ಗೊಂಬೆ ದೇರೂನಿ

ಆಟಿ ತಿಂಗೊಳ್ ಪನ್ನಗ ತುಳುವೆರೆನ ಆಚರಣೆಡ್ ಕಪ್ಪು ತಿಂಗೊಳ್. ಈ ತಿಂಗೊಳ್ ಡ್ ಒವ್ವೇ ಎಡ್ಡೆ ಕಾರ್ಯೊಲು ನಡಪೆರೆ ಇಜ್ಜಿ. ಆಟಿಡ್ ಊರೊರ್ಮೆ ಕೀರಿ ಕೂಟ ಬರ್ಸ. ದುಂಬುದ ಕಾಲೊಡು ಕಾಲರಾ, ನೀರುಕೋಟ್ಲೆ, ದೇವೆರ್ ಬಂಗರ್ ಪಾಡುನಿ ಪನ್ಪಿಂಚಿ ಸೀಕುಲಲೆಡ್ದ್ ಆಟಿ ತಿಂಗೊಳುಡು ಜನಕುಲು ಕಂಗಾಲ್ ಆವೊಂದಿತ್ತೆರ್. ಆ ಕಾಲೊಡು ಇಂಚಿತ್ತಿ ಸೀಕುಲು ಬರಂದಿಲೆಕ್ಕೊ ತಡೆಗಟ್ಟುನ ವ್ಯವಸ್ಥೆ ಇಜ್ಜಾಂಡ್. ಇಂಚಿತ್ತಿ ನಾನಾ ನಮೂನೆದ ಸೋಂಕುಲು ಬತ್ತ್ಂಡ 'ಅಪ್ಪೆ ಮಾರಿಯಮ್ಮಗ್ ಕೋಪ ಬೈದ್ಂಡ್. ಕೋಪೊನು ಶಾಂತ ಮಲ್ಪೊಡು' ಪಂಡ್ದ್ ಊರುದಕುಲು ಲಕ್ದ್ ಕಾರ್ಯ ಪ್ರವೃತ್ತರಾವೊಂದು ಕೆಲವೊಜಿ ವಿಧಾನೊಡು ಆಚರನೇ ಮಲ್ತೊಂದಿತ್ತೆರ್. ಅಯಿಟ್ ಒಂಜಿ ವಿಧಾನೊನೆ ಗೊಂಬೆ ದೇರೂನಿ.

ಗೊಂಬೆ ದೇರೂನ ಕ್ರಮೊ

ಗೊಂಬೆ ದೇರೂನ ಕ್ರಮ ಮಲ್ಪರೆ ಬೋಡಾದ್ ಮರತ ಆಚಾರಿಲೆಡ ಮಾರಿ ದೇವಿ ರೂಪದ ಗೊಂಬೆಲೆನ್ ಮರೊಡ್ದೇ ಕೆತ್ತಾವೊಂದಿತ್ತೆರ್. ರಾತ್ರಿ ಆಯಿ ಬೊಕ್ಕ ಮಾರಿಗುಡಿಟ್ಟ್ ದೈವದ ಪಾತ್ರಿಗ್ ಆವೇಶ ಬರ್ಪಾದ್ ಊರುದ ಗಡಿ ಪ್ಪದೇಶ ಮುಟ್ಟ ಮೆರವಣಿಗೆಡ್ ಬರ್ಪೆರ್. ಅವುಲು ನೆತ್ತೆರ್ ದ ಬಲಿ ಕೊರ್ದ್, ಮರತ ಗೊಂಬೆಲೆನ್ ಊರುದ ಗಡಿ ಕಡಪಾದ್ ಬುಡ್ದ್ ಬರೊಂದಿತ್ತರ್. ಇಂಚ ಮಲ್ತ್ಂಡ ಆ ಊರುಗು ಬತ್ತಿದಿತ್ತಿನ ಕುತ್ತು ಪರಿಹಾರ ಆಂಡ್ ಪಂಡ್ದ್ ನಂಬೊದಿತ್ತೆರ್.

ಊರುರ್ದ್ ಕಡಲ್‌ಗ್

ಈ ಸಂಗತಿ ಮನದಾನಿ ಬರಿತ ಊರುಗು ಗೊತ್ತಾವೊಂದಿತ್ಂಡ್. ಬರಿತ ಊರುದಕುಲು ಅ ದಿನೊ ಅಕ್ಲೆನ ಊರುಡು ಉಂದೇ ಕ್ರಮೊಟು ಮಾರಿ ಗಿಡೆತ್ತ್ ದ್ ಗೊಂಬೆಲೆನ್ ಕುಡೊಂಜಿ ಊರುದ ಗಡಿಕ್ ಸಾಗವೊಂದಿತ್ತರ್. ಇಂಚೆನೆ ಗೊಂಬೆಲೆನ್ ಊರುರ್ದ್ ಊರುಗು ಸಾಗಾದ್ ಕಡಲ್ ಗ್ ಸೇರಾವೊಂದಿತ್ತೆರ್.

ತುಳುನಾಡ್ ಡ್ ಆಚರಣೆ

ತುಳುನಾಡ್ ದ ಮಾರಿಗುಡಿಕುಲೆಡ್ ಇತ್ಲೆಲಾ ಮಾರಿಪೂಜೆ ಗೌಜಿಡ್ ನಡಪುಂಡು. ಕುಡ್ಲದ ಬೋಳಾರ, ಉರ್ವ, ಸುರತ್ಕಲ್, ಉಡುಪಿ, ಕಾಪು, ಕಾರ್ಕಳೊಡು ಉಪ್ಪುನ ಮಾರಿಯಮ್ಮನ ದೇವಸ್ಥಾನೊಲೆಡ್ ಆಟಿ ಬೊಕ್ಕ ಸುಗ್ಗಿ ತಿಂಗೊಳುಡು ನಡಪುನ ಮಾರಿಪೂಜೆಗ್ ಸುತ್ಮುತ್ತಲ್ದ ಪತ್ತೂರ್ದ ಜನಕುಲು ಕೋರಿ, ಕುರಿ ಪರಕೆ ಕನತ್ತ್ ದ್ ಬಲಿಕೊರ್ಪೆರ್.