ಎನ್.ಎ(ರೈಬೊನ್ಯುಕ್ಲಿಕ್ ಆಸಿಡ್) ,ವೈರಾಣು,ಕಲ್ಲಿದ್ದಲು ಬೊಕ್ಕ ಗ್ರಾಫೈಟ್ನ ಆಣ್ವಿಕ ರಚನೆಲೆನ್ ಅರ್ಥ ಮನ್ಪರೆ ಮೆರೆನ ಕೊಡುಗೆಲು ಅಪಾರ. ಕಲ್ಲಿದ್ದಲು ಬೊಕ್ಕ ವೈರಾಣುಲೆನ ಮಿತ್ತುದ ಮೆರೆನ ಕೃತಿಲು ಅರೆನ ಜೀವಿತಾವಧಿಡ್ ಅತೀ ಮೆಚ್ಚುಗೆ ಪಡೆದು ಇತ್ತುಂಡಲಾ ,ಮೆರೆನ ಡಿ.ಎನ್.ಎ ಸಂಶೋಧನೆಗ್ ಕೊರ್ತಿನ ಕೊಡುಗೆಲೆನು ಹೆಚ್ಚಾದ್ ಮರಣೋತ್ತರವಾದ್ ಗುರುತಿಸಲಾಂಡ್. ರೊಸಾಲಿಂಡ್ ಫ್ರಾಂಕ್ಲಿನ್ ನ ಲೆಕ್ಕ ತನ್ನ ಬದುಕು ಬೊಕ್ಕ ಕೃತಿ ತ ವಿಚಾರವಾದ್ ಅತೀಹೆಚ್ಚಾದ್ ವಿವಾದಕ್ ಉಂಡಾಯಿನ ಬೇತೇ ಒವ್ವೆ ಕುಡೊಂಜಿ ಪೊಂಜುವು ವಿಜ್ಞಾನಿ ಬಹುಶಃ ಇಜ್ಜೆರ್.

ಕುಟುಂಬೊದ ಹಿನ್ನೆಲೆ

ರೋಸಾಲಿಂಡ್ ಫ್ರಾಂಕ್ಲಿನ್ 1920 ಜುಲೈ 25 ದಾನಿ ಇಂಗ್ಲೆಂಡ್ ದ ಲಂಡನ್ ನಗರೊಡು ಶ್ರೀಮಂತ , ಪ್ರಭಾವೀ ಬ್ರಿಟಿಷ್ ಯೆಹೂದಿ ಕುಟುಂಬಡ್ ಪುಟ್ಟುದಿತ್ತೇರ್. ಮೆರೆನ ಪೊಪ್ಪ ಎಲ್ಲಿಸ್ ಆರ್ಥರ್ ಫ್ರಾಂಕ್ಲಿನ್ ರಾಜಕೀಯವಾದ್ ಉದಾತ್ತ ಲಂಡನ್ ವ್ಯಾಪಾರಿಯಾದ್ ಲಾ, ನಗರದ ವರ್ಕಿಂಗ್ ಮೆನ್ಸ್ ಕಾಲೇಜುಡ್ ಕಲ್ಪಾವೊಂದುಲಾ ಇತ್ತೆರ್. ಮೆರೆನ ಅಮ್ಮನ ಪುದರ್ ಮ್ಯುರಿಯೆಲ್ ಫ್ರಾನ್ಸಿಸ್ ವಲೆಯ್. ರೊಸಾಲಿಂಡ್ ಮಲ್ಲ ಮಗಳಾದಿತ್ತೆರ್ ಬೊಕ್ಕ ಐನ್ ಜೋಕುಲನ ಕುಟುಂಬಡ್ ರಡ್ಡನೇ ದಾಲಾದ್ ಇತ್ತೆರ್ . ಮೆರೆನ ಕುಟುಂಬ ಸಕ್ರಿಯವಾದ್ ವರ್ಕಿಂಗ್ ಮೆನ್ಸ್ ಕಾಲೇಜುಡ್ ತೊಡಗಾದಿತ್ತೆರ್.ಅಲ್ಪ ಮೆರೆನ ಪೊಪ್ಪ , ಬಯ್ಯಗ್ ವಿದ್ಯುಚ್ಛಕ್ತಿ,ಕಾಂತೀಯತೆ, ಬೊಕ್ಕ ಗ್ರೇಟ್ ವಾರ್ ಇತಿಹಾಸದ ವಿಷಯೊಲೆನು ಕಲ್ಪಾವೊಂದು ಇತ್ತೆರ್ ಬೊಕ್ಕ ಅಲ್ಪನೇ ಉಪ ಪ್ರಾಂಶುಪಾಲರಾದ್ ಮುಂದುವರೆದಿತ್ತೆರ್.

ಆರಂಭಿಕ ಜೀವನ ಬೊಕ್ಕ ಶಿಕ್ಷಣ

ಬಾಲ್ಯೊಡು ಫ್ರಾಂಕ್ಲಿನ್ ಅಸಾಧಾರಣ ತಾರ್ಕಿಕ ಸಾಮರ್ಥ್ಯನ್ ತೋಜಪಾದಿತ್ತೆರ್. ಅರೆನ ಆಜಿನೆ ವರ್ಷೊಡೇ ಆರ್ ನೊರ್ಲಾಂಡ್ ಪ್ಲೇಸ್ ಸ್ಕೂಲ್,ಹಾಲೆಂಡ್ ಪಾರ್ಕ್ ಅವೆನ್ಯೂ,ಪಶ್ಚಿಮ ಲಂಡನ್ ದ ಖಾಸಗಿ ಶಾಲೆಡ್ ಅರೆನ ಪಲಯೆನೊಟ್ಟು ಸೇರುದಿತ್ತೆರ್. ಅರೆಗ್ ಪ್ರಾರಂಭೊಡು ಕ್ರಿಕೆಟ್ ಬೊಕ್ಕ ಹಾಕಿಡ್ ಆಸಕ್ತಿ ಇತ್ತುಂಡು. ಒಂಭತ್ತು ವರ್ಷ ದಪಗ ಸಸೆಕ್ಸ್ ಡ್ ಉಪ್ಪುನ ಲಿಂಡೋರ್ಸ್ ಸ್ಕೂಲ್ ಫಾರ್ ಯಂಗ್ ಲೇಡೀಸ್ ವಸತಿ ಶಾಲೆನ್ ಪ್ರವೇಶ ಮಂತೆರ್. ಭೌತಶಾಸ್ತ್ರ ಬೊಕ್ಕ ರಸಾಯನಶಾಸ್ತ್ರೊಡು ಮಹಾನ್ ಪ್ರತಿಭೆನ್ ಸೇಂಟ್ ಪಾಲ್ಸ್ ಗರ್ಲ್ಸ್ ಸ್ಕೂಲ್,ಲಂಡನ್ ಡ್ ಪ್ರದರ್ಶನ ಕೊರಿಯೆರ್.ಫ್ರಾಂಕ್ಲಿನ್ ವಿಜ್ಞಾನೊನು ಅತೀ ಉತ್ತಮವಾದ್ ತೆರಿದು ಇತ್ತೆರ್. ಭೌತಶಾಸ್ತ್ರೊ ಬೊಕ್ಕ ರಸಾಯನಶಾಸ್ತ್ರೊ ನ್ ಎಡ್ಡೆಡ್ ಅಭ್ಯಾಸ ಮಂತೆರ್. ಜರ್ಮನ್ ಬೊಕ್ಕ ಫ್ರೆಂಚ್ ಭಾಷೆನ್ ಸರಾಗವಾದ್ ಕಲ್ತೆರ್, ಬೊಕ್ಕ ಉಂದು ಅರೆನ ವೃತ್ತಿಜೀವನೊಡು ಮಸ್ತ್ ಉಪಯುಕ್ತವಾಂಡ್ . 15 ವರ್ಷದಪಗ ವಿಜ್ಞಾನಿಯಾವೊಡು ಪಂದ್ ನಿರ್ಧಾರ ಮಂತೆರ್. 1938ಡ್ ಮೆಟ್ರಿಕ್ಯುಲೇಷನ್ ಪಾಸು ಮಂತೆರ್.ಅಲ್ಪಡ್ದ್ ಆರ್ 1938ಡ್ ನ್ಯೂ ಹ್ಯಾಮ್ ಕಾಲೇಜ್, ಕೇಂಬ್ರಿಜ್ ಸೇರಿಯೆರ್.1941 ಡ್ ಪದವಿ ಪಡೆಯಿನ ಬೊಕ್ಕ ,ಅರೆಗ್ ಅನಿಲ ವರ್ಣರೇಖನದ ಮಿತ್ತ್ ಕೆಲಸ ಮನ್ಪರೆ ಸಂಶೋಧನಾ ವಿದ್ಯಾರ್ಥಿವೇತನ ಕೊರಿಯೆರ್.ಆಂಡಾ 1947ಡ್ ಬ್ರಿಟಿಷ್ ಕೋಲ್ ಯೂಟಿಲೈಸೇಷನ್ ರಿಸರ್ಚ್ ಅಸೋಸಿಯೇಷನ್ ಡ್ ಮೇರ್ ಕೋಕ್ ನ ಸೂಕ್ಷ್ಮರಚನೆದ ಮಿತ್ತ್ ಕೆಲಸ ಮಂತೆರ್. ಅರೆನ ಸಂಶೋಧನೆದ ಪರಿಣಾಮವಾದ್ ಮೇರ್ 1945ಡ್ ಅರೆನ ಡಾಕ್ಟರ್ ಆಫ್ ಫಿಲೋಸಫಿ (ಪಿ.ಹೆಚ್.ಡಿ) ಪದವಿನ್ ಕೇಂಬ್ರಿಡ್ಜ್ ಡ್ದ್ ಪಡೆಯೆರ್. ಫ್ರಾಂಕ್ಲಿನ್ ರೆನ್ ಸಂಶೋಧನಾ ಗುಂಪಿಗ್ ಸೇರರೆ ಜಾನ್ ರಾಂಡಾಲ್ ಕೇಂಡೆರ್ . ಮೆರೆನ್ ಕ್ಷ-ಕಿರಣ ಸ್ಫಟಿಕಶಾಸ್ತ್ರನ್ ಬಳಸುದು , ಡಿ.ಎನ್.ಎ ಫೈಬರ್ ಅಧ್ಯಯಕ್ಕಾದ್ ಒಂಜಿ ಪ್ರಯೋಗಾಲಯೊನ್ ಸ್ಥಾಪನೆ ಮನ್ಪರೆ ಕೇಂಡೆರ್.

ಡಿ .ಎನ್.ಎ ರಚನೆ

ಡಿ .ಎನ್.ಎ ರಚನೆ ನಿರ್ಧರಿಸುನ ಸಂಪೂರ್ಣ ಜವಾಬ್ದಾರಿನ್ ಫ್ರಾಂಕ್ಲಿನ್ ಮೇರ್ ವಹಿಸಿದ್ ಇತ್ತೆರ್. ಅರೆನ ಭೌತರಸಾಯನವಿಜ್ಞಾನದ ಜ್ಞಾನೊನು ಉಪಯೋಗ ಮಂತುದು ,ಕ್ಷ-ಕಿರಣ ಸ್ವರೂಪಲೆನು‌ ಸುಲಭವಾದ್ ಬೊಕ್ಕ ನಿಖರವಾಯಿನ ವಿವರಣೆ ಕೊರಿಯೆರ್. ಅತೀ ತೆಳು ಆಯಿನ ಫೈಬರ್ಲೆನ್ ತಯಾರಿ ಮಂತೆರ್. ಡಿ.ಎನ್.ಎ ಯ ದ 'ಎ' ಬೊಕ್ಕ 'ಬಿ' ರೂಪಗಳನ್ ಆವಿಷ್ಕಾರ ಮಂತೆರ್ .ಆಂಡಾ ಅರೆನ ಸಂಶೋಧನೆದ 'ಎ' ರೂಪದ ಮಿತ್ತು ಕೇಂದ್ರೀತವಾದ್ ನನಾತ್ ಆವಿಷ್ಕಾರ ಮಂತೆರ್ .ಈ ರೂಪ ಸುರುಳಿಯಾಕಾರೊದ ರಚನೆನ್ ಹೊಂದುದಿಜ್ಜಿ ಬೊಕ್ಕ ಅರೆನ ಚಿಂತನೆಡ್ ಮೂಜಿ ಆಯಾಮದ ಹೆಲಿಕ್ಸ್ ರಚನೆ ನ್ ಪರಿಷ್ಕರಿಸಾಯೆರ್ ಪಂದ್ 24 ತ ಫೆಬ್ರವರಿ 1953 ದಾನಿ ಅರೆನ ಪ್ರಯೋಗಾಲಯದ ಪುಸ್ತಕಡ್ ದಾಖಲೆ ಮಂತೆರ್. ಈ ವಾಸ್ತವದ ಇರ್ವತ್ತೈನ್ ವರ್ಷೊದ ಬೊಕ್ಕ ,ಫ್ರಾಂಕ್ಲಿನ್ ರೆನ ಕೊಡುಗೆದ ಸುರುತ ಸ್ಪಷ್ಟ ವಾಚನ ತೋಜಿದು ಬತ್ತುಂಡು. 'ಡಬಲ್ ಹೆಲಿಕ್ಸ್'ನ ಪರಿಕಲ್ಪನೆ ಆರೋಪದ ಅಡಿಟ್ ಸಮಾಧಿಯಾದ್ ಇತ್ತೆರ್ಡಲ ,ಫ್ರಾಂಕ್ಲಿನ್ ಗ್ ಎಂಚಾ ಅರೆಡ್ ಇತ್ತಿನ ಡೇಟಾನ್ ವಿವರಿಸುವುನು ಪಂದ್ ಗೊತ್ತು ಇತ್ತುಜಿ. ಆಂಡಾ 'ನೇಚರ್' ಸಂಚಿಕೆಡ್ ಮೆರೆನ ಸ್ವಂತ ಪ್ರಕಟಣೆನ್ ಡಿ.ಎನ್.ಎ ದ ಕ್ಷ-ಕಿರಣ ಚಿತ್ರೊ ಮಸ್ತ್ ಸ್ಪಷ್ಟಪಡಿಸಿನ ಸುರುತ ಪ್ರಕಟಣೆಯಾದು ಇತ್ತುಂಡು. ಡಬಲ್ ಹೆಲಿಕ್ಸ್ ಡಿ.ಎನ್.ಎ ಇತಿಹಾಸದ ತನಿಖೆ ಮಂಪರೆ ಅವೇತೋ ಜನಕುಲೆಗ್ ಸ್ಫೂರ್ತಿಯಾಂಡ್ ಬೊಕ್ಕ ಫ್ರಾಂಕ್ಲಿನ್ ರೆನ ಕೊಡುಗೆ ಅಲ್ಪಡ್ ದ ಡಬಲ್ ಹೆಲಿಕ್ಸ್ ಮಾರ್ಗನ್ ಅನುಸರಿಸಿನಕಲೆಗ್ ಮೂಲ ವಸ್ತುದ ಬಗ್ಗೆ ಮಾಹಿತಿನ್ ಒದಗಾಂಡ್. ಡಿ.ಎನ್.ಎ ಕೆಲಸದ ಭಾಗೊನು ಮುಗಿಸಿ ಬೊಕ್ಕ , ಫ್ರಾಂಕ್ಲಿನ್ ಟೊಬ್ಯಾಕೊ ಮೊಸಾಯಿಕ್ ಬೊಕ್ಕ ಪೋಲಿಯೊ ವೈರಸ್ ದ ಮಿತ್ತ್ ಸುರುತ ಅನ್ವೇಷಕರಾದ್ ಕೆಲಸ ಸುರು ಮಂತೆರ್ 1951ತ ಸೆಮಿನಾರ್ ಡ್ ಫ್ರಾಂಕ್ಲಿನ್ ಅರೆನ ಉಪನ್ಯಾಸೊಡು ಡಿ.ಎನ್.ಎ ಅಣುತ ರಡ್ಡ್ ರೂಪೊಲೆನ್ ಮಂಡಣೆ ಮಂತೆರ್ . ಫಾಸ್ಫೇಟ್ ಘಟಕೊಲು ಅಣುತ ಬಾಹ್ಯ ಭಾಗೊಡ್ ಉಂಡು ಬೊಕ್ಕ ಅಣುತ ಸ್ಥಿರತೆ ವಿಷಯೊಡು ಗಮನಾರ್ಹ ಪ್ರಾಮುಖ್ಯತೆನ್ ಹೊಂದುದಿನ ನೀರ್ ಅಣುದೊಟ್ಟು ನಿರ್ದಿಷ್ಟ ಪ್ರಮಾಣ ಪನ್ಪಿನ ವಿಷಯೊಲೆನ್ ತೆರಿಪಾಯೆರ್. ವಾಸ್ತವವಾದ್, ಅಣುತ ಒಂಜಿ ಮಾದರಿ ನಿರ್ಮಿಸರೆ ಬೊಕ್ಕ ದುಂಬುದ ಪೂರಾ ಪ್ರಯತ್ನೊಲೆಗ್ ಆಧಾರವಾಯಿನ ಈ ಸತ್ಯೊಲೆನ್ ಸೂತ್ರೀಕರಿಸಿದಿನಕಲೆಟ್ ಫ್ರಾಂಕ್ಲಿನ್ ದುಂಬುದ ಸ್ಥಾನೋಡು ಉಂತುವೆರ್. ಅಂಚಾದ್ ಫ್ರಾಂಕ್ಲಿನ್ ಕ್ರಿಕ್ ಬೊಕ್ಕ ವ್ಯಾಟ್ಸನ್ ಮಾದರಿಗ್ ನಿರ್ಣಾಯಕ ಕೊಡುಗೆಲೆನ್ ಕೊರಿಯೆರ್

ವೈಯಕ್ತಿಕ ಜೀವನ

ಫ್ರಾಂಕ್ಲಿನ್ ರ್ ಒರಿ ಉತ್ತಮವಾಯಿನ ಆಜ್ಞೇಯತಾ ವಾದಿ ಪಂದ್ ವರ್ಣಿಸಲಾಪುಂಡು. ಅರೆನ ಧಾರ್ಮಿಕ ನಂಬಿಕೆದ ಕೊರತೆ ಏರ್ನಲ ಪ್ರಭಾವೊಡು ಪುಟ್ಟುದುಜಿ ,ಬದಲ್ ಗ್ ಅರೆನ ಜಿಜ್ಞಾಸೆ ಮನಸ್ಸುಡ್ ಪುಟ್ಟುದುಂಡು. ಮೇರ್ ದೇವರೆನ ಅಸ್ತಿತ್ವದ ನಂಬಿಕೆನ್ ನಿರಾಕರಣೆ ಮಂತೊಂದು ಇತ್ತೆರ್ ಪಂದ್ ಅರೆನ ಪೆದಿಯಪ್ಪೆ ಎಪೊಲಾ ನೆನಪು ಮಂತೊಂದು ಇತ್ತೆರ್.ಫ್ರಾಂಕ್ಲಿನ್ ರೆಗ್ ವಿಶೇಷವಾದ್ ವಿದೇಶ ಪ್ರಯಾಣ ಬೊಕ್ಕ ಟ್ರೆಕಿಂಗ್ ನ್ ಮಸ್ತ್ ಇಷ್ಟ. ಮೇರ್ ಅಮೇರಿಕಾಗ್ ಅವೇತೋ ಸಲ ವೃತ್ತಿಪರ ಪ್ರವಾಸೊನ್ ಮಂತೊಂದು ಇತ್ತೆರ್. ಕುಟುಂಬೊಡು ಮೆರೆನ್ 'ರೋಸ್' ಪಂದ್ ಲೆತ್ತೋಂದು ಇತ್ತೆರ್. ಆರ್ ಸಾಮಾನ್ಯ ವಾದ್ ಅರೆನ ರಾಜಕೀಯ ಅಭಿಪ್ರಾಯೊಲೆನ್ ವ್ಯಕ್ತ ಮಂತೊಂದು ಇತ್ತೆರ್ ‌. ಅಂಚೆನೆ ಆರ್ ಏರ್ನೊಟ್ಟುಲ ಮುಟ್ಪದ ಸಂಬಂಧ ದೀತುಜೆರ್.

ಅನಾರೋಗ್ಯ ಬೊಕ್ಕ ಸಾವು

ರೋಸಾಲಿಂಡ್ ಎಲ್ಸೀ ಫ್ರಾಂಕ್ಲಿನ್ ರೆಗ್, ಮಧ್ಯೊ 1956 ಡ್ ಕೆಲಸದ ವಿಚಾರೊಡು ಅಮೇರಿಕಾಗ್ ಪೋದುಪ್ಪುನಗ , ಸುರುತ ಬಾರಿ ಆರೋಗ್ಯ ಸಮಸ್ಯೆ ತೋಜುದು ಬತ್ತುಂಡು. ಅವ್ವೆ ವರ್ಷದ ಸೆಪ್ಟೆಂಬರ್ 4 ತಾರಿಕ್ ಗ್ ಆಪರೇಷನ್ ಮಂತುದು, ಅರೆನ ಬಂಜಿಡು ಇತ್ತುನ ರಡ್ಡ್ ಗಡ್ಡೆಲೆನ್ ದೆತ್ತೆರ್. ಈ ಸಮಯೊಡು ಬೊಕ್ಕ ದುಂಬಗ್ ಅರೆನ ಕೈತಲ್ ದ ಸ್ನೇಹಿತೆರ್ ಬೊಕ್ಕ ಅರೆನ ಕುಟುಂಬೊದ ಸದಸ್ಯೆರೊನೊಟ್ಟುಗು ಎಡ್ಡೆ ಕಾಲೊನು ಕಳೆಯೆರ್. ಅರೆನ ಅಮ್ಮಾ ಗ್ ದುಃಖೊ ನ್ ತಡೆಯೊರೆ ಮಸ್ತ್ ಕಷ್ಟ ಆವೊಂದು ಇತ್ತುಂಡು, ಅಂಚಾ, ಫ್ರಾಂಕ್ಲಿನ್ ಅರೆನ ಪೊಪ್ಪ ಅಮ್ಮ ನೊಟ್ಟು ಉಂತುಜಿ ಪಂದ್ ನಿರ್ಧಾರ ಮಂತೆರ್. ಕ್ಯಾನ್ಸರ್ ಚಿಕಿತ್ಸೆದ ಸಮಯೊಡುಲ ಫ್ರಾಂಕ್ಲಿನ್ ಅರೆನ ಸಂಶೋಧನೆದ ಕೆಲಸೊನು ಮುಂದುವರಿಸಾದ್ ಇತ್ತೆರ್. 1957 ಡ್ ,ಫ್ರಾಂಕ್ಲಿನ್ ಕೂಡಾ ಅನಾರೋಗ್ಯ ಪೀಡಿತರಾದ್ ರಾಯಲ್ ಮಾರ್ಸ್ ಆಸ್ಪತ್ರೆಗ್ ದಾಖಲೆ ಆಯೇರ್. ಡಿಸೆಂಬರ್ 2 ತಾನಿ ಆರ್ ಅರೆನ ಆಸ್ತಿ ಪತ್ರದ ಉಯಿಲೂಲ ಸಹ ಬರೆದಿತ್ತೇರ್. ಜನವರಿ 1958ಗ್ ಕುಡ ಅರೆನ ಸಂಶೋಧನೆದ ಕೆಲಸೊಡು ಅರೆನ್ ಆರ್ ತೊಡಗಾಯೇರ್. ಫೆಬ್ರುವರಿ 25ಕ್ ಜೀವಭೌತ ವಿಜ್ಞಾನೊಡು ಸಹಾಯಕ ಸಂಶೋಧಕರಾದ್ ಭಡ್ತಿ ಪಡೆಯೆರ್. ಮಾರ್ಚ್ 30ಕ್ ಅರೆನ ಆರೋಗ್ಯ ಕುಡ ಅರೆಗ್ ಕೈ ಕೊರುಂಡು. 16 ಏಪ್ರಿಲ್ 1958 ದಾನಿ ಲಂಡನ್ ದ ಚೆಲ್ಸಿಯೊಡು ಬ್ರಾಂಕೋನ್ಯುಮೋನಿಯಾ, II ಕಾರ್ಸಿನೊಮ್ಯಾಟೋಸಿಸ್ ಬೊಕ್ಕ ಅಂಡಾಶಯದ ಕ್ಯಾನ್ಸರ್ ಡ್ದ್ ನಿಧನರಾಯೆರ್.

ಮರಣೋತ್ತರ ಮನ್ನಣೆಗಳು

• 1982ಡ್ , ಐಯೊಟಾ ಸಿಗ್ಮಾ ಪೈ ,ಫ್ರಾಂಕ್ಲಿನ್ ರೆನ್ ರಾಷ್ಟ್ರೀಯ ಗೌರವ ಸದಸ್ಯರಾದ್ ಗೊತ್ತುಪಡಿಸಾಂಡ್.

• 1993ಡ್ ಕಿಂಗ್ಸ್ ಲಂಡನ್ ಕಾಲೇಜು ಹ್ಯಾಂಪ್ಸ್ಟೆಡ್ನ್ ಕ್ಯಾಂಪಸ್ನ ಡ್ ಆರ್ಚರ್ಡ್ ನಿವಾಸಕ್ ರೋಸಾಲಿಂಡ್ ಫ್ರಾಂಕ್ಲಿನ್ ಹಾಲ್ ಪಂದ್ ಮರುನಾಮಕರಣ ಮಂತೆರ್.

• 1995ಡ್, ನ್ಯೂ ಹ್ಯಾಮ್ ಕಾಲೇಜು ರೋಸಾಲಿಂಡ್ ಫ್ರಾಂಕ್ಲಿನ್ ಕಟ್ಟಡ ಪದವಿ ನಿವಾಸೊನು ಕಟ್ಟಾದ್ ಅಯಿತ ಉದ್ಯಾನವನೊಡು ಅರೆನ ಮೂರ್ತಿ ನ್ ಸ್ಥಾಪಿಸಾಯೆರ್.

• 1997ಡ್, ಲಂಡನ್ ಸ್ಕೂಲ್ ಆಫ್ ಕ್ರಿಸ್ಟಲೋಗ್ರಾಫಿ ರೋಸಾಲಿಂಡ್ ಫ್ರಾಂಕ್ಲಿನ್ ಪ್ರಯೋಗಾಲಯೊನ್ ಸುರು ಮಂತೆರ್.

• 1997ಡ್ ಪತ್ತೆ ಆಯಿನ ಕ್ಷುದ್ರಗ್ರಹನ್ ರೋಸ್ ಫ್ರಾಂಕ್ಲಿನ್ ಪಂದ್ ಪುದರ್ ದೀತೇರ್.

• 2001ಡ್,ಅಮೇರಿಕನ್ ನ್ಯಾಷನಲ್ ಕ್ಯಾನ್ಸರ್ ಇನ್ಸ್ಟಿಟ್ಯೂಟ್ ಕ್ಯಾನ್ಸರ್ ಸಂಶೋಧನೆಡ್ ಪೊಂಜುವುಲೆಗ್ ರೋಸಾಲಿಂಡ್ ಇ. ಫ್ರಾಂಕ್ಲಿನ್ ಅವಾರ್ಡ್ ಸ್ಥಾಪನೆ ಮಂತೆರ್.

• 2003ಡ್, ರಾಯಲ್ ಸೊಸೈಟಿ ನೈಸರ್ಗಿಕ ವಿಜ್ಞಾನೊ, ಎಂಜಿನಿಯರಿಂಗ್ ಯಾ ತಾಂತ್ರಿಕತೆ ಬೊಕ್ಕ ಒವ್ವೆ ಕ್ಷೇತ್ರೊಡು ಮಹೋನ್ನತ ಕೊಡುಗೆಗಾದ್ ರೋಸಾಲಿಂಡ್ ಫ್ರಾಂಕ್ಲಿನ್ ಪ್ರಶಸ್ತಿ ಸ್ಥಾಪನೆ ಮಂದೆರ್.

• 2006ಡ್, ಜೀವವಿಜ್ಞಾನ ಬೊಕ್ಕ ಸಂಯೋಜಿತ ವಿಭಾಗಲೆಡ್ ಪೊಂಜುವುಲೆನ ಪ್ರಮುಖ ಕೊಡುಗೆಲೆನ್ ಗುರುತಿಸಾರೆ ರೋಸಾಲಿಂಡ್ ಫ್ರಾಂಕ್ಲಿನ್ ಸೊಸೈಟಿನ್ ನ್ಯೂಯಾರ್ಕ್ ಡ್ ಸ್ಥಾಪನೆ ಮಂದೆರ್.

• ಸೇಂಟ್ ಪಾಲ್ಸ್ ಗರ್ಲ್ಸ್ ಸ್ಕೂಲ್ ರೋಸಾಲಿಂಡ್ ಫ್ರಾಂಕ್ಲಿನ್ ತಂತ್ರಜ್ಞಾನ ಕೇಂದ್ರ ಸ್ಥಾಪಿಸಾದುಂಡು.

• 2014ಡ್, ವೂಲ್ವರ್ ಹ್ಯಾಂಪ್ಟನ್ ವಿಶ್ವವಿದ್ಯಾನಿಲಯೊಡು ರೋಸಾಲಿಂಡ್ ಫ್ರಾಂಕ್ಲಿನ್ ವಿಜ್ಞಾನೊ ಕಟ್ಟಡ ಪನ್ಪಿನ ಪೊಸ ಪ್ರಯೋಗಾಲಯೊ ಕಟ್ಟಡನ್ ಉದ್ಘಾಟನೆ ಮಂದೆರ್.

• 2015ಡ್,ನ್ಯೂ ಹ್ಯಾಮ್ ಕಾಲೇಜ್ ಬೋಟ್ ಕ್ಲಬ್ ಪೊಸ ರೇಸಿಂಗ್ ಬಿಡುಗೊಡೆ ಮಂತ್ ಅಯಿಕ್ ರೋಸಾಲಿಂಡ್ ಫ್ರಾಂಕ್ಲಿನ್ ಪಂದ್ ಪುದರ್ ದೀತೇರ್.

ನೊಬೆಲ್ ಪ್ರಶಸ್ತಿ ತತ್ತಿನ ಕಾರಣೊ

ನೊಬೆಲ್ ಪ್ರಶಸ್ತಿ ನಿಯಮೊಲು ಮರಣೋತ್ತರ ನಾಮ ನಿರ್ದೇಶನೊಲೆನ್ ನಿಷೇಧಿಸುಂಡು, ಅಂಚಾ ರೋಸಾಲಿಂಡ್ ಫ್ರಾಂಕ್ಲಿನ್ 1958 ಟ್ ತೀರ್ ಪೋದಿತ್ತೇರ್ ಅಂಚಾದ್ ಆರ್ ಆ ಪ್ರಶಸ್ತಿಕ್ ನಾಮನಿರ್ದೇಶನ ಆವರೆ ಅರ್ಹರಾದ್ ಇತ್ತುಜೆರ್. ಅಂಚಾದ್ ಕ್ರಿಕ್,ವ್ಯಾಟ್ಸನ್ ಬೊಕ್ಕ ವಿಲ್ಕಿನ್ಸ್ ನೊಬೆಲ್ ಪುರಸ್ಕಾರಕ್ ಭಾಜನರಾಯೆರ್

ಕ್ಷ-ಕಿರಣ ವಿಕಿರಣದ ಜೊತೆಗ್ ಅರೆನ ಕೆಲಸ ಅನಾರೋಗ್ಯಕ್ ಕುಂದಾಪುಂಡು ಪಂದ್ ಗೊತ್ತು ಇತ್ತುದುಲ ಅವೇತೋ ಸಂಶೋಧನೆ ಮಂತುದು, ಅವೇತೋ ಸಾಧನೆ ಮಂತುದು, ಅಯಿತ ಕಾರಣೊಡೇ ಇಹ ಲೋಹನ್ ತ್ಯಜಿಸಾಯಿನ ರೋಸಾಲಿಂಡ್ ಎಲ್ಸೀ ಫ್ರಾಂಕ್ಲಿನ್ ಜೀವ ವಿಜ್ಞಾನ ಲೋಕೊಡು ಏಪೋಗುಲ ಮಿನುಗುನ ನಕ್ಷತ್ರ ಆದ್ ಉಲ್ಲೆರ್.