ಒಡಿಶಾ
ಒಡಿಶಾ (೨೦೧೧ ಮುಟ್ಟ ಇತ್ತಿನ ಪುದರ್ ಒರಿಸ್ಸಾ) ಪೂರ್ವ ಭಾರತೊದ ಒಂಜಿ ರಾಜ್ಯೊ. ಉಂದೆತ ರಾಜಧಾನಿ ಭುವನೇಶ್ವರ. ಇಸ್ತೀರ್ನೊದ ಲೆಕ್ಕ ಪತ್ತಿಂಡ, ನಮ ದೇಸೊದ ೮ನೇ ಮಾಮಲ್ಲ ರಾಜ್ಯವಾದ್ ಉಂಡು. ಜನಸಂಖ್ಯೆದ ಲಕ್ಕೊಡು ೧೧ನೇ ಮಲ್ಲ ರಾಜ್ಯ. ಒಡಿಶಾದ ಬಡಕಾಯಿಡ್ ಝಾರ್ಖಂಡ್ ಬುಕ್ಕ ಪಶ್ಚಿಮ ಬಂಗಾಳ, ಪಡ್ಡಾಯಿಡ್ ಛತ್ತೀಸ್‌ಗಢ, ಅಂಚನೆ ತೆಂಕಾಯಿಡ್ ಆಂಧ್ರ ಪ್ರದೇಶ ರಾಜ್ಯೊಲು ಉಲ್ಲ. ನಮ ದೇಸೊಡು ಪರಿಶಿಷ್ಟ ಪಂಗಡದ ಜನೊಕುಲು ಎಚ್ಚ ಇಪ್ಪುನ ರಾಜ್ಯೊಲೆಡ್ ಒಡಿಶಾಗ್ ೩ನೇ ಸ್ತಾನೊ ಉಂಡು[೧]. ಒಡಿಶಾ ರಾಜ್ಯೊಗು ೪೮೫ ಕಿಲೋಮೀಟರ್ ಉದ್ದದ ಕಡಲ ಬರಿಲಾ ಉಂಡು. ಒಡಿಯಾ ಈ ರಾಜ್ಯೊದ ಅಧೀಕೃತವಾಯಿನ ಬಾಸೆ ಆದುಂಡು. ಪುರಾತನ ಕಾಲೊಡು ಈ ರಾಜ್ಯೊಗು ಉತ್ಕಲ ಪನ್ಪಿನ ಪುದರ್ಲಾ ಇತ್ಂಡ್.
ನಮ ದೇಸೊನು ಬ್ರಿಟೀಷೆರ್ ಆಳೊಂದು ಇಪ್ಪುನ ಪೊರ್ತುಡು, ಒಡಿಯಾ ಬಾಸೆ ಪಾತೆರುನ ಜನೊಕುಲು ಇಪ್ಪುನ ಬಿಹಾರ ಬುಕ್ಕ ಒರಿಸ್ಸಾ ಪ್ರಾಂತ್ಯೊದ ಜಿಲ್ಲೆಲೆನ್ ಬೇತೆ ಮಲ್ತ್‌ದ್ ೧ನೇ ಎಪ್ರಿಲ್ ೧೯೩೬ನೇ ಇಸವಿಡ್ ಒರಿಸ್ಸಾ ರಾಜ್ಯೊನು ಉಂಡು ಮಲ್ತೆರ್. ಅಂಚಾದ್ ಒಡಿಶಾ ರಾಜ್ಯೊಡು ಪ್ರತೀ ವರ್ಸೊ ಎಪ್ರಿಲ್ ೧ನೇ ತಾರೀಕ್ ಉತ್ಕಲ ದಿಬಸ/ಒಡಿಶಾ ದಿನ ಪಂದ್ ಆಚರಿಸಾವೆರ್[೨]. ೧೯೪೮ನೇ ಇಸವಿ ಮುಟ್ಟ ಕಟಕ್ ಈ ರಾಜ್ಯೊದ ರಾಜಧಾನಿ ಆದಿತ್ತ್ಂಡ್. ಒಡಿಶಾ ರಾಜ್ಯೊದ ಒಟ್ಟು ಇಸ್ತೀರ್ನ ೧,೫೫,೭೦೭ ಕಿಲೋಮೀಟರ್೨. ಅಂಚನೆ ೨೦೧೧ನೇ ಇಸವಿದ ಕಾನೇಸ್ಮಾರಿಡ್ ತೆರಿಲೆಕ್ಕ ಈ ರಾಜ್ಯೊದ ಒಟ್ಟು ಜನಸಂಖ್ಯೆ ೪೧,೯೭೪,೨೧೮.
ಪುದರ್‌ದ ಮೂಲ[ಸಂಪೊಲಿಪುಲೆ]
ಒಡಿಶಾ ಪುದರ್‌ದ ಮೂಲ ಓಢ ವಿಷಯ (ವಿಷಯ ಪನ್ನಗ ದುಂಬುದ ಕಾಲೊಡು ಚಾಲ್ತಿಡ್ ಇತ್ತಿನ ಆಡಳಿತ ವಿಭಾಗೊ) ಪನ್ಪೆರ್. ಈ ಸಬ್ದೊ ಪ್ರಾಕೃತ ಬಾಸೆದವು. ೧ನೇ ರಾಜೇಂದ್ರ ಚೋಳ ಅರಸೆ ಬರೆಪಾದಿನ, ಕ್ರಿ.ಶ. ೧೦೨೫ನೇ ಇಸವಿದ ತಿರುಮಲೈ ಸಾಸನೊಡು ಈ ಸಬ್ದೊ ಉಂಡು[೩]. ಅಂಚನೆ ಪುರಿ(ಒಡಿಶಾ ರಾಜ್ಯೊದ ಒಂಜಿ ಪೇಂಟೆ)ತ್ತ ದೇವಸ್ತಾನೊಲೆ ಗೋಡೆಡ್ ಕೆತ್ತದಿನ ಸಾಸನೊಲೆಡ್ ಈ ರಾಜ್ಯೊನು ಒಡಿಶಾ/ಒಡಿಶಾ ರಾಜ್ಯೊ ಪಂದ್ ಲೆತ್ತ್‌ದೆರ್[೪].
ಉಲ್ಲೇಕೊ[ಸಂಪೊಲಿಪುಲೆ]
- ↑ "ST & SC Development, Minorities & Backward Classes Welfare Department:: Government of Odisha". stscodisha.gov.in. Archived from the original on 1 September 2018. Retrieved 10 December 2018.
- ↑ "Utkala Dibasa hails colours, flavours of Odisha". The Times of India. 2 April 2014. Archived from the original on 8 July 2015. Retrieved 1 February 2015.
- ↑ Patel, C.B (April 2010). Origin and Evolution of the Name ODISA (PDF). Bhubaneswar: I&PR Department, Government of Odisha. pp. 28, 29, 30. Archived from the original (PDF) on 19 June 2015. Retrieved 19 June 2015.
- ↑ Pritish Acharya (11 March 2008). National Movement and Politics in Orissa, 1920–1929. SAGE Publications. p. 19. ISBN 978-81-321-0001-0. Archived from the original on 5 January 2016. Retrieved 3 February 2015.