ಮಧೂರು

ಕಾಸರಗೋಡು ಪೇಂಟೆರ್ದ್ ಸುಮಾರ್ 7 ಕಿಲೋ ಮೀಟರ್ ದೂರೊಡು ಉಪ್ಪುನ ಈ ದೇವಸ್ಥಾನೊಡು ಶಿವ ಬೊಕ್ಕ ಗಣಪತಿ ಪ್ರಧಾನ ಮೂರ್ತಿಲು . ಮುಲ್ಪ ಸುಬ್ರಹ್ಮಣ್ಯ, ಅಯ್ಯಪ್ಪ, ದುರ್ಗಾ ಪರಮೇಶ್ವರಿನ ಗುಡಿಕುಲುಲಾ ಉಂಡು. ಉಂದು ಕಾಸರಗೋಡುದ ಪ್ರಸಿದ್ಧ ದೇವಸ್ಥಾನೊಲೆಡ್ ಒಂಜಿ.

ಚರಿತ್ರೆ

ಮಧೂರು ಮೂಲೊಡು ಮದನಂತೇಶ್ವರ (ಶಿವ) ದೇವಸ್ಥಾನ ಆದ್ಇತ್ತ್ಂಡ್ ಪಂದ್ ಸಿದ್ಧಾಂತ ಪನ್ಪುಂಡು. ಮೊಗೇರ ಸಮುದಾಯದ ಮದರು ಪನ್ಪಿ ಪೊಣ್ಣು ನರೆ ನಾಡೊಂದು ಪೋನಗ ಈ "ಉದ್ಧವ ಮೂರ್ತಿ" ಶಿವ (ಪುರುಷ ನಿರ್ಮಿತ ಮೂರ್ತಿ ಅತ್ತ್) ತಿಕ್ಕ್ಂಡ್‌ಗೆ. ಅಂಚಾದ್ ಮದರು ಪನ್ಪಿ ಪುದರ್ದ್ ಮಧೂರು ಪನ್ಪಿ ಪುದರ್ ಬತ್ತ್ಂಡ್. ಒರಿ ಆಣ್ ಬಾಲೆ ಗೊಬ್ಬೊಂದು ಉಪ್ಪುನಗ ಗರ್ಭಗ್ರಹದ ದಕ್ಷಿಣ ಗೋಡೆಡ್ ಗಣಪತಿನ ಚಿತ್ರೊನು ಬುಡ್ಪವೆಗೆ. ದಿನಕುಲು ಕರಿಲೆಕನೆ ಚಿತ್ರ ಮಲ್ಲ ಆಂಡ್. ಆ ಬಾಲೆ ಗಣಪತಿನ್ ಬೊಡ್ಡಜ್ಜ ಪಂದ್ ಲೆಪ್ಪುವೆ. ಕುಂಬಳೆ ಸೀಮೆದ ಚರಿತ್ರೆದ ಪ್ರಕಾರ ಟಿಪ್ಪು ಸುಲ್ತಾನೆ ಕೊಡಗ್, ತುಳುನಾಡು, ಮಲಬಾರ್ https://malabar.com/about ಪ್ರದೇಶೊಲೆನ್ ದಾಳಿ ಮಲ್ತ್ ಮಧೂರು ದೇವಸ್ಥಾನನ್ ಪುಡಪ್ಪೆರೆ ಬತ್ತೆಗೆ. ದೇವಸ್ಥಾನದ ಗುವೆಲ್ದ ನೀರ್ ಪರ್ನಗ ಆಯನ ಮನಸ್ಸ್ ಬದಲಾದ್ ಪಿರ ಪೋಪೆಗೆ. ಅಲ್ಪದ ಗೋಡೆಡ್ ಟಿಪ್ಪುನ ಕತ್ತಿದ ಗುರುತು ಇತ್ತೆಲಾ ಉಂಡು.

ವಿನ್ಯಾಸ

ಆ ದೇವಸ್ಥಾನ ಆನೆದ ಬೆರಿತ್ತಲೆಕೊ ತೋಜುಂಡು . ರಾಮಾಯಣದ ಕತೆತ ಕೆತ್ತನೆಲೆನ್ಲಾ ಮೂಲು ತೂವೊಲಿ. ದೇವಸ್ಥಾನದ ಎದುರುಡು ಮಧುವಾಹಿನಿ ಪನ್ಪಿ ಸುದೆ ಪರಪುಂಡು. ಸುತ್ತಲಾ ಪಚ್ಚೆ ಪಚ್ಚೆ ಉಪ್ಪುನ ಜಾಗೆಲು. ಬರ್ಸದ ಪೊರ್ತುಡು ದೇವಸ್ಥಾನದ ಉಲಾಯಿ ಸುದೆತ ನೀರ್ ಬರ್ಪುಂಡು. ಶ್ರೀ ಗಜಮುಖನ ಸೊಂಡಿಲ್ ಬಲತ್ತ ಪುಡೆಕ್ಕ್ ಬಗ್ಗ್‌ದ್ ಉಪ್ಪುನೆರ್ದ್ "ಬಲಮುರಿ ಗಣಪತಿ" ಪಂದ್ ಪ್ರಸಿದ್ದಿಯಾದ್ ಉಂಡು. ಈ ರೀತಿದ ಮೂರ್ತಿ ಬಾರಿ ಅಪರೂಪ. ಶ್ರೀ ದೇವಸ್ಥಾನ 'ಗಜಾಯ'ಡ್ ಉಂಡು ಬೊಕ್ಕ ಪಿರವುಡು ಕಲಾಕೃತಿಲು ಉಂಡು. ಗಜಾಯ ಜೀವನೊನು ಉಜ್ವಲ ಮಲ್ಪುಂಡು. ಬೊಕ್ಕ ಸರ್ವ ಶುಭನ್ ಕನಪುಂಡು. 'ಗಜಪೃಷ್ಟ' ಆಕಾರ ಪಿರಾಕ್‍ದ ಬೌದ್ಧೆರೆನ ಕಾಣಿಕೆಂದ್ ಪ್ರತೀತಿ ಉಂಡು.

ಸತ್ಯ

ಉಂದು ತುಳುನಾಡ್ದ 6 ಪ್ರಧಾನ ಗಣಪತಿ ದೇವಸ್ಥಾನೊಲೆಡ್ ಒಂಜಿ. ಬಾಕಿದ 3 ಕುಡ್ಲಡ್ ಉಂಡು . ಆನೆಗುಂಡಿ, ಇಡಗುಂಜಿ , ಹಟ್ಟಿಯಂಗಡಿ, ಗೋಕರ್ಣ . ಬೇಸಗೆ ರಜೆತ್ತ ಪೊರ್ತುಡು ವೇದ ಪಾರಾಯಣದ ತರಬೇತಿ ನಡಪುಂಡು. ಕಲ್ಪಾರ್ಥಿಲೆಗ್ ವಸತಿ ಸೌಲಭ್ಯೊಲು ದೇವಸ್ಥಾನೊದ ಲೆಕ್ಕೊರ್ದು ಕೊರ್ಪೆರ್.

ಪ್ರಾರ್ಥನೆ ಬೊಕ್ಕ ಅರ್ಪಣೆಲು

ಭಕ್ತೆರ್ ಎಚ್ಚಾದ್ ಉದಯಸ್ತಮಾನ ಪೂಜೆನ್ ಮಲ್ಪುವೆರ್. ‘ಅಪ್ಪ ಪ್ರಸಾದ’ ಮುಲ್ಪದ ಪ್ರಧಾನ ಪ್ರಸಾದ .

ದೇವಸ್ಥಾನದ ದರ್ಶನ ಸಮಯ

ಬೊಲ್ಪುಗು: ೦೫. ೦೦ - ೧೦.೩೦ ಬಯ್ಯಗ್: ೫.೩೦ - ೦೮.೦೦

ದೇವಸ್ಥಾನ ಮುಟ್ಟುನ ಸಾದಿ .

ಕಾಸರಗೋಡು ಪೇಂಟೆರ್ದ್ ಸುಮಾರ್ 7 ಕಿಲೋಮೀಟರ್ ದೂರೊಡು ಉಂಡು. ಬಸ್ ನಿಲ್ದಾಣೊರ್ದ್ ಪ್ರತಿ 5 ನಿಮಿಷೊಗು ಒಂಜಿ ಬಸ್ ಸೌಲಭ್ಯ ಉಂಡು. ಆಟೋ ರಿಕ್ಷಾ ವ್ಯವಸ್ಥೆಲಾ ಉಂಡು.