ರಾಣಿ ಕರ್ಣಾ

ರಾಣಿ ಕರ್ಣಾ
ಪುಟ್ಟಿನ	1939 ಹೈದರಾಬಾದ್, ಸಿಂಧ್, ಬ್ರಿಟಿಷ್ ಭಾರತ
ಮರಣ	7 ಮೇ 2018 ಕಲ್ಕತ್ತಾ
ವೃತ್ತಿ	ಕಥಕ್ ನೃತ್ಯಗಾರ್ತಿ
ಸಂಗಾತಿ	ನಾಯಕ್
ಪಾಲಕರು	ಅಸ್ಸಂದಾಸ್ ಕರ್ಣಾ
ಪ್ರಶಸ್ತಿಗಳು	ಪದ್ಮಶ್ರೀ ಉಪಾದ್ಯಕ್ಷೆರೆನ ಬಂಗಾರೊದ ಪದಕೊ ಆರ್ಡರ್ ಆಫ್ ದಿ ಕ್ವೀನ್ ಆಫ್ ಲಾಓಸ್ ಸಂಗೀತ ನಾಟಕ ಅಕಾಡೆಮಿ ಪ್ರಶಸ್ತಿ ಸಂಗೀತ ವಾರಿಧಿ ವಿಜಯ್ ರತ್ನ ಸೀನಿಯರ್ ಫೆಲೋಶಿಪ್ - ಭಾರತ ಸರ್ಕಾರೊ

ರಾಣಿ ಕರ್ಣಾ(ಪುಟ್ಟು:7 ಮೇ 2018) ಮೇರ್ ಒರ್ತಿ ಕಥಕ್ ನೃತ್ಯಗಾರ್ತಿ. ನೃತ್ಯಾಚಾರ್ಯ ನಾರಾಯಣ್ ಪ್ರಸಾದ್ ಬೊಕ್ಕ ಸುಂದರ್ ಪ್ರಸಾದ್ ಮೆರೆನ ಗುರುಕುಲಾದಿತ್ತೆರ್. ಗುರು ಹಿರಾಲಾಲ್ ಮೆರೆನ ನೇತೃತ್ವೊಡು ಜೈಪುರ ಘರಾನಾ ಶೈಲಿ ಅಂಚನೆ ಪಂಡಿತ್ ಬಿರ್ಜು ಮಹಾರಾಜ್ ಮೆರೆನ ಲಕ್ನೋ ಘರಾನಾ ನೀತಿನ್ ಕಲ್ತೆರ್. ನಾಟ್ಯ ಕ್ಷೇತ್ರೊಡು ಮೇರ್ ಮಲ್ದಿನ ಸೇವೆನ್ ತೂದು, ಭಾರತ ಸರ್ಕಾರ ೨೦೧೪ ನೇ ಇಸವಿಡ್ ಮೆರೆಗ್ ನಾಲನೇ ಅತ್ಯುನ್ನತ ನಾಗರಿಕ ಪ್ರಶಸ್ತಿ ಆಯಿನ ಪದ್ಮಶ್ರೀ ಮಾನಾದಿಗೆನ್ ಕೊರುಂಡು.

ಪುಟ್ಟು ಬೊಕ್ಕ ಬರವು

ರಾಣಿ ಕರ್ಣಾ ಮೇರ್ ೧೯೩೯ ನೇ ಇಸವಿಡ್ ಹೈದರಾಬಾದ್ ದ ಸಿಂಧಿ ಕುಟುಂಬೊಡು ಪುಟ್ಟಿಯೆರ್ . ಅರೆನ ಪೊಪ್ಪ ಅಸ್ಸಂದಾಸ್ ಕರ್ಣಾ ಮೇರ್ ಮೂಲತಃ ಲಾರ್ಕಾನಾ ಪ್ರದೇಸೊದ ಕರ್ಣಮಲಾನಿ ಪನ್ಪಿನ ಕುಟುಮೊಗು ಸೇರ್ದಿನಾರ್. ೧೯೪೨ ಡ್ ರಾಣಿ ಮೂಜಿ ವರ್ಸೊದ ಬಾಲೆ ಆದುಪ್ಪುನಗ, ಮೆರೆನ ಕುಟುಮದಕ್ಲ್ ದೆಹಲಿಗ್ ವಲಸೆ ಬರ್ಪೆರ್. ದಿಲ್ಲಿಡ್ ಸಾಲೆಗ್ ಪೋದು ಪ್ರಾತಮಿಕ ಬರವುನ್ ಪಡೆದ್ ಅಲ್ತನೇ ಹಿಂದೂ ಕಾಲೇಜ್ ಡ್ ಸಸ್ಯಶಾಸ್ತ್ರೊಡ್ ಪದವಿನ್ ಪಡೆಯೆರ್. ರಾಣಿ ಕರ್ಣಾ ಮೇರ್ ನಾಲ್ ವರ್ಸೊದ ಬಾಲೆ ಆದುಪ್ಪುನಗನೇ ನೃತ್ಯ ಕಲ್ಪರೆ ಸುರು ಮಲ್ತಿತ್ತೆರ್. ಕಥಕ್ ಅತ್ತಂದೇ ಒಡಿಸ್ಸಿ, ಮಣಿಪುರಿ, ಭರತನಾಟ್ಯ ನೃತ್ಯೊ ಪ್ರಕಾರೊಲೆನ್ಲಾ ಮೇರ್ ಕಲ್ತ್ದೆರ್. ೧೯೬೩ ನೇ ಇಸವಿಡ್ ಓಡಿಯಾ ಕುಟುಮೊಗು ಮೆರೆನ್ ಮದಿಮೆ ಮಲ್ತ್‍ದ್ ಕೊರಿಯೆರ್.

ರಾಣಿ ಕರ್ಣಾ ಮೆರೆನ ಚಿತ್ರೊ

ಸಂಸೋದನೆ

ನೃತ್ಯ ಪ್ರದರ್ಸನೊ ಅತ್ತಂದೇ, ಜೈಪುರ ಬೊಕ್ಕ ಲಕ್ನೋ ಘರಾನಾ ಸಂಪ್ರದಾಯೊಲೆನ್ ಸಂಯೋಜನೆ ಮಲ್ದಿನ ಕೀರ್ತಿಲಾ ರಾಣಿ ಕರ್ಣಾ ಮೆರೆಗ್ ಸಂದುಂಡು. ಮೇರ್ ದೆಹಲಿ ವಿಶ್ವವಿದ್ಯಾಲಯೊದ ಪ್ರಾಧ್ಯಾಪಕೆರಾದ್ ಎಸ್.ಕೆ.ಸಕ್ಸೇನಾ ಮೆರೆನೊಟ್ಟುಗು ಕಥಕ್ ದ ಸೌಂದರ್ಯಶಾಸ್ತ್ರೊದ ನಿಲೆಟ್ಟ್ ಸಂಸೋದನೆ ಮಲ್ದೆರ್. ೧೯೯೫ ನೇ ಇಸವಿಡ್ ಮೇರ್ 'ಸಂಸ್ಕೃತಿಕಿ ಶ್ರೇಯಸ್ಕರ್' ಪನ್ಪಿನ ನೃತ್ಯ ಅಕಾಡೆಮಿನ್ ಸ್ಥಾಪನೆ ಮಲ್ತೆರ್ ಬೊಕ್ಕ ಕಲ್ಕತ್ತಾ ಭಾರತೀಯ ವಿದ್ಯಾಬವನೊದ ವಿಬಾಗವಾಯಿನ 'ಸಂಗೀತ ಬೊಕ್ಕ ನೃತ್ಯ ಶಿಕ್ಷಣ ಭಾರತಿ' ನೆತ್ತ ಮಾರ್ಗದರ್ಶಿಯಾದ್ ಬೇಲೆ ಮಲ್ತ್ದೆರ್. ಮೇರ್ ಕಲ್ಕತ್ತಾ ಸ್ಕೂಲ್ ಆಫ್ ಮ್ಯೂಸಿಕ್ ದ ಸ್ಥಾಪಕೆರ್ ಬೊಕ್ಕ ನಿರ್ದೇಶಕೆರ್. ೧೯೭೮ ರ್ದ್ ೧೯೯೩ ಮುಟ್ಟ ಅಲ್ಪ ಬೇಲೆ ಮಲ್ತೆರ್. ಅವ್ ಅತ್ತಂದೆ ಮೇರ್ ಕಲ್ಕತ್ತಾದ ಅರಬಿಂದೋ ಭವನ ನೃತ್ಯ ವಿಬಾಗೊನು 'ಅಹನಾ' ಪನ್ಪಿನ ಪುದರ್ ಕೊರ್ದು ಸ್ತಾಪನೆ ಮಲ್ತೆರ್ ಅವ್ ಅತ್ತಂದೇ ೧೯೮೦ ರ್ದ್ ೧೯೮೭ ನೇ ಇಸವಿಮುಟ್ಟ ಆ ವಿಬಾಗೊದ ಮುಖ್ಯಸ್ತೆಯಾದ್ಲಾ ಬೇಲೆ ಮಲ್ತ್‍ದೆರ್.

ಸಂಸ್ಕೃತಿಕಿ ಶ್ರೇಯಸ್ಕರ್

೧೯೯೫ ನೇ ಇಸವಿಡ್ ರಾಣಿ ಕರ್ಣಾ ಮೇರ್, ಕಥಕ್ ನೃತ್ಯೊದ ಬಗ್ಗೆ ಪ್ರಚಾರ ಅಂಚನೆ ಅಬಿವೃದ್ದಿ ಮಲ್ಪುನ ಉದ್ದೇಸೊಡು 'ಸಂಸ್ಕೃತಿಕಿ ಶ್ರೇಯಸ್ಕರ್' ಪನ್ಪಿನ ಡಾನ್ಸ್ ಅಕಾಡೆಮಿನ್ ಸ್ಥಾಪನೆ ಮಲ್ತೆರ್. ಈ ಅಕಾಡೆಮಿ ಕಲ್ಕತ್ತೊದ ಜೋದ್ಪುರ್ ಪಾರ್ಕ್‍ದ ಬರೀಟ್ ನಿಲೆಯಾತ್ಂಡ್, ಅಕಾಡೆಮಿದ ಜೋಕುಲು ಇಡೀ ಭಾರತೊಡೇ ನಡಪಿನ ವಿದೊವಿದೊತ್ತ ಸಾಂಸ್ಕೃತಿಕ ಉತ್ಸವೊಲೆಡ್ ಪಾಲ್ ಪಡೆತೆರ್:

• ಕೊನಾರ್ಕ್ ಉತ್ಸವ - ೧೯೯೪.
• ಜೈಪುರ ಕಥಕ್ ಉತ್ಸವ, ನವದೆಹಲಿ - ೧೯೯೫.
• ರವೀಂದ್ರ ಜನ್ಮೋತ್ಸವ, ಕಲ್ಕತ್ತಾ - ೧೯೯೬, ೧೯೯೮ ಮತ್ತು ೧೯೯೯.
• ವಸಂತೋತ್ಸವ, ನವದೆಹಲಿ - ೨೦೦೦.
• ನಾಟ್ಯಾಂಜಲಿ ಉತ್ಸವ, ಚಿದಂಬರಂ - ೨೦೦೦.
• ಪುರಿ ಬೀಚ್ ಉತ್ಸವ-೨೦೦೦.
• ಕಥಕ್ ಮಹೋತ್ಸವ, ಕಲ್ಕತ್ತಾ - ೨೦೦೦.
• ತ್ಯಾಗರಾಜ ಉತ್ಸವ, ತಿರುಪತಿ - ೨೦೦೦.
• ವಿರಾಸತ್ ಉತ್ಸವ, ಕುಡ್ಲ - ೨೦೦೦.

ಉಂದು ಅಕಾಡೆಮಿ,ಕಾಲಿ ಕೋರ್ಸ್ ಅತ್ತಂದೆ, ತರಬೇತಿ ಅಂಚನೆ ನೇರ ಪ್ರದರ್ಸೊನೆನ್ಲಾ ಕೊರ್ಪುಂಡು. ಕಾರ್ಯಗಾರೊಲೆನ್ ನಡಪಾವರೆ ರವೀಂದ್ರ ಭಾರತಿ ವಿಶ್ವವಿದ್ಯಾನಿಲಯೊ ಬೊಕ್ಕ ನೆಹರು ಚಿಲ್ಡ್ರನ್ಸ್ ಮ್ಯೂಸಿಯಂ,ಡೆಲ್ಲಿ ನೆತ್ತೊಟ್ಟುಗು ಈ ಅಕಾಡೆಮಿ ಸೇರ್ದ್ಂಡ್. ಈ ಅಕಾಡೆಮಿಗ್ ಒಡಿಶಾಡ್ ಒಂಜಿ ಸಹಾಯಕ ಕೇಂದ್ರೊಲಾ ಉಂಡು .

ಮಾನಾದಿಗೆಲು

೨೦೧೪ ನೇ ಇಸವಿಡ್ ರಾಣಿ ಕರ್ಣಾ ಮೆರೆಗ್ ಭಾರತ ಸರ್ಕಾರೊರ್ದ್ ಪದ್ಮಶ್ರೀ ಪ್ರಶಸ್ತಿನ್ ಕೊರುಂಡು. ಅವ್ ಅತ್ತಂದೆ ಮೆರೆಗ್ ನನಲಾ ಸುಮಾರ್ ಮಾನಾದಿಗೆಲೆನ್ ಭಾರತ ಸರ್ಕಾರೊ ಕೊರ್ತುಂಡು:ಅವ್ ಅತ್ತಂದೆ ಮೆರೆಗ್ ನನಲಾ ಸುಮಾರ್ ಮಾನಾದಿಗೆ ಗೌರವೊಲು ತಿಕ್‍ದ್ಂಡ್:

• ಉಪಾಧ್ಯಕ್ಷರೆನ ಬಂಗಾರೊದ ಪದಕ - ಶಂಕರ್ ವಾರಪತ್ರಿಕೆ - ೧೯೫೪.
• ಆರ್ಡರ್ ಆಫ್ ದಿ ಕ್ವೀನ್ ಆಫ್ ಲಾಓಸ್ - ೧೯೬೪.
• ಸಂಗೀತ ವಾರಿಧಿ - ಭಾರತೀಯ ಕಲಾ ಕೇಂದ್ರ, ಡೆಲ್ಲಿ-೧೯೭೭.
• ವಿಜಯ್ ರತ್ನ - ಇಂಡಿಯನ್ ಇಂಟರ್ನ್ಯಾಷನಲ್ ಫ್ರೆಂಡ್ಶಿಪ್ ಸೊಸೈಟಿ, ನವದೆಹಲಿ - ೧೯೯೦.
• ಸೀನಿಯರ್ ಫೆಲೋಶಿಪ್- ಸಂಸ್ಕೃತಿ ಇಲಾಖೆ , ಮಾನವ ಸಂಪನ್ಮೂಲೊ ಅಭಿವೃದ್ಧಿ ಸಚಿವಾಲಯೊ - ಭಾರತ ಸರ್ಕಾರ.
• ಸಂಗೀತ ನಾಟಕ ಅಕಾಡೆಮಿ ಪ್ರಶಸ್ತಿ - ೧೯೯೬ .
• ಗೌರವ ಪ್ರಶಸ್ತಿ-ಅಖಿಲ ಭಾರತೀಯ ಸಿಂಧಿ ಬೋಲಿ ಮತ್ತು ಸಾಹಿತ್ಯ ಸಭಾ-೧೯೯೮