ಆಟಿ ಕುಲ‍್ಲರೆ ಪೋಪಿನಿ

ಆಟಿ ತಿಂಗೋಳು ತುಳುನಾಡ್ ದಕಲೆಗ್ ಮಸ್ತ್ ಕಷ್ಟಕರವಾಯಿನ ಕಾಲವಾದು ಇತ್ತುಂಡು.ಆಂಡಾ ಕಾಲಘಟ್ಟ ಬದಲಾದ್ ಬಡೊತನ, ರೋಗರುಜಿಲು ಕಡಿಮೆಯಾಂಡ್, ತುಳುನಾಡ್ ಬದಲಾಂಡ್. ಆಂಡಾಲಾ ಹಿರಿಯೆರ್ ಉಂಡು ಮಂದಿನ ಆಟಿದೊ ಕೆಲವು ಕಟ್ಟು ಕಟ್ಟಾಲೆಲು ಇತ್ತೆಲಾ ತುಳುಜನಕುಲು ಪಾಲನೆ ಮಂತೊಂದು ಉಲ್ಲೆರ್. ಅಂಚಿನ ಒಂಜಿ ಕಟ್ಟ್ ಆಟಿ ಕುಲ‍್ಲರೆ ಪೋಪಿನಿ ಅತ್ತುಡಾ ಆಟಿ ಕುಲ್ಲುನು ಅತ್ತುಡಾ ಆಟಿ ಕುಲ್ಲುನೆ.

ಆಟಿ ಕುಲ‍್ಲರೆ ಪೋಪಿನಿ

ಆಟಿ ಕುಲ‍್ಲರೆ ಪೋಪಿನಿ ಅತ್ತುಡಾ ಆಟಿ ಕುಲ್ಲುನು ಅತ್ತುಡಾ ಆಟಿ ಕುಲ್ಲುನೆ ಪಂದ್ ಪನ್ಪುನ ಮದಿಮೆ ಆತಿನ ಪೊಣ್ಣನ್ ಒಂಜಿ ತಿಂಗೊಳು ಕಾರ ಬಚ್ಚೆಲ್‌‍ಗಾತ್ ಅಪ್ಪೆ ಇಲ್ಲಗ್ ಕಡಪುಡುನ ಒಂಜಿ ಕ್ರಮೊ.

ಆಶಯ

ಆಟಿ ಕುಲ್ಲುನೆ ತುಳುನಾಡುದ ಆಟಿ ತಿಂಗಳೊದ ಅನನ್ಯವಾಯಿನ ಒಂಜಿ ಪರಂಪರೆ, ಪಿರಾಕುದ ಸಂಪ್ರದಾಯ. ಆಟಿ ತಿಂಗೊಳುಡು ಕೀರ್ ಕಟ್ಟುದು ಬರ್ಸ‌ ಬರೊಡು ದುಂಬು, ಬೇಸಾಯೊದ ಅವೇತೋ ಕೆಲಸೊಲೆನ್ ಪೂರಾ ಮುಗಿಪಾದ್. ದೇಹೋಗ್ ಆಯಿನ ಧಣಿವುನು , ಆಯಾಸನ್ ಪರಿಹಾರ ಮನ್ಪರೆ , ಅಪ್ಪೆ ಇಲ್ಲಡ್ ಒಂಜಾತ್ ವಿಶ್ರಾಂತಿ ಮನ್ಪಾಡ್ ಪನ್ಪಿನ ಆಶಯಲಾ ಆದುಪ್ಪು.

ಶುಭ ಕಾರ್ಯೊಲು

ಪೊಸ ಕಂಡನಿ ಬೊಡೆದಿಲು ಲಾ ಒಟ್ಟುಗು ಉಪ್ಪಂದಿನ ಈ ಕಾಲೊಡು ಪಂಡಾ ಈ ಆಟಿ ತಿಂಗೊಳುಡು ಎಡ್ಡೆ , ಶುಭ ಕಾರ್ಯೊಲು ಪೂರಾ ಆಪುಜಿ. ಮದಿಮೆ ,ತಮ್ಮನ , ಪರ್ಬ , ಉತ್ಸವ ಪೂರಾ ಕಜ್ಜೊಗುಲಾ ಒಂಜಿ ತಿಂಗೊಳುದ ಮಟ್ಟ್ ಗ್ ವಿರಾಮನೇ ಸರಿ. ಬರ್ಸದ ಕಾರಣೊ ಅಂಚಿ ಇಂಚಿ ಬಲ್ಪರೆ ಕಷ್ಟ. ಒಂಜಿ ಕಾಲೊಡು ಸಾರಿಗೆ ಸಂಪರ್ಕನೇ ಉಪ್ಪಂದಿನ ಸಂದರ್ಭೊಡು ಸೇತುಮೆ , ಪಾಂಪು ಸೌಲಭ್ಯೊಲು ಉಪ್ಪಂದಿನ ಕಾಲಘಟ್ಟೊಡು ಒಂಜಿ ದಿಕ್ಕುಡ್ದು ಕೂಡೊಂಜಿ ದಿಕ್ಕುಗು ಪೋಪಿನ ಒಂತೆ ಅಪಾಯಕಾರಿ ಪನ್ಪಿನ ದೃಷ್ಟಿಡು ಉಂದು ಮುಂಜಾಗ್ರತೆದ ಪರಿಕಲ್ಪನೆಲಾ ಆದುಪ್ಪು.