ಪೊಯ್ಯೆ

ವಿಕಿಪೀಡಿಯರ್ದ್
ಇಡೆಗ್ ಪೋಲೆ: ಸಂಚಾರೊ, ನಾಡ್‍ಲೆ
ನೇತ್ರಾವತಿ   ತುದೆತ ಪೊಯ್ಯೆ ನೆಕ್ಕಿಲಾಡಿ,ಪುತ್ತೂರು ತಾಲೂಕು,ದಕ್ಷಿಣ ಕನ್ನಡ ಜಿಲ್ಲೆ
ನೇತ್ರಾವತಿ   ತುದೆತ ಪೊಯ್ಯೆ ನೆಕ್ಕಿಲಾಡಿ,ಪುತ್ತೂರು ತಾಲೂಕು,ದಕ್ಷಿಣ ಕನ್ನಡ ಜಿಲ್ಲೆ
ನೇತ್ರಾವತಿ ತುದೆತ ಪೊಯ್ಯೆ- ಕಡೆಶಿವಾಲಯ,ಬಂಟ್ವಾಳ ತಾಲೂಕು,ದಕ್ಷಿಣ ಕನ್ನಡ ಜಿಲ್ಲೆ
ನೇತ್ರಾವತಿ ತುದೆತ ಪೊಯ್ಯೆ- ಕಡೆಶಿವಾಲಯ,ಬಂಟ್ವಾಳ ತಾಲೂಕು,ದಕ್ಷಿಣ ಕನ್ನಡ
ಫಲ್ಗುಣಿ ತುದೆತ ಪೊಯ್ಯೆ, ಅಡ್ಡೂರು, ಮಂಗಳೂರು  ತಾಲೂಕು, ದಕ್ಷಿಣ ಕನ್ನಡ ಜಿಲ್ಲೆ
ಫಲ್ಗುಣಿ ತುದೆತ ಪೊಯ್ಯೆ, ಅಡ್ಡೂರು, ಮಂಗಳೂರು  ತಾಲೂಕು, ದಕ್ಷಿಣ ಕನ್ನಡ ಜಿಲ್ಲೆ
ಸಿಲಿಕಾ ಪೊಯ್ಯೆ, ಕುಂಭಾಶಿ ಗ್ರಾಮ, ಉಡುಪಿ ಜಿಲ್ಲೆ
ಸಿಲಿಕಾ ಪೊಯ್ಯೆ, ಕುಂಭಾಶಿ ಗ್ರಾಮ, ಉಡುಪಿ ಜಿಲ್ಲೆ
ಸಿಲಿಕಾ ಪೊಯ್ಯೆ, ಪೆಜಮಾಡಿ, ಉಡುಪಿ ಜಿಲ್ಲೆ
ಸಿಲಿಕಾ ಪೊಯ್ಯೆ, ಪೆಜಮಾಡಿ, ಉಡುಪಿ ಜಿಲ್ಲೆ

ಕನಿಜೊಲೆನ, ಶಿಲೆಕುಲೆನ ಕಿನ್ಯ ಕಿನ್ಯ ಕಣಕುಲು ಒಟ್ಟಾದ್ ತಿಕ್ಕುನ ನೈಸರ್ಗಿಕ ರಾಶಿಗ್ ಪೊಯ್ಯೆ (Sand) ಇಂದ್ ಪುದರ್. ಬಯಲು ಸೀಮೆಡು ಮರಳು ಇಂದ್ ಪಣ್ಪೆರ್. ಕರಾವಳಿ ಕನ್ನಡೊಡು ಹೊಯಿಗೆ ಇನ್ಪೆರ್. ಉತ್ತರ ಕರ್ನಾಟಕೊಡು ಉಸುಕು ಇನ್ಪಿನ ಪುದರುಂಡು. ಉತ್ರರ ಕನ್ನಡ, ಮರಾಟಿ ಸೀಮೆಡ್ ರೇತಿ ಇಂದ್ ಪಣ್ಪೆರ್.

ನಿಸರ್ಗೊಡು ಬಗೆ ಬಗೆತ ಶಿಲೆಕಲ್ಲುಲು, ಕನಿಜೊಲು ನೀರ್ ಗಾಳಿ ದೊಂಬು ಹಿಮ ಇಂಚಿನ ಪರಿಸರದ ಮಾಧ್ಯಮೊಲೆನ ಸಮಾವೇಶದ ದಿಸೆಟ್ ಆಪಿನ ಕಿನ್ಯ ಗಾತ್ರದ, (೨ ಮಿಲಿಮಿಟರುಡುದು ಎಲ್ಯ) ಕಣಕುಲು. ಪರಪುನ ನೀರುದ ಅಡಿಟ್, ಕಡಲ ಬರಿಟ್ ಬೊಕ ಗಾಳಿ ದಿಂಜ ಪರಡುನ ಪರಿಸರೊಲೆಡ್ (ಉದರ್ಮೆಗ್: ಮರುಭೂಮಿ) ಮಾತಾ ಬೇತೆ ಬೇತೆ ನಮೂನೆದ ಉಗಮದ ಪೊಯ್ಯೆದ ರಾಶಿಲೆನ್ ತೂವೊಲಿ. ಅಂಚನೆ ಶಿಲೆನ್ ಕೃತಕವಾದ್ ಯಾಂತ್ರಿಕವಾದ್ ಪೊಡಿ ಮಲ್ತ್ ದ್ ಮಲ್ತಿನ ಪೊಯ್ಯೆ (m-sand) ತಯಾರು ಮಲ್ಪರೆಲಾ ಆಪುಂಡು.

ಪೊಯ್ಯೆದ ಕಣಗಾತ್ರ[ಸಂಪೊಲಿಪುಲೆ]

ಕೆಲವು ಬಗೆತ ಶಿಲೆಕುಲು ಶಿಥಿಲವಾದ್ ಪುಡಾತ್ ಕಿನ್ಯ ಕಣಕುಲು ಆನಗ ಮಲ್ಲ ಮಲ್ಲ ಕಲ್ಲ್ ದ ತುಂಡುಲು ಆಪ, ನನ ಕೆಲವು ಬಗೆತ ಶಿಲೆಕುಲು ಪೊಡಿಯಾನಗ ಅಯಿಟ್ ಇತ್ತಿನ ಕನಿಜೊಲೆನ ಗುಣ ಲಚ್ಚಣೊಲೆನ ದಿಸೆಟ್ ಅತಿ ಕಿನ್ಯ ಗಾತ್ರದ ಕಣಕುಲು ಆಪಾ. ಇಂಚ ನಿಸರ್ಗೊಡು ಶಿಲೆ ಶಿಥಿಲ ಪೊಡಿಯಾನಗ ಉಂಡಾಪಿನ ಕಣಕುಲೆನ ಗಾತ್ರದ ಆಧಾರೊಡು ಅಯಿಕುಲೆಗ್ ಭೂವಿಜ್ಙಾನಿಲು ವರ್ಗೀಕರಣ ಮಲ್ಪುವೆರ್.

ಪೊಯ್ಯೆಡು ಶಿಲೆತ ಕಣಕುಲು ಗಾತ್ರ 2.0 ಮಿಲಿಮೀಟರು(mm) ಡುದು ಎಲ್ಯ ಬೊಕ 0.0625 ಮಿಲಿಮೀಟರು (mm)ಡುದು ಮಲ್ಲ ಉಪ್ಪೊಡು ಇಂದ್ ‍ತಜ್ಞೆರ್‍ ತೀರ್ಮಾನ ಮಲ್ತ್ ದೆರ್. ರಡ್ಡ್ ಮಿಲಿಮೀಟರುಡುದು ಮಲ್ಲ ಗಾತ್ರದ ಕಣಕುಲು ಇತ್ತಿನಾಂಡ ಅವು ಚರ್ಲ್ (gravel ) ಆಪುಂಡು. ಅಂಚನೆ 0.0625 ಮಿಲಿಮೀಟರುಡುದು ಕಿನ್ಯ ಕಣಕುಲು ಇತ್ತಿನ ನಿಕ್ಷೇಪೊವಾಂಡ ಅವು ಸೇಡಿ (clay) ಇಂದ್ ಪರಿಗಣನೆ ಮಲ್ಪೊಡು.

ಪೊಯ್ಯೆದ ನಮೂನೆಲು[ಸಂಪೊಲಿಪುಲೆ]

ಪೊಯ್ಯೆಡ್ ಬಳಕೆದ ಆಧಾರೊಡು ಮುಖ್ಯವಾದ್ ರಡ್ಡ್ ನಮೂನೆದ ಪೊಯ್ಯೆಲೆನ್ ಗುರುತಿಸಾವೊಲಿ:

  • ಸಾಮಾನ್ಯ ಪೊಯ್ಯೆ -Ordinary Sand
  • ಸಿಲಿಕಾ ಪೊಯ್ಯೆ - Silica Sand
  • ಕಪ್ಪು ಪೊಯ್ಯೆ - Dark sand
  • ಅಣು ಕನಿಜದ ಪೊಯ್ಯೆ- Atomic mineral Sand

ಸಾಮಾನ್ಯ ಪೊಯ್ಯೆ[ಸಂಪೊಲಿಪುಲೆ]

ತುದೆತ ಬರಿಟ್ ಇಜಿಂಡ ಪರಪುನ ತುದೆತ ಅಡಿಟ್ ಇನ್ನಗ ತುದೆ ಪಾತ್ರೊಡು ತಿಕ್ಕುನ ಪೊಯ್ಯೆ. ಉಂದು ಕಟ್ಟೋಣ ಬೊಕ ಅಂಚಿನ ಕಟ್ಟುನ ಕೆಲಸೊಲೆಗ್ ಅಗತ್ಯವಾದ್ ಬೋಡಾಪಿನಂಚಿನ ಪೊಯ್ಯೆ. ಸಾಮಾನ್ಯ ಪೊಯ್ಯೆ ಗ್ ಇಂಗ್ಲೀಷಿಡ್ Ordinary Sand ಇನ್ಪೆರ್. ಸಾಮಾನ್ಯ ಪೊಯ್ಯೆಗ್ ತುದೆತ ಪೊಯ್ಯೆ ಇಂದ್ ಲಾ ಪಣ್ಪೆರ್. ಉಂದೆಟ್ ಬೊಲ್ಕಲ್ ಪರೆಲುಲು, ಚರ್ಲ್ ದ ತುಂಡುಲು ಗುಂಡುಲು, ಶಿಲೆತ ಪೊಡಿಕುಲು, ಗೋಯೆತೈಟ್, ಲಿಮೊನೈಟ್ ( ಕರ್ಬೊದ ಆಕ್ಸೈಡ್- ಹೈಡ್ರೋಕ್ಸೈಡುದ) ಪರೆಲುಲು, ಸೇಡಿದ ಸೂಕ್ಷ್ಮ ಪೊಡಿಕುಲು, ಮಾತಾ ಬಿರಕೆ ಯಾದುಪ್ಪುವಾ.

ಸಿಲಿಕಾ ಪೊಯ್ಯೆ[ಸಂಪೊಲಿಪುಲೆ]

ಪೊಯ್ಯೆಡ್ ಬೆಣಚು (ಬೊಲ್ಕಲ್, ಬೊಲ್ಲು ಕಲ್ಲ್- Quartz) ಇನ್ಪಿನ ಕನಿಜೊದ ಪ್ರಮಾಣ 90% ಡುದು ದಿಂಜ ಇತ್ತ್ಂಡ ಸಿಲಿಕಾ ಪೊಯ್ಯೆ (Silica Sand) ಇಂದ್ ಪಣ್ಪೆರ್. ಬೊಲ್ಕಲುದ ರಾಸಾಯನಿಕ ಸಂಘಟನೆ ಸಿಲಿಕಾ (SiO2 - ಸಿಲಿಕಾನ್ ಡೈ ಆಕ್ಸೈಡ್) ಆದುಂಡು. ಆಯಿನೆಡ್ದಾವರೆ, ಸಿಲಿಕಾ ಪೊಯ್ಯೆಡು SiO2 ದಿಂಜ ಉಪ್ಪುಂಡು. ಈ ಸಿಲಿಕಾ ಇನ್ಪಿನ ಸಿಲಿಕಾನ್ ಲೋಹ ಆಮ್ಲಜನಕದೊಟ್ಟುಗು ಸೇರ್ದ್ ಆತಿನ ಕನಿಜೊ ವಸ್ತು.

ಪಿರಾಕುಡ್ ಕಡಲ ಕರೆಟ್ ಸಂಗ್ರಹಾ ವಾದಿತ್ತ್ ದ್ ಕ್ರಮೇಣ ಕಡಲ್ ಪಿರಪೋಯಿನೆಡ್ದ್ ಬೊಕ ಒರಿದಿನ ಪೊಯ್ಯೆದ ನಿಕ್ಷೇಪೊಲು ಪಡ್ಡಾಯಿ ಕರಾವಳಿದ ಉಲಾಯಿದ ಭೂಮಿದ ತೋಟ ಕಂಡೊಲೆಡ್ ಮಣ್ಣ್ ದ ಅಡಿಟ್ ಪದರದ ರೂಪೊಡು ತಿಕ್ಕೊಂದುಲ್ಲಾ.

ಕಪ್ಪು ಪೊಯ್ಯೆ[ಸಂಪೊಲಿಪುಲೆ]

ಮಹಾರಾಷ್ಟ್ರದ ಹೆಚ್ಚಿನ ಭಾಗ, ಅಗ್ನಿ ಪರ್ವತೊಡುದು ಬೈದಿನ, ಕಪ್ಪು ಬಣ್ಣದ ದಖ್ಖಣ ಬಸಾಲ್ಟ್ (Deccan Basalt) ಇನ್ಪಿನ ಶಿಲೆಕುಲು ದಿಂಜಿದುಂಡು. ಇಂಚಿನ ಶಿಲೆಕುಲು ಶಿಥಿಲವಾದ್ ಪುಡಾದ್ ಕಿನ್ಯ ಕಿನ್ಯ ಚೂರುಲಾದ್ ಪರಪುನ ತುದೆ ಕುಲೆಡ್ ಕಪ್ಪು ಬಣ್ಣದ ಪೊಯ್ಯೆ ಯಾದ್ ಪರತೊಂದು ಪೋಪಾ. ಇಂಚಿನ ಕಪ್ಪು ಪೊಯ್ಯೆಲು ( Dark sand) ಮಹಾರಾಷ್ಟ್ರದ ಭಾಗೊಲೆಡ್ ತೋಜಿದ್ ಬರ್ಪಾ.

ಅಣು ಕನಿಜದ ಪೊಯ್ಯೆ[ಸಂಪೊಲಿಪುಲೆ]

ಭಾರತದ ಕರಾವಳಿದ ತೆಂಕಾಯಿ ಭಾಗೊಡು ಮುಖ್ಯವಾದ್ ಕೇರಳದ, ತಮಿಳುನಾಡುದ, ಆಂಧ್ರ ಪ್ರದೇಶೊದ ಕಡಲ ಬರಿಟ್ ಕಪ್ಪು ಬಣ್ಣೊಡು ಮಿರಮಿರ ಮಿಂಚುನ ಇಲ್ಮೆನೈಟ್ ಇನ್ಪಿನ ( Ilmenite- ಕರ್ಬೊ-ಟೈಟಾನಿಯಂ ಆಕ್ಸೈಡುಲೆನ ಕನಿಜೊ) ದಿಂಜಿದಿನ ಕರಿಪೊಯ್ಯೆದ ನಿಕ್ಷೇಪೊಲು ತಿಕ್ಕುವಾ. ಇಲ್ಮೆನೈಟ್ ಪೊಯ್ಯೆದ ಒಟ್ಟುಗು ರೂಟೈಲ್ ( Rutile- ಟೈಟಾನಿಯಂ ಆಕ್ಸೈಡುದ ಕನಿಜೊ ) ಮೊನಾಜೈಟ್ (Monazite- ಥೋರಿಯಂ ಬೊಕ ರೇರ್ ಅರ್ಥ್ ಎಲಿಇಮೆಂಟುಲು- REE -ಉಪ್ಪುನ ಕನಿಜೊ), ಜಿರ್ಕಾನ್ (Zircon - ಜಿರ್ಕೋನಿಯಂ ಲೋಹೊದ ಕನಿಜೊ) - ಇಂಚಿನ ಮಾತಾ ಅಣು ಶಕ್ತಿ ಮೂಲದ ಕನಿಜೊಲು ಸೇರ್ದುಪ್ಪುವಾ. ಆಯಿನೆಡ್ದಾವರೆ ಇಂಚಿನ ಪೊಯ್ಯೆಗ್ ಅಣು ಕನಿಜೊದ ಪೊಯ್ಯೆ (Atomic mineral Sand) ಇಂದ್ ಪಣ್ಪೆರ್. ಕೇರಳದ ಮಾನವಲಕುರುಚಿ ಊರುಡು, ತಮಿಳು ನಾಡುದ ಕುದಿರೈಮೋಜಿ ತೇರಿ ಇಂಚಿನ ಅಣು ಶಕ್ತಿ ಉತ್ಪಾದನೆಗೆ ಬೋಡಾಯಿನ ಕನಿಜೊಲು ಇಪ್ಪುನ ಪೊಯ್ಯೆದ ನಿಕ್ಷೇಪೊಲು ಉಲ್ಲಾ.

ಪೊಯ್ಯೆದ ಪರಿಸರೊದ ವರ್ಗೊಲು[ಸಂಪೊಲಿಪುಲೆ]

ಪೊಯ್ಯೆ ಸಂಗ್ರಹವಾದುಪ್ಪುನ ಪರಿಸರದ ಆಧಾರೊಡು ಈ ತಿರ್ತುದ ವರ್ಗೊಲೆನ್ ಮಲ್ಪೊಲಿ:

  • ತುದೆತ ಪೊಯ್ಯೆ - River sand
  • ಕಡಲ ಬರಿತ ಪೊಯ್ಯೆ - Beach Sand
  • ಮರುಭೂಮಿದ ಪೊಯ್ಯೆ- Desert Sand
  • ಪ್ರಾಚೀನ ಕಡಲ ಕರೆತ ಪೊಯ್ಯೆ - Palaeo-beach Sand

ತುದೆತ ಪೊಯ್ಯೆ[ಸಂಪೊಲಿಪುಲೆ]

ತುದೆಟ್ ಪರತೊಂದು ಬತ್ತ್ ದ್ ತುದೆತ ಪಾತ್ರೊಡು ಇಜಿಂಡಾ ತುದೆತ ಬರಿಕುಲೆಡ್ ಸಂಗ್ರಹವಾಯಿನ ಸಾಮಾನ್ಯ ಪೊಯ್ಯೆನ್ ತುದೆತ ಪೊಯ್ಯೆ (River Sand) ಇಂದ್ ಪಣ್ಪಿನ ರೂಡಿ ಉಂಡು. ಗ್ರಾನೈಟ್ ನೈಸ್ ಇಂಚಿನ ಬೊಲುಪನೆ ಬಣ್ಣದ ಶಿಲೆಕುಲೆನ ಪ್ರಾಂತ್ಯಡು ಬೊಲ್ಕಲ್ ಕಣ ಇತ್ತಿನ ಪೊಯ್ಯೆಲು ಕೂಡುವಾ. ಬಸಾಲ್ಟ್ ದಂಚಿನ ಕಪ್ಪು ಶಿಲೆಕುಲು ಉಪ್ಪುನ ಪ್ರಾಂತ್ಯಲೆಡ್ ಕಪ್ಪು ಬಣ್ಣದ ಪೊಯ್ಯೆ ಉತ್ಪತ್ತಿಯಾಪುಂಡು. ಲಕ್ಷ ದ್ವೀಪದಂಚಿನ ಹವಳ ದ್ವೀಪೊಲೆಡ್ ಸುಣ್ಣದ ಆಂಶ (Calcium carbonate) ಇತ್ತಿನ ಬೊಲ್ದು ಪೊಯ್ಯೆ ಉತ್ಪತ್ತಿಯಾಪುಂಡು.

ತುದೆಕುಲು ಘಟ್ಟೊಡುದು ಜತ್ತೊಂದು ಬರ್ಪಿನ ಮಿತ್ತ ಮರ್ಗಿಲುಡು ಚರ್ಲುಲು ದಿಂಜ ಉಪ್ಪುಂಡು. ಜತ್ತೊಂದು ಬರ್ಪಿನ ಸಾದಿಡ್ ಕ್ರಮೇಣ ತುದೆತ ಪಾತ್ರೊಡು ದೊರಗು ಪೊಯ್ಯೆ (Coarse sand) ನಿಲೆ ಆವರೆ ಸುರುವಾಪುಂಡು. ತುದೆ ಪರತೊಂದು ಕಡಲ ಅಳಿವೆದ ಸೀಮೆಗ್ ಬರ್ಪಿನಂಚನೆ ಸಪೂರದ ನಸೆ ಪೊಯ್ಯೆ ಪಾತ್ರೊಡು ಸಂಗ್ರಹವಾಪುಂಡು.

ತುದೆತ ಪೊಯ್ಯೆಲೆನ ಸಾಮಾನ್ಯ ಗುಣ ಲಚ್ಚನೊಲು[ಸಂಪೊಲಿಪುಲೆ]

ಬೊಲ್ಕಲ್ ( ಬೆಣಚು -Quartz) ಕಣ - ಪರೆಲುಲು ದಿಂಜ ಉಪ್ಪುನ ಪೊಯ್ಯೆ ಕಟ್ಟುನ ಕೆಲಸೊಲೆಗ್ ಊಂಚಿದ ಪೊಯ್ಯೆ ಆದುಂಡು. ಬೊಲ್ಕಲ್ ದಿಂಜ ಗಟ್ಟಿಯಾದುಪ್ಪುನ ಅಂಚನೆ ಸುಲಭೊಡು ಶಿಥಿಲ ಆವಂದಿನ ಒಂಜಿ ಕನಿಜೊ. ಮೋಹ್ಸ್ ಗಟ್ಟಿತನ ಗುಣಮಾನೊಡು 7 ಸೂಚಾಂಕ ಉಪ್ಪುನ ಕನಿಜೊ ಬೊಲ್ಕಲ್ (ಕ್ವಾರ್ಜ್). ಬೊಲ್ಕಲ್ ದಿಂಜಿದಿನ ಪೊಯ್ಯೆಗ್ ತುಲನೆ ಮಲ್ತ್ಂಡ ಕಪ್ಪು ಬಸಾಲ್ಟ್ ಪೊಯ್ಯೆಡ್ ಫೆಲ್ಸ್ ಪಾರ್ (Feldspar), ಆಂಫಿಬೋಲ್ (Amphibole) , ಬಯೊಟೈಟ್ (Biotite) ಇತ್ಯಾದಿ ಕನಿಜೊಲು ಉಪ್ಪುನ ಕಾರಣೊಡು ಬೇಗ ಶಿಥಿಲವಾಪಿನ ಗುಣ ಉಂಡು. ಸುಣ್ಣದ ಅಂಶ ಹೆಚ್ಚ ಉಪ್ಪುನ ಪೊಯ್ಯೆ ಕಡಿಮೆ ಗುಣಮಾನದವು, ಸುಣ್ಣದ ಕಾರ್ಬೊನೇಟ್ (ಕ್ಯಾಲ್ಶಿಯಂ ಕಾರ್ಬೊನೇಟ್) ಆಮ್ಲ ದ್ರವ ಪರಿಸರೊಡು ಬೇಗ ಕರಾವುನ ಶಿಥಿಲವಾಪಿನ ಗುಣತ್ತವು ಆದುಂಡು.

ಕಡಲ ಬರಿತ ಪೊಯ್ಯೆ[ಸಂಪೊಲಿಪುಲೆ]

ತುದೆಟ್ ಪರಪುನ ಪೊಯ್ಯೆ ನೀರ್ದ ಒಯಿಲುದ ಒಟ್ಟುಗು ಪೋದ್ ಅಳಿವೆಲೆಡ್ ಅಯಿಡುದು ಅಂಚಿ ಕಡಲುಗು ಪೋದ್ ಸೇರುವಾ. ಕಡಲುದ ತಿರೆಕುಲು ಕಡಲುಗು ಬತ್ತುದು ಬೂರ್ದಿನ ಪೊಯ್ಯೆನ್ ಅಡಿ ಲಕ್ಕಾದ್ ಕಡಲ ಕರೆಕ್ ಕಣತ್ ಪಾಡುವಾ. ಇಂಚ ಕಡಲ ಬರಿಟ್ (ಕರೆಟ್) ಕೂಡಿನ ಪೊಯ್ಯೆಗ್ ಕಡಲ ಬರಿತ ಪೊಯ್ಯೆ (ಕಡಲ ಕರೆತ ಪೊಯ್ಯೆ - Beach Sand) ಇಂದ್ ಪಣ್ಪೆರ್.

ನಿಷಿದ್ಧ[ಸಂಪೊಲಿಪುಲೆ]

ಕಡಲ ಕರೆತ ಪೊಯ್ಯೆನ್ ಗೆತ್ತ್ ದ್ ವ್ಯಾಪಾರೊಗು ಬಳಕೆ ಮಲ್ತ್ಂಡ ಕಡಲ ಕರೆಕ್ ಪರಿಸರೊಗು ದಿಂಜ ಹಾನಿ ಆಪಿನ ಸಂಭವ ಉಂಡು. ಅಯಿನೆಡ್ದಾವರೆ, ಕಡಲ ಕರೆತ ಪೊಯ್ಯೆದ ಬಳಕೆ - ಕಟ್ಟುನ ಕೆಲಸೊಲೆಗ್, ಉದ್ಯಮ ಬೇರೊಲೆಗ್ - ನಿಷಿದ್ಧ ಆದುಂಡು.

ಮರುಭೂಮಿದ ಪೊಯ್ಯೆ[ಸಂಪೊಲಿಪುಲೆ]

ತಾರ್ (ರಾಜಸ್ಥಾನ,ಭಾರತ) ಬೊಕ ಸಹಾರ (ಮಧ್ಯ ಪ್ರಾಚ್ಯ) ಇಂಚಿನ ಮರುಭೂಮಿ ಪ್ರದೇಶೊಲೆಡ್ ಉಷ್ಣಮಾನ ಹೆಚ್ಚ ಇತ್ತುದು ಗಾಳಿದ ರಭಸ ದಿಂಜ ಉಪ್ಪುನ ಕಾರಣೊಡು, ಪೊಯ್ಯೆದ ಕಣಕುಲು ಗಾಳಿಡ್ ನೀಂದೊಂದು ಪೋದ್ ದಿಂಜ ವರ್ಷೊಲೆನ ಬೊಕ ಮಲ್ಲ ಮಲ್ಲ, ದಪ್ಪದ ನಿಕ್ಷೇಪೊಲಾದ್ ಸಂಗ್ರಹವಾಪಿನ ಉಂಡು. ಸಹಾರದ ಭಾಗೊಡು ಉಪ್ಪುನ ಸೌದಿ ಅರೇಬಿಯಾದ ಕೆಲವು ಜಾಗೊಲೆಡ್ 100 ಮೀಟರುಡುದು ಮಿತ್ತ್ ದ ಪೊಯ್ಯೆದ ನಿಕ್ಷೇಪೊಲು ಉಲ್ಲಾ.

ಸಾಮಾನ್ಯವಾದ್ ಮರುಭೂಮಿದ ಪೊಯ್ಯೆಡ್ ದಿಂಜ ನಸೆತ ಕಿನ್ಯ ಗುಂಡು ಆಕಾರದ ಕಣಕುಲು ಉಪ್ಪುನೆಡ್ದಾವರೆ ಕಟ್ಟುನ ಕೆಲಸೊಲೆಗ್ ಸಮ ಆಪುಜಾ. (ಕಣಕುಲೆಡ್ ಸೂಕ್ಷ್ಮವಾದ್ ತೂನಗ ಒರೆಕೋರೆಲು ಇತ್ತ್ಂಡ ಕಣಕುಲು ಕಟ್ಟುನ ಬಾಳಿಕೆದ ವಾಸ್ತು ಬೇಲೆಲೆಗ್ ಎಡ್ಡೆ ಆಪುಂಡು)

ಪ್ರಾಚೀನ ಕಡಲ ಕರೆತ ಪೊಯ್ಯೆ[ಸಂಪೊಲಿಪುಲೆ]

ಇತ್ತೆ ಪಡ್ಡಾಯಿ ಕರಾವಳಿಡು ಉಪ್ಪುನ ಕುಡಲ (ಮಂಗಳೂರು), ಮುಲ್ಕಿ, ಕುಂದಾಪುರ ದಂಚಿನ ಕಡಲ ಕರೆತ ಊರುಲು ಸುಮಾರ್ ರಡ್ಡ್ ಸಾವಿರ ವರ್ಷೊಲೆನ ಪಿರಾವುಡು ಕಡಲ್ದ ಅಡಿಟ್ ಇತ್ತಿನೆಕ್ ಭೂವೈಜ್ಞಾನಿಕ ಬೊಕ ಚಾರಿತ್ರಕ ದಾಖಲೆಲು ತೋಜಿದ್ ಬರ್ಪಾ. ಅದಗ ಕಡಲ ಕರೆ ಆದಿತ್ತಿನ ಬಸ್ರೂರು ಬಂದರ ಇತ್ತೆ ಕಡಲುಡುದು ಐನ್ ಆಜಿ ಕಿಲೋಮೀಟರ್ ಉಲಾಯಿ ಪೋತುಂಡು. ಕಡಲ್ ಪಿರ ಪೋತಿನ ಭೂವೈಜ್ಞಾನಿಕ ಘಟನೆನ್ ನಂಮ ಇರಿಯೆರ್ ಪರಶುರಾಮ ಸೃಷ್ಟಿ ಇನ್ಪಿನ ಒಂಜಿ ಸೋಜಿಗದ ಪುರಾಣ ಕತೆಯಾದ್ ಮಲ್ತ್ ದೆರ್.

ಕಡಲ್ ಪಿರ ಪೋತಿನೆಕ್ಕ್ ದಾಖಲೆಯಾದ್ ಒರಿದಿನ ಒಂಜಿ ಮುಖ್ಯ ಸಾಕ್ಷಿ ಪ್ರಾಚೀನ ಕಡಲ್ದ ಕರೆತ ಪೊಯ್ಯೆದ ರಾಶಿಲು. ಪ್ರಾಚೀನ ಕಡಲ ಕರೆಟ್ ಇತ್ತಿನ ಪೊಯ್ಯೆದ ಸಾಲುಲು ಮಣ್ಣ್ ದ ಅಡಿಟ್ ಕೋಂತ್ ಪೋತಿನವು ಇನಿ ನಂಕ್ ಸಿಲಿಕಾ ಪೊಯ್ಯೆದ ನಿಕ್ಷೇಪೊಲೆನ ರೂಪೊಡು ತಿಕ್ಕೊಂದುಂಡು. ಇಂಚಿನ ನಿಕ್ಷೇಪೊಲು ಒರಿದಿನೆನ್ ಕುಂದಾಪುರದ ಕೈತಲ್ದ ಕೋಟ, ಬೀಜಾಡಿ, ಗೋಪಾಡಿ, ಕೋಟೇಶ್ವರ, ಪಡು ಬಿದ್ರಿ ಕೈತಲ್ದ ನಡಿಸಾಲ್ , ಪೆಜಮಾಡಿ ಇಂಚಿನ ಊರುಲೆಡ್ ತೂವೊಲಿ.

ಇಂಚೆನೆ ಭಾರತ ದೇಶೊದ ಮೂಡಾಯಿದ ಕರಾವಳಿಡುಲಾ ಕೆಲವು ಪ್ರಾಚೀನ ಕಡಲ ಕರೆತ ಪೊಯ್ಯೆ ನಿಕ್ಷೇಪೊಲು ಉಲ್ಲಾ.

ಪೊಯ್ಯೆದ ಉಪಯೋಗೊಲು[ಸಂಪೊಲಿಪುಲೆ]

ತುದೆತ ಪೊಯ್ಯೆ[ಸಂಪೊಲಿಪುಲೆ]

ತುದೆತ ಪೊಯ್ಯೆ (ಸಾಮಾನ್ಯ ಪೊಯ್ಯೆ) ಕಟ್ಟುನ ಕೆಲಸೊಲೆಗ್ ಕಾಂಕ್ರೀಟ್ ಬೇಲೆ ಲೆಡ್ ಸಿಮೇಂಟಿಗ್ ಮಿಶ್ರ ಮಲ್ಪರೆ ಅಗತ್ಯವಾದ್ ಬೋಡಾಯಿನ ವಸ್ತು. ದೊರಗುದ ಪೊಯ್ಯೆ ಸಾಮಾನ್ಯ ಕಟ್ಟುನ ಕೆಲಸೊಲೆಗ್ ಉಪಯೋಗವಾಂಡ ಗೋಡೆ ಸಾರಣೆದ ಬೇಲೆಗ್ ನಸೆ ಪೊಯ್ಯೆ ಬಾರಿ ಎಡ್ಡೆ ಆಪುಂಡು. ಬೊಲ್ಕಲ್ದ ಕಣಕುಲು ದಿಂಜಿದಿನ ಪೊಯ್ಯೆ ಕಟ್ಟುನ ಕೆಲಸೊಲೆಗ್ ಊಂಚಿದ ಪೊಯ್ಯೆ. ಕಪ್ಪು ಬಣ್ಣದ, ಸೇಡಿ ದಿಂಜಿದಿನ, ಸುಣ್ಣದ ಆಂಶದ ಪೊಯ್ಯೆಲು ದಿಂಜ ಬಾಳಿಕೆ ಬರ್ಪಿನ ಕಟ್ಟೋಣೊ ಸಂಕ ಆಣೆಕಟ್ಟು ಇತ್ಯಾದಿ ಕಟ್ಟರೆ ಎಡ್ಡೆ ಅತ್ತ್.

ಸಿಲಿಕಾ ಪೊಯ್ಯೆ[ಸಂಪೊಲಿಪುಲೆ]

ಸಿಲಿಕಾ ಪೊಯ್ಯೆ - ಪ್ರಾಚೀನ ಕಡಲ ಕರೆತ ಪೊಯ್ಯೆದ ನಿಕ್ಷೇಪೊಲೆಡ್ ಸಾಮಾನ್ಯವಾದ್ ಉಪ್ಪುಂಡು. ಸಿಲಿಕಾ ಪೊಯ್ಯೆಡ್ ಕಜವುಲು ಇತ್ತ್ಂಡ ಅವೆನ್ ದೆಕ್ ದ್ ಕಶ್ಮಲರೂಪೊದ ಸೇಡಿ,ಕರ್ಬೊದ ಅಂಶೊಲೆನ್ ಬೇತೆ ಮಲ್ತ್ ದ್ ಸಿಲಿಕಾ ಪ್ರಮಾಣೊನು ಊಂಚಿ ಮಲ್ಪರೆ ಉದ್ಯಮೊಲು ಉಲ್ಲಾ. ಇಂಚ ಸಿಲಿಕಾ ದಿಂಜ ಇತ್ತಿನ (SiO2 98-99.9%) ಪೊಯ್ಯೆಲೆನ್ ವಿಶೇಷ ಉದ್ಯಮೊಲೆಡ್ ಉಪಯೋಗ ಮಲ್ಪುವೆರ್. ಅವು ಇನ್ನಗ:

  • ಕಾಜಿ (ಗ್ಲಾಸ್ -glass) ಉತ್ಪಾದನೆ
  • ಎರಕದ ಪೊಯ್ಯೆ (Foundry or Moulding sand)- ಲೋಹದ ಕುಲುಮೆಲೆಡ್ ಕರಾಯಿನ ಕರ್ಬೊ, ಆಲುಮಿನಿಯಂ ಲೋಹಲೆನ್ ವಿಶಿಷ್ಟ ಅಚ್ಚಿಲಡ್ ಎರಕ ಮೈತಿದ್ ಯಂತ್ರೊಲೆನ ಭಾಗೊಲೆನ ಉತ್ಪಾದನೆ.
  • ಲೋಹ ಉತ್ಪಾದನೆ - ಲೋಹ ಕರಾವುನ ಉಷ್ಣಮಾನ ಕಡಿಮೆ ಮಲ್ಪುನ flux ಆದ್ ಬಳಕೆ.
  • ರಾಸಾಯನಿಕ ಉತ್ಪಾದನೆಲು- ಸಿಲಿಕಾನ್, ಸಿಲಿಕಾನ್ ಜೆಲ್, ಸಿಲಿಕಾನ್ ಟೆಟ್ರಾಕ್ಲೋರೈಡು, ಸೋಡಿಯಂ ಸಿಲಿಕೇಟ್ ಉತ್ಪಾದನೆ; ಸೋಪು, ಬಣ್ಣೊಲು, ಫೈಬರ್ ಆಪ್ಟಿಕ್ಸ್ ಇತ್ಯಾದಿ ಉತ್ಪಾದನೆಲೆಗ್ .
  • ಕಟ್ಟುನ ಕೆಲಸೊಲೆಗ್- ತುಕ್ಕು ನಿರೋಧಕ, ಶಿಥಿಲ ನಿರೋಧಕ ವಿಶಿಷ್ಟ ರಾಸಾಯನಿಕೊಲೆನ ಉತ್ಪಾದನೆಗ್.
  • ಬಣ್ಣೊಲು(Paints ), ಪೊದಿಕೆಲು (Coatings) ಉತ್ಪಾದನೆ
  • ಪಿಂಗಾಣಿಲು (Ceramics) ಬೊಕ ಉಷ್ಣನಿರೋಧಕೊಲು (Refractories)
  • ಜಲಶೋಧ (Filtering) ಬೊಕ ಜಲಶುದ್ಧೀಕರಣ
  • ಗೊಬ್ಬುನ ಮೈದಾನೊಲೆಗ್ ಸಹಜ ಬೊಕ ಕೃತಕ ಮೇಲಮೆಯಿ (turf) ತಯಾರಿಕೆಗ್
  • ಪೆಟ್ರೋಲಿಯಂ ಬೊಕ ನೈಸರ್ಗಿಕ ಅನಿಲ ಉತ್ಪಾದಕ ಉದ್ದಿಮೆಡ್.

ಪೊಯ್ಯೆ ಗೆಪ್ಪುನ ಉದ್ಯಮ[ಸಂಪೊಲಿಪುಲೆ]

ಪೊಯ್ಯೆ ಕಟ್ಟುನ ಕೆಲಸೊಲೆಗ್ ಅಗತ್ಯ ಉಪ್ಪುನ ವಸ್ತು ಅಯಿನ ಕಾರಣ ತುದೆತ ಪೊಯ್ಯೆ ಗೆಪ್ಪುನ ಗಣಿಗಾರಿಕೆ ಲೆಗ್ ಬಾರಿ .ಬೇಡಿಕೆ ಉಂಡು.

ಮಲ್ತಿನ ಪೊಯ್ಯೆ (ಎಂ- ಸ್ಯಾಂಡ್)[ಸಂಪೊಲಿಪುಲೆ]

ಶಿಲೆಕಲ್ಲು ಲೆನ್ ಕ್ರಷರ್ ಡು ಪೊಡಿ ಮಲ್ತ್ ದ್ ಪೊಯ್ಯೆದ ಕಣಕುಲೆನ್ ಉತ್ಪಾದನೆ ಮಲ್ಪರೆ ಆಪುಂಡು. ಇಂಚ ಕೃತಕವಾದ್ ತಯಾರು ಮಲ್ತಿನ ಪೊಯ್ಯೆಗ್ ಎಂ ಸ್ಯಾಂಡ್ (M sand - Manufactured sand) ಇನ್ಪಿನ ಪುದರುಂಡು. ತುಳುಟು M sand ಗು ಮಲ್ತಿನ ಪೊಯ್ಯೆ ಇಂದ್ ಪಣೋಲಿ.

ಉಂದೆನ್ಲಾ ತೂಲೆ[ಸಂಪೊಲಿಪುಲೆ]

ಉಲ್ಲೇಕೊ[ಸಂಪೊಲಿಪುಲೆ]

1. http://www.selectsandscorp.com/what-is-silica-sand/

2.http://www.amd.gov.in/app16/content.aspx?link=41

3.https://en.wikipedia.org/wiki/Dune

"https://tcy.wikipedia.org/w/index.php?title=ಪೊಯ್ಯೆ&oldid=76188"ಡ್ದ್ ದೆತ್ತೊಂದುಂಡು