ನಾಯಿ

ಲಾಬ್ರಡಾರ್ ರಿಟ್ರೀವರ್ ಪನ್ಪಿನ ಜಾತಿದ ಒಂಜಿ ನಾಯಿ

ನಾಯಿ ಇಲ್ಲಲ್ ಸಾಂಕುನಂಚಿನ ತೋಳ ಜಾತಿಗ್ ಸೇರ್ದಿನ ಒಂಜಿ ಪ್ರಾಣಿ. ನರಮಾನಿನ ಇತಿಹಾಸೊಡು ಮಸ್ತ್ ಸಮಯ ಮುಟ್ಟ ಕೆಲಸೊಲೆಗಾದ್ ಅಂಚೆನೆ ತಾಂಕನದ-ಪ್ರಾಣಿಯಾದ್ ಉಪಯೋಗೊಡು ಉಪ್ಪುನಂಚಿನ ಒಂಜಿ ಪ್ರಾಣಿ ಉಂದು. ನಮ್ಮ ವಿಸ್ವಾಸೊಡು ಒಟ್ಟು ೧೦೦೦ ಮಿಲಿಯನ್ ನಾಯಿಲು ಉಂಡು. ನಾಯಿಗ್ ಲಾಟಿನ್ ಬಾಷೆಡ್ 'ಕಾನಿಸ್' ಪನ್ಪೆರ್.

ಸಾಂಕನದ ಪಿರಾನಿ

ನಾಯಿ ಬೊಕ್ಕ ನರಮಾನಿನ ನಡುಟು ಉಪ್ಪುನ ಸಮ್ಮಂದ ಸಾಂಕುನ ಪ್ರಾಣಿಯಾಯಿನ ನಾಯಿಗ್ ತುಚ್ಚುನ ಬುದ್ಧಿಲಾ ಉಂಡು. ದಾಯೆ ಪಂಡ ನಾಯಿ ತೋಳ ಜಾತಿಗ್ ಸೇರ್ದಿನ ಪ್ರಾಣಿ. ಆಂಡ ನಾಯಿ ಅಯಿತ ದೊಸ್ತಿ ಬೊಕ್ಕ ಯಜಮಾನಿ ಅಯಿನ ನರಮಾನ್ಯಗ್ ದಾಲ ಮಲ್ಪುಜ್ಜಿ. ದನಿ ಕೊರ್ಪಿನ ಮಾತ ಆಜ್ಞೆನ್ ನಾಯಿ ಕೇಂಡೊಂದು ಪರಿಪಾಲನೆ ಮಲ್ಪುಂಡು.

ಇಲ್ಲದ ನಾಯಿಗ್‍ಲಾ ಕಾಟ್ ನಾಯಿಗ್‍ಲಾ ಮಸ್ತ್ ವ್ಯತ್ಯಾಸ ಉಂಡು.

Swimming dog bgiu

ನಾಯಿದ ಜಾತಿಲು

1. ಅಕಿತಿ ಇನು
2. ಅಕ್ಬಾಶ್
3. ಅಫ್ಫೆನ್ಪಿಶರ್
4. ಅಫ್ಗನ್ ಹೌಂಡ್
5. ಆಲ್ಫಿನ್ ಸ್ಪಾನಿಯಳ್
6. ಅಮೇರಿಕನ್ ಅಕಿತ
7. ಕಣ್ಣಿ
8. ಕೊಂಬೈ
9. ಗೋಲ್ಡನ್ ರಿಟ್ರೈವರ್
10. ಚಿಪ್ಪಿ ಪಾರೆಯ್
11. ಜರ್ಮ್ನನ್ ಶೆಫೆರ್ಡ್
12. ಪಮೇರಿಯನ್
13. ಬಾಕ್ಸರ್
14. ಬೀಗಲ್
15. ಬುಲ್ಡಾಗ್
16. ಭಾರ್ಬೆಟ್
17. ಮುಧೋಳ ನಾಯಿ
18. ಯಾರ್ಕ್ಷೈರ್ ಟೆರಿಯರ್
19. ರಾಜ ಪಾಳಯಮ್
20. ರಾಂಪುರ
21. ಲ್ಯಾಬ್ರಡಾರ್ ರಿಟ್ರೈವರ್
22. ಊರುದ ನಾಯಿಲು/ಕಾಟ್ ನಾಯಿಲು
23. ನೀರ್ನಾಯಿ

ಅನುಕೂಲೊಲು

• ಇಲ್ಲೊಗು ಕಲ್ವೇರ್ ಬರಂದಿಲೆಕ ರಕ್ಷಣೆ ಕೊರ್ಪುಂಡು
• ಏರ್ ಇಲ್ಲಗ್ ಬರ್ಪುಂಡಲಾ ಕೊರೆಪ್ಪುನ ಸ್ವರಟ್ಟ್ ಇಲ್ಲದಕ್‍ಲೆಗ್ ತೆರಿಪಾವುಂಡು
• ಇಲ್ಲ್ ಕಾಪುನ ಬೇಲೆ ಮಲ್ಪುಂಡು
• ಯಾಜಮಾನನ ಪಾತೆರನ್ ಕೇನುಂಡು
• ಕೆಲವು ನಾಯಿಲು ಯಾಜಮಾನಗಾದ್ ಜೀವ ಕೊರ್‍ನಲಾ ಉಂಡು

ನಂಬೋಲಿಗೆಲ್

• ಬ್ಯಾರಿಲ್ ನಾಯಿನ್ ಪತ್ತ್ಂಡ ಏಲ್ ಸರ್ತಿ ಮೀಯೊಡು.
• ಬತ್ತಿ ನಾಯಿ ಇಲ್ಲಡ್ ಉಂತೆರೆ ಬಲ್ಲಿ.
• ಕನಟ್ ಕರಿಯ ನಾಯಿ ತೋಜಿಂಡ ಸಾವು ಕೈತಲ್ ಉಂಡು ಅತಂಡ ಕೆಲವು ದೈವೊಲೆ ಪರಕೆ ಬಾಕಿ ಉಂಡು ಪಂದ್ ಪನ್ಪೆರ್.
• ನಾಯಿಗ್ ಕತ್ತಲೆಗ್ ಅಜನೆ ಜಾಸ್ತಿಗೆ. ಆಯಿಟ್ಲಾ ಬೊಗ್ಗಿಲೆಗ್ ಬೇಗ ಅಜನೆಆಪುನ ಗೊತ್ತು ಆಪುನೆಗೆ.
• ಮಸನದ ಬರಿ, ಕೆಲವು ಜಾಗೆಲೆಡ್ ತಾದಿ ತಪ್ಪವುನ ಪಿಶಾಚಿಲ್ ನಾಯಿದ ಒರುಟು ಅಡ್ಡ ಬರ್ಪ ಪನ್ಪಿ ನಂಬಿಕೆಲಾ ತುಳುವೆರೆಡ ಉಂಡು.

ನಾಯಿದ ಬಗೆಟ್ ಗಾದೆಲು

1. ನಾಯಿದ ಬೀಲ ಓಂಟೆಡ್ ಪಾಡಿಲೆಕ್ಕ.
2. ಸಸಾರ ಕೊರುಂಡ ನಾಯಿಲಾ ನೆಸಲೆ ನಕ್ಕುಂಡು/ ನಸೆ ಕೊರ್ಂಡ ನಾಯಿ ನೇಸಲೆ/ಮುಸುಂಟು ನಕ್ಕು.
3. ನಾಯಿಡ ಪಂಡ್ಂಡ ನಾಯಿ ನಾಯಿದ ಬೀಲೊಡು ಪಂಡ್ಂಡ್‌ಗೆ.
4. ನಂದೆರೆ ಬದ್ಕ್ ನಾಯಿ ತಿಂದ್‌ದ್ ಪೋಂಡು.
5. ಕಾಸಿಗ್ ಪೋಂಡಲಾ ಪಡಿಕೆ ಬನ್ನಗ ನಾಯಿ ನಾಡುನೆ ತೊಲಸ್ಯೆಟ್ಯೆನೇ.
6. ನಾಯಿದ ಬೀಲೊ ಏಪೊಲಾ ಡೊಂಕೆ.
7. ನಾಯಿ ತುಚ್ಚಿಂಡ್ ಪಂದ್ ನಾಯಿದ ಕಾರ್‌ಗ್ ತುಚ್ಚೆರೆ ಆಪುಂಡಾ..?
8. ನಾಯಿಡ ಕೇಂದ್ ಬೋಂಟೆಗ್ ಪಿದಡುನ್ನಾ?.
9. ನಾಯಿದ ಕುತ್ತೊ ಬೊಣ್ಯೊಡು ಪೋಂಡು.
10. ನಾಯಿನ್ ಗದ್ದಿಗೆ/ಪಲ್ಲೆಂಕಿ/ದಂಡಿಗೆಡ್ ಕುಲ್ಲಾಯಿಲೆಕೊ.
11. ನಾಯಿ ಸಂತೆಗ್ ಪೋಯಿಲೆಕೊ.
12. ಎದ್ರ್‌ದ ಎರ್ಮೆನ್ ತೂದು ಪಿರವುದ ಬೊಗ್ಗಿ ತೆಲಿತ್ಂಡ್‌ಗೆ.
13. ರಾಜಬೀದಿಡ್ ಸಾಗುನ ಆನೆನ್ ತೂದು ನಾಯಿ ಕೊರೆತಿಲೆಕೊನೆ ಆನೆ ತಿರ್ಗ್‌ದ್ ತೂವಂದೆ ಪೋಂಡು.
14. ವಿನಯ ದಾಂತಿನ ವಿದ್ಯೆ ನಾಯಿದ ಮಿರೆತ್ತ ಪೇರ್‌ಗ್ ಸಮೊ.
15. ನಾಯಿ ಕೊರೆತ್ಂಡ ದೇವಲೋಕೊ ಹಾಳಾವಾ.
16. ನಾಯಿದ ಮಿರೆಟ್ಟ್ ಕೊಂಡೆ ಪೇರ್ ಇತ್ತ್ಂಡ ದಾನೆ.
17. ಐತೊ ಮಲ್ತ್ ದಂಡಿಗೆಡ್ ಕುಲ್ಲಂಡ ಚೋರು ಪೀ ತೂನಗ ನಾಯಿ ಲಾಗ್ಯಂದೆ ಕುಲ್ಲುವಾ.
18. ಕೊರೆಪುನ ನಾಯಿ ತುಚ್ಚಂದ್. ತುಚ್ಚುನ ನಾಯಿ ಕೊರೆಪಂದ್.
19. ಬತ್ತಿ ನಾಯಿ ಉಂತೆರೆ ಬಲ್ಲಿ. ಪೆದಿ ಬಾಲೆ ಬರೆಲೆರೆ ಬಲ್ಲಿ.
20. ಬತ್ತಿ ಪುಚ್ಚೆಗ್ ಮದಿಮೆದೊನಸ್ ಬತ್ತಿ ನಾಯಿಗ್ ಸಾವುದೊನಸ್.
21. ಮಡೆ ಇರೆ ನಕ್ಕೆಲಗ್ ಅಟ್ಟೆಮಿ ಆಂಡ ದಾನೆ ಗುಂಡೆಮಿಗ್ ದಾನೆ.
22. ಏಡ್‌ದ ಸಾಮಾನ್ ಬೂರುಂಡುಂದು ನಾಯಿ ಕಾತಿಲೆಕೋ.
23. ನರಮಾನ್ಯಗ್ ಒರ್ಸೊ ಇಡೀ ಬಂಜಿ ನಿಲಿಕೆ ನುಪ್ಪು ಪಾಡುನೆಡ್ದ್ ನಾಯಿಗ್ ಒಂಜಿ ದಿನೊ ತೆನಸ್ ಪಾಡುನ ಎಡ್ಡೆ.
24. ಬ್ಯಾರಿ ತಾಂಕಿ ನಾಯಿ ಟೊಪ್ಪಿ ತೂಯಿನಾಯನೊಟ್ಟುಗು ಪೋಯಿಲೆಕೊ.
25. ಪಂಡೆನೋ ಅಪ್ಪೆ ಪೆಟ್ಟ್ ತಿನುವಲ್ ಪಂಡಿಜೋ ಅಮ್ಮೆ ನಾಯಿ ತಿಂದೆ.
26. ಬೋಂಟೆಗ್ ಪೋಯಿ ಬೊಮ್ಮಿ ಬೈಜಲೇ, ನೇಸಲೆಡಿತ್ತಿ ಚುಂಗುಲಿ ಬೆರು ತಿಂದ್ಂಡೇ.
27. ನಾಯಿಗ್ ನಾಯಿ ಪಗೆ, ಜಾತಿಗ್ ಜಾತಿ ಪಗೆ.
28. ನಕ್ಕುನ ನಾಯಿಗ್ ಬಟ್ಟಲಾಂಡ ದಾನೆ ನೇಸಲೆ/ಬಿಸಲೆ ಆಂಡ ದಾನೆ.
29. ಕರಿಯ ನಾಯಿ ಬೊಳಂಗರೆದ ಪೊಯ್ಯೆಡ್ ಉರ್ದ್ಂಡ ಬೊಲ್ದು ಆವಂದ್.
30. ನಾಯಿಗ್ ಬೇಲೆ ಇಜ್ಜಿ. ಉಂತೆರೆ ಪುರ್ಸೊತಿಜ್ಜಿ.
31. ತಾನಿಪ್ಪು ಓಣಿಡ್ ನಾಯಿಯೇ ಸಿಮ್ಮ.

ನಾಯಿ - ಚಿತ್ರ ದರ್ಶಿನಿ

• 
  Two huskys in the snow
• 
  ಜರ್ಮನ್ ಶೆಫರ್ಡ್ ನಾಯಿ
• 
  White dog resting on the floor with puppies after nursing in Don Det Laos
• 
  A identity verification method very unique and reliable
• 
  Dog (Canis lupus familiaris)
• 
  Canis lupus familiaris.001 - Monfero