ಕಲ್ಲುರ್ಟಿ ಅಗೆಲ್
ಅಗೆಲ್ ಪಂಡ ವಿಶೇಷ ಆಡಿಗೆ ಮಲ್ತ್ದ್ ಬೂತೊಲೆಗ್ ಬಲಸುನೆಕ್ಕ್ ಅಗೆಲ್ ಬಲಸುನೆಂದ್ ಪನ್ಪೆರ್. ಅಂಚನೆ ಕರಿದ್ ಪೋಯಿನ ನಮ್ಮ ಗುರು ಹಿರಿಯಕುಲೆಗ್‌ಲ ಅಗೆಲ್ ಬಳಸುನ ಕ್ರಮಕ್ಕು ಸಯಿತಿನಕುಲೆಗ್ ಬಳಸುನೆಂದ್ ಪನ್ಪೆರ್ .ಅಗೆಲ್ ಸೇವೆ ಪಂಡ ಒಂಜಿ ಎಲ್ಯ ಕ್ರಮೊ, ಬಾರೆದ ಇರೆಟ್ಟ್ ತನ್ಕುಲು ತಿನ್ಪಿ ತೆನಸ್ ಉನುಪ್ಪು, ಕೋರಿ, ಮೀನ್‌‌ನ್ ಪಾಡ್ದ್ ಬಾರೆದ ಇರೆಟ್ಟ್ ಬಳಸುನೆ. ಕುಟುಂಬೊದಕುಲು ಒಟ್ಟಾದ್ ಬೂತೊಗಾವಡ್ ,ಕರಿ ಪೋಯಿನ ಹಿರಿಯಕುಲೆಗಾವಡ್ ಬಲಸುನ ಕ್ರಮೊ. ಭೂತಾರಾಧನೆಡ್ ಅಗೆಲ್ ,ತಂಬಿಲ ಬಲಸುನವು ಬಾರಿ ಮುಖ್ಯವಾಯಿನವು. ಕೋಲೊ,ನೇಮ ಕೊರ್ಯೆರೆ ಅಯಿಜಿಂಡ ಅಗೆಲ್ ಕೊರ್ಂಡಲ ಯಾವುಂಡು .ದೈವೊಲೆನ ಅಗೆಲ್ ಸೇವೆಡ್ ಕಲ್ಲುರ್ಟಿನ ಅಗೆಲ್ ಜಾಸ್ತಿಯಾದ್ ಆಟಿ ತಿಂಗೊಲುಡು ನಡಪುಂಡು
ಅಗೆಲ್‌ತ ವಿಸೇಸೊ
[ಸಂಪೊಲಿಪುಲೆ]ಅಗೆಲ್ ಪಂಡ ವಿಶೇಷ ಆಡಿಗೆ ಮಲ್ತ್ದ್ ಬೂತೊಲೆಗ್ ಬಲಸುನೆಕ್ಕ್ ಅಗೆಲ್ ಬಲಸುನೆಂದ್ ಪನ್ಪೆರ್.ಗುರುಹಿರಿಯೆರೆಗ್ ಬಳಸುನ ಅಗೆಲ್‌ಡ್ ನೀರ್ ದೋಸೆ ಬಳಸುನ ಕ್ರಮಲ ಕೆಲವು ಕಡೆಟ್ ಉಂಡು. ನುಂಗೆಲ್ ಮೀನ್‍, ಆರಿತ್ತ ಪುಂಡಿ, ರೊಟ್ಟಿ, ಕೋರಿ, ಕಾಯಿಕಜಿಪು ಇಂಚ ತರತರತ್ತ ಅಡಿಗೆ ಮಲ್ತ್ದ್ ಬಲಸುವೆರ್.
ಕಲ್ಲುರ್ಟಿನ ಕತೆ
[ಸಂಪೊಲಿಪುಲೆ]ಕಲ್ಕುಡ-ಕಲ್ಲುರ್ಟಿ ಪನ್ಪಿ ಅಣ್ಣ್ಣ ಮೆಗ್ದಿನಕುಲು ದುಂಬು ದೇವಲೋಕೊಡಿತ್ತಿನ ದೇವತಾ ಮನುಷ್ಯೆರ್.ದೇವಲೋಕೊಡು ನಡತಿನ ಒಂಜಿ ಘಟನೆಡ್ದಾತ್ರ ಅಕುಲು ಭೂಲೋಕೊಡು ನರಮಾನಿಯಾದ್ ಪುಟ್ಟುವೆರ್.ಒಂಜಿ ದಿನ ದೇವಲೋಕೊಡು ದೇವತೆಲೆನ ಸಭೆಕ್ ಗುರು ಬೃಹಸ್ಪತಿಕುಲೆಗ್ ದಾದನೊ ಕಾರಣೊಡ್ದಾತ್ರ ಸಭೆಟ್ ಪಾಲ್ ಪಡೆಯೆರೆ ಆಪುಜಿ.ಆ ಪೊರ್ತುಗು ಈ ಅಣ್ಣೆ ತಂಗಿ ಗುರು ವಿಶ್ವಕರ್ಮೆರೆನ್ ಲೆತ್ತ್‌ದ್ ಸಭೆ ನಡಪಾವೆರ್.ಉಂದೆನ್ ತೆರಿನ ಬೃಹಸ್ಪತಿಕುಲೆ ಅಗೌರವ ಅಫುಂಡು ಆರೆಗ್ ಕೋಫ ಬತ್ತ್‌ದ್ ದೇವಲೋಕೊಡಿತ್ತಿನ ಕಲ್ಕುಡ-ಕಲ್ಲುರ್ಟಿನ ತರೆ ಕಡ್ತ್‌ದ್ ಭೂಮಿಗ್ ದಕ್ಕ್‌ದ್ ಭೂಲೋಕೊಡು ನರಮಾನಿಯಾದ್ ಪುಟ್ಟ್‌ದ್ ಕಷ್ಟ ನಷ್ಟ ಅನುಭವಿಸಲೆಂದ್ ಶಾಪ ಕೊರ್ಪೆರ್.ಅಂಚಾದ್ ಅಕುಲು ಭೂಮಿಡ್ ಶಂಭು ಕಲ್ಕುಡೆ ಅಂಚನೆ ಇರವದಿ ಪನ್ಪಿ ದಂಪತಿಲೆನ ೬-೭ ಜೋಕುಲಾದ್ ಪುಟ್ಟುವೆರ್ . ಈ ಜೋಕುಲೆನ್ ಇರವದಿ ಬಂಜಿನಾಲ್ ಆದಿಪ್ಪುನಗ ಶಂಭು ಕಲ್ಕುಡಗ್ ಬೇಲೂರುದ ಬೆಳಗೊಳಡ್ದ್ ಓಲೆ ಬರ್ಪುಂಡು ಶಂಭು ಕಲ್ಕುಡೆ ತನ್ನ ಉಳಿ ಸಾಮಾನ್ ಪತ್ತೋಂದು ಓಲೆ ಕಡಪುಡ್ನ ಅರಸುನಾಡೆ ಪೋಪೆ ಅರಸು ಪನ್ಪೆ ಒಂಜಿ ಆಲಡೆ ಆವೊಡು ಗೊಮ್ಮಟನ್ ಕೆತ್ತೊಡುಂದು .ಮನದಾನಿ ದೇವೆರೆನ್ ನೆನೆತ್‌ದ್ ಬೇಲೆ ಸುರು ಮಲ್ಪುವೆ ಭಾರಿ ಪೊರ್ಲು ಕೆತ್ತನೆದ ಗೊಮ್ಮಟೆ ತಯಾರಾಂಡ್.ಇಂಚಿ ಇರವದಿ ಅಮರ್ ಜೋಕುಲೆನ್ ಪೆದ್ದುವಲ್ ಬೀರ ಕಲ್ಕುಡೆಂದ್‌ಲ ಕಾಳಮ್ಮಂದ್‌ಲ ಪುದರ್ ದೀದ್ ಜೋಕುಲು ಎಲ್ಯ ಪ್ರಾಯೊಡೆ ಮಲ್ಲ ಬಳಕೆಡ್ ಬಳಪುವೆರ್[೧].ಗೊಬ್ಬೆರೆ ಪೋಯಿನಲ್ಪ ಬೀರುಗು ದೋಸ್ತಿಲು ಅಮ್ಮೆಜ್ಜಂದಿನಾಯೆಂದ್ ತಮಾಷೆ ಮಲ್ಪುವೆರ್ .ಇಲ್ಲಡೆ ಬತ್ತಿನ ಬೀರು ಅಪ್ಪೆಡೆ ವಿಷಯ ಪೂರಾ ಪಿಂದ್‌ದ್ ಮನದಾನಿ ಕಾಂಡೆ ಅಮ್ಮೆರೆನ್ ನಾಡಿಯೆರೆ ಪಿದಡುವೆ ಇರವದಿ ಬೊಡ್ಚಿ ಪನ್ಪಲ್ ಇಜ್ಜಿ ಎಂಕ್ ಪೋವೊಡು ಅಮ್ಮೆರೆನ್ ನಾಡ್ದ್ ಅಮ್ಮೆರೆನ ಬೇಲೆ ತೂವೊಡುಂದು ಪಿದಾಡ್ದ್ ಪೋಪೆ. ಮುಲ್ಪ ಶಂಭು ಕಲ್ಕುಡೆ ತನ್ನ ಬೇಲೆ ಮುಗಿತ್‌ದ್ ಊರುಗು ಪೋಯೆರೆ ಪಿದಾಡುವೆ ಅರಸುಲು ಪುಗರ್ದ್ ಕೈ ನಿಲಿಕೆ ಸೇಜ ಕೊರ್ದು ಉಂಬೊಲಿ ಕೊರ್ದು ಕಡಪುಡಿಯೆರ್. ಸೇಜ ಪತೊಂದು ಬತ್ತಿನ ಶಂಭು ಕಲ್ಕುಡೆ ಬಚ್ಚೆಲ್ ಅರಪೆರೆ ಕಟ್ಟೆಡ್ ಕುಲ್ಲ್‌ದೆ ಅಡೆ ನಡತ್ ನದತ್ ಬಚ್ಚಿನ ಬೀರು ಕಲ್ಕುಡೆಲ ಬರ್ಪೆ .ಏರಪ್ಪಾ ಈ ಒಲ್ಪಡ್ದ್ ಬತ್ತಂದ್ ಶಂಭು ಕಲ್ಕುಡೆ ಕೇನುವೆ,ಯಾನ್ ಬೀರುಂದು ಎನ್ನ ಅಮ್ಮೆರೆನ್ ನಾಡೊಂದು ಪೋಪುನಾಯೆಂದ್ ಪನ್ಪೆ ,ನಿನ್ನ ಊರು ಒವ್ವು ಕೇನ್‌ನಗ ಕೆಲ್ಲತ್ತ್ ಮಾರ್ನಾಡು ಶಂಭು ಕಲ್ಕುಡೆ ಅಮ್ಮೆಂದ್ ಪನ್ಪೆ ಉಂದೆನ್ ಕೇಂದ್ ಈ ಎನ್ನ ಮಗೆ ಯಾನೆ ನಿನ್ನ ಅಮ್ಮೆಂದ್ ಪನ್ಪೆ. ಉಂದೆನ್ ಕೇಂದ್ ಖುಷಿಟ್ ಇರೆನ ಬೇಲೆನ್ ಯಾನ್ ತೂವೊಡು ಹಠ ಪತ್ತುವೆ .ಅಂಚಾದ್ ಅಲ್ತ್ ಪಿಜಿರ್ದ್ ಪಿರ ಪೋದು ಅಮ್ಮೆರೆನ ಬೇಲೆನ್ ತೂಯೆ ಗೊಮ್ಮಟೇಶ್ವರನ ಬೇಲೆಡ್ ಇತ್ತಿನ ಕುಂದು ಕೊರತೆನ್ ನಾಡ್ದ್ ಪತ್ತ್‌ದ್ ಪನ್ಪೆ ಉಂದೆನ್ ಕೇಂಡಿನ ಅಮ್ಮೆರ್ ಎನನ್ ಅರಸುಲು ದೀವಯೆರೆ ತರೆ ಕಡ್ಪೆರ್ಂದ್ ಮಟ್ಟೆಡಿತ್ತಿನ ಬೊಳ್ಳಿಕಟ್ಟಿನ ಬೀಸತ್ತಿ ದೆತ್ತ್‌ದ್ ಸರೀರೊಗು ಪಾಡೊಂದು ಸಯಿಪೆ.ಊರು ಮಾತ ಸುದ್ದಿಯಾಂಡ್ ಬೇಲೆಡ್ ಅಮ್ಮೆರೆಡ್ದ್‌ಲ ಬಿರ್ಸೆಂದ್ ತೆರಿದ್ ಕಾರ್ಕಳದ ಬೈರಸೂಡನ ಅರಸು ಬೀರು ಕಲ್ಕುಡಗ್ ಓಲೆ, ಮಾಣಿ ಕಡಪುಡುವೆ .ಬೀರು ಕಾರ್ಕಳಗ್ ಪೋಪೆ ರಾಜನ್ ತೂದು ಪುಡ್ಯೊನುವೆ ಲೆತ್ತಿನ ಕಾರ್ಯ ಪನ್ಲೆ ಪನ್ಪೆ. ಅರಸು ಪನ್ಪೆ ಒಂಜಿ ಆಲಡೆ,ಬಸದಿ ಆವೊಡು, ಗೊಮ್ಮಟನ್ ಕೆತ್ತೊಡುಂದು ಮನದಾನಿ ಕಾಂಡೇ ದೇವೆರೆನ್ ನೆನೆತ್‌ದ್ ಬೇಲೆ ಸುರು ಮಲ್ಪುವೆ ಭಾರಿ ಪೊರ್ಲು ಕೆತ್ತನೆದ ಗೊಮ್ಮಟೆ ತಯಾರಾಂಡ್. ಕಾರ್ಕಳದ ಗೊಮ್ಮಟೆ ಭಾರಿ ಪುಗರ್ತೆ ಪಡೆಂಡ್ ಬೀರು ಕಲ್ಕುಡೆ ತನ್ನ ಬೇಲೆ ಮುಗಿತ್‌ದ್ ಊರುಗು ಪೋಯೆರೆ ಪಿದಾಡುವೆ ಅರಸುಲೆಡ ಪನ್ಪೆ ಈರೆಗಾಪಿ ಬೇಲೆ ಆಂಡ್ ಎನ್ನ ಸೇಜ ಕೊರ್ಲೆ ಯಾನ್ ಪೋಪೆಂದ್ ಅಯಿಕ್ ಅರಸು ಇನಿ ಬಯ್ಯ ಆಂಡ್ ಎಲ್ಲೆ ಕಾಂಡೆ ಬಲ ಪನ್ಪೆ ಮನದಾನಿ ಕಾಂಡೆ ಪೋಯೆ ಕಲ್ಕುಡನ ಬೇಲೆನ್ ಪುಗರುವೆ ಇಂಚಿತ್ತಿನ ಶಿಲ್ಪ ಕಲೆ ನನ ಒಲ್ಪಲ ಆಯೆರೆ ಬಲ್ಲಿಂದ್ ಬೀರುನ ಬಲತ್ತ್ ಕೈಕ್ ಬಂಗಾರ್ದ ಬಳೆ ಪಾಡ್ದ್ ಎಡತ ಕೈನ್ ಕಡ್ಪಾವೆ,ಎಡತ ಕಾರ್‌ಗ್ ಕಡಗ ಪಾಡ್ದ್ ಬಲತ ಕಾರ್ ಕಡ್ಪಾವೆರ್ ಕಡ್ತಿ ಕೈಕ್ ಅಂಡೆ ಪಾಡವೆರ್ ಕಾರ್‌ಗ್ ಕುತ್ತಿ ಪಾಡಾವೆರ್.ಇಂಚಿತ್ತಿ ಊರುಡು ನೀರ್ ಮುಟ್ಟುಜಿ, ಉಂತುಜಿ ಪಂದ್ ಅಲ್ಪಡ್ದ್ ಏಣೂರುಗು ಪೋಯೆ ಅಲ್ಪದ ತಿಮ್ಮಣ್ಣಾಜಿಲೆರ್ ಚಾವಡಿಗ್ ಲೆಪ್ಪುಡಾಯೆರ್ ಎಂಕ್ಲೆಗೊಂಜಿ ಗೊಮ್ಮಟನ ಬೇಲೆ ಆವೊಡು ಪನ್ಪೆರ್ . ಒಂಜಿ ಕೈಕಾರ್ ಇಜ್ಜಿ ಯಾನ್ ಎಂಚ ಬೆನೊಡು ಪನ್ಪೆ .ಅಪಗ ಅರಸುಲು ನಿಕ್ಕ್ ಗುರ್ತದಕುಲು ಏರಾಂಡಲ ಇತ್ತ್ಂಡ ಪನ್ ಪನ್ಪೆರ್.ಅಂಚ ಅಕುಲೆಡ ಮಾತ ಪನ್ಪುನೆಕ್ ಯಾನ್ ಮಲ್ಪುವೆ ಪಂದ್ ಮನದಾನಿ ಕಾಂಡೇ ದೇವೆರೆನ್ ನೆನೆತ್‌ದ್ ಬೇಲೆ ಸುರು ಮಲ್ಪುವೆ ಮುಪ್ಪ ದಿನೊಟು ಆಪಿನ ಬೇಲೆನ್ ಮೂಜೆ ದಿನೊಟು ಮಲ್ತ್ ಮುಗಿಪುವೆ ಇಂಚಿ ತಂಗಡಿ ಕಾಳಮ್ಮಗ್ ಅಣ್ಣನ ಕನಟ್ ನೆಂಪಾ ನಾಡಿಯೆರೆ ಪಿದಾಡುವಳ್ ಬೇಳೂರು ಬತ್ತ್ ಕೇನುವಳ್ ಬೆಳಗೊಳ ಪೋತೆ ಪನ್ಪೆರ್.ಬೆಳಗೊಳ ಬತ್ತ್ ಕೇಂಡ್ಂಡ ಕೊಲ್ಲೂರು ಪೋತೆ ಪನ್ಪೆರ್ ಆಡೆ ಬತ್ತ್ ಕೇನ್‌ನಗ ಕಾರ್ಲಗ್ ಪೋಯೆ ಪನ್ಪೆರ್.ಕಾರ್ಲ ಬತ್ತ್‌ದ್ ಕೇನ್‌ನಗ ಕಾರ್ಕಳದ ಬೈರಸೂಡನ ಅರಸು ಒಂಜಿ ಕೈ ಒಂಜಿ ಕಾರ್ ಕಡ್ಪಾಯೆರ್ಂದ್ ಸುದ್ದಿ ಕೇಂದ್ ಅರಿಯೊ ಮುರಿಯೊ ಬುಳಿತೊಂದು ಅಣ್ಣೆ ಏಣೂರುಡು ಬೇಲೆ ಬೆಂದಿನ ಸುದ್ದಿ ಕೇಂದ್ ಏಣೂರುಗು ಬರ್ಪಲ್ ಅಣ್ಣಡ ನಡತಿನ ವಿಷಯ ಮಾತ ಪಿಂದೊದು ಅಣ್ಣನ ಜಕ್ಕೆಲ್ ಬೂರ್ದು ಬುಳಿಪುನಲ್ತ್ ಕುಡ್ತ್‌ದ್ ಲಕ್ಕುವಳ್ ಜೋಗೊಡು ಪೊಣೆಯಿನಾಯಡ ಮಾಯೊಡು ಪೊಣೆದ್ ತೂವೊಡು ಜೋಗೊ ಬುಡ್ದು ಮಾಯೊ ಸೇರ್‌ಗ ಪನ್ಪಲ್ ಮೂಜಿ ಸುತ್ತು ಬತ್ತೆರ್ ಮೂಜಿ ಕಲ್ಕೆಲ್ ಕಲ್ಕೆಯೆರ್ ಮಾಯಗಾಪೆರ್ ಬಡಕಾಯಿ ಗಂಗೆ ತೆನ್ಕಾಯಿ ಕಾವೇರಿ ತೀರ್ಥ ಮೀದ್ ತಿರುಪತಿ ಪೋದು ವರ ನಟ್ಟೊಂದು ತಗೆತಂಗಡಿ ಕಾರ್ಲಗ್ ಬತ್ತ್‌ದ್ ಬೀರು ಕಲ್ಕುಡಗ್ ದ್ರೋಹ ಮಲ್ತಿನ ಕಾರ್ಕಳದ ಬೈರಸೂಡನ ಅರಸುನ ಅರಮನೆನ್ ಸುಡುಸೂಕರ ಮಲ್ಪುವೆರ್.ಅವೆಡ್ಡ್ ಬೊಕ್ಕ ತುಳುನಾಡೊರ್ಮೆಲ ತಗೆತಂಗಡಿ ದೈವೊಲಾದ್ ಆರಾಧನೆ ಪಡೆಯೆರ್[೨].
ಕಲ್ಲುರ್ಟಿನ ಅಗೆಲ್
[ಸಂಪೊಲಿಪುಲೆ]ಕಲ್ಲುರ್ಟಿನ ಅಗೆಲ್ ಒಂಜೊಂಜಿ ಕೋಡೀಡ್ ಒಂಜೊಂಜಿ ರೀತಿ ಉಪ್ಪುಂಡು ಪಣೊಲಿ ಬೈಲ್‌ದ ಅಗೆಲ್‌ಡ್ ನುಪ್ಪುಲ ಕೋರಿದ ಕಲಿಪುಲ ಬಳಸುವೆರ್[೩] ಅಂಚನೆ ಆದೂರು ಕಲ್ಲುರ್ಟಿ ದೈವಸ್ಥಾನೊದ ಅಗೆಲ್‌ಡ್ ಪುಂಡಿಲ ಕೋರಿದ ಕಜಿಪುಲ ಉಪ್ಪುಂಡು ಅಂಚನೆ ನಮ್ಮ ಇಲ್ಲಡ್ ಕುಟುಂಬೊದಕುಲು ಮಾತ ಸೇರ್ದ್ ಕಲ್ಲುರ್ಟಿಗ್ ಬಳಸುನ ಕ್ರಮ್ ಬೇತೆ ರೀತಿ ಉಪ್ಪುಂಡು.ಕೆಲವು ಕಡೆಟ್ ದಡ್ಡವೊ ಪನ್ಪಿನ ಅರಿ ಕಡೆದ್ ಮಲ್ತಿನ ರೊಟ್ಟಿ ಉಪ್ಪುಂಡು.
ಬಳಸುನ ಕ್ರಮೊ
[ಸಂಪೊಲಿಪುಲೆ]ಕಲ್ಲುರ್ಟಿನ ಅಗೆಲ್ ಜಾಸ್ತಿಯಾದ್ ಆಂಜೊವುಲು ಮನ್ಪುನ ಕ್ರಮ ಇಜ್ಜಿಂಡ ಪಿದಯಿದ ಕುದಿ ಉಂತಿನ ಪೊಂಜೊಲು ಮನ್ಪೊಲಿ .ಕಲ್ಲುರ್ಟಿ ಅಗೆಲ್‌ಗ್ಂದ್ ಇತ್ತಿನ ಒಂಜಿ ಪೆರೆಡೆ ಲಾಕಿದ ಕಾರ್‌ನ್ ಕುರ್ದಿ ನೀರ್‌ಡ್ ದೆಕ್ಕ್‌ದ್ ಮಾತೆರ್ಲ ಮುಹೂರ್ತ್ದ ಅರಿ ಪಾಡ್ ಬಾಯಿಗ್ ನೀರ್ ಬುಡ್ದು ಎಡ್ಡೆ ಪಾತೆರೊ ಪಂಡ್‌ದ್ ಕುಟುಂಬೊದ ಹಿರಿಯಾರ್ ಅವೆನ್ ಪೊಜೆಕುವೆರ್ ಅವೆಡ್ದ್ ಬೊಕ್ಕ ಅಡಿಗೆ ಮಲ್ಪೆರೆಂದ್ ನೇಮಕ ಮಲ್ತಿನಕುಲು ಅವೆನ್ ತೊಳ್ಳುದು ಸಜ್ಜಿ ಮಲ್ತ್ದ್ ಅಕುಲೆ ಅಯಿಕ್ ಅರೆಪ್ಪು ಕಡೆದ್ ದಿಕ್ಕೆಲ್‌ಡ್ ಕಜಿಪು ಮಲ್ಪುವೆರ್.ಒಂಜಿ ಕೋರಿಗ್ ಮುಣ್ಚಿ ಸಂಬರೊ ಅಂಚನೆ ಒಂಜಿ ತಾರಾಯಿದ ಕಡೆದ್ ಅರೆಪ್ಪು ಮಲ್ಪೊಡು .ಐನ್ ಕೊಂಡೆ ಅರಿತ್ತ ನುಪ್ಪು ಐನ್ ಕೊಂಡೆ ಅರಿತ್ತ ದಡ್ಡವೊ ಮಲ್ತ್ದ್ ಬಳಸೊಡು.ಬಳಸುನ ಕೋಣೆಡ್ ಒಂಜಿ ಮಣೆ ದೀದ್ ಮಣೆತ್ತ ಮಿತ್ತ್ ಕಾಳ್ದೀಪೊ ಪೊತ್ತಾದ್ ದೀದ್ ಒಂಜಿ ಚೆಂಬು ನೀರ್ ದೀವೊಡು .ಮಣೆತ ಎದುರು ಐನ್ ಕೋಡಿ ಇರೆ ಪಾಡ್ದ್ ನೀರ್ ಪಾಡ್ದ್ ಒಚ್ಚಿದ್ ಸುರುಕು ನಡುತ ಇರೆಕ್ಕ್ ನುಪ್ಪು ಬಳಸೊಡು ಅವೆಡ್ದ್ ಬೊಕ್ಕ ಮಾತೆಗ್ಲ ಬಳಸ್‌ದ್ ಬೊಕ್ಕ ನಡುತ್ತೆಗ್ ಸುರುಕು ಕೋರಿದ ಕಜಿಪು ಬಳಸೊಡು ಬಕ್ಕ ಮಾತೆಗ್ಲ ಬಳಸ್ಸ್‌ದ್ ದಡ್ಡವೊ ನಡುತೆಗ್ ಸುರುಕು ಬಳಸ್ಸ್‌ದ್ ಬೊಕ್ಕ ಮಾತೆಗ್ಲ ಬಳಸೊಡು .ಬೊಕ್ಕ ಮಣೆತ ಮಿತ್ತ್ ಒಂಜಿ ಕುಪ್ಪಿದ ಗ್ಲಾಸ್‌ಡ್ ಅಮೃತ(ಗಂಗಸರ) ದೀವೊಡು.ಅವೆಡ್ಡ್ ಬೊಕ್ಕ ಮಾತ ಇರೆಕ್ಕ್‌ಲ ಕೋಲ್‌ತಿರಿ ಪೊತ್ತಾದ್ ಕುತ್ತೊಡು ಅವೆಡ್ಡ್ ಬೊಕ್ಕ ಮಾತ ಕುಟುಂಬೊದಕುಲು ಒಟ್ಟುಗು ಅಗೆಲ್ದ ಎದುರುಡು ಕೈಟ್ ಅರಿ ಪತ್ತ್‌ದ್ ಉಂತುದು ಪ್ರಾರ್ಥನೆ(ಎಡ್ಡೆ ಪಾತೆರೊ ಪಂಡ್‌ದ್) ಮಲ್ತ್ದ್ ಅರಿ ಪಾಡ್ಡ್ ಅಡ್ದ ಬೂರೊಡು.ಅವೆಡ್ದ್ ಬೊಕ್ಕ ಮಣೆಟ್ ಇತ್ತಿನ ಗಂಗಸರೊನು ಒಂಜಿ ದೊಣ್ಣೆಗ್ ಕೂಟೊಡು ಬೊಕ್ಕೊಂಜಿ ದೊಣ್ಣೆಡ್ ಮಜಿತ್ತ್ ನೀರ್ ಬೊಕ್ಕೊಂಜೆಡ್ ಕೋರಿಕಜಿಪುದ ಒಂಜಿ ತುಂಡು ಪಾಡ್ದ್ ಅಗೆಲ್‌ಗ್ ಕುತ್ತ್‌ನ ಕೋಲ್‌ತಿರಿ ಮಾತ ದೆತ್ತ್‌ದ್ ಒಂಜಿ ಕುರ್ದಿ ನೀರ್ದ ಚಿಲ್ಲಿಡ್ ಪಾಡೊಂದು ಒಂಜಿ ಚೆಂಬು ನೀರ್ಲ ಪತೊಂದು ಪೋತು ಮೂಜಿ ಸಾದಿ ಸೇರುನಲ್ಪ ದೀದ್ ಪ್ರಾರ್ಥನೆ ಮಲ್ತ್ದ್ ಬರೊಡು.ಅವೆಡ್ದ್ ಬೊಕ್ಕ ಅಗೆಲ್‌ನ್ ಮಾತೆರ್ಲ ಪಟ್ಟ್‌ದ್ ತಿನ್ಪುನ ಕ್ರಮೊ.
- ↑ ttps://kannada.news18.com/news/mangaluru/tulu-nadu-kalkuda-kallurti-daiva-amazing-history-of-daivaradhane-lw18-939052.html
- ↑ https://namma-naadu.blogspot.com/2011/08/sri-karanikada-kulkuda-kallurti.html
- ↑ https://vijaykarnataka.com/news/mangaluru/restart-of-service-at-panolibail-kallurti-daivastana/articleshow/78018520.cms