ದಾರೆ ಮಯ್ಪುನ(ಕನ್ಯಾದಾನ)
ದಾರೆ ಮಯ್ಪುನ/ಕನ್ಯಾದಾನ ಹಿಂದೂ ಮದಿಮೆಲೆಡ್ ಮದಿಮೆ ಪಂಡ ಸಂಬ್ರಮೊ. ಮುಲ್ಪ ವಿದಿ ವಿದಾನೊಲು ಮಸ್ತ್ ಇಪ್ಪುಂಡು . ನಿಸ್ಚಯ, ಮದ್ರೆಂಗಿ, ಮಂಜೊಲು ಪೂಜುನ ಶಾಸ್ತ್ರ ಇಂಚ ಸುಮಾರ್ ಸಂಪ್ರದಾಯೊಲು ಇಪ್ಪುವ. ಅವ್ವೇ ರೀತಿ ದಾರೆ ಮಯ್ಪುನ ಕ್ರಮೊ ಹಿಂದೂ ಮದಿಮೆಲೆಡ್ ಬಾರಿ ಮುಕ್ಯವಾಯಿನ ಸಂಪ್ರದಾಯೊ. ಉತ್ತರ ಬುಕ್ಕ ದಕ್ಷಿಣ ಭಾರತೊದ ಹಿಂದೂ ಸಂಪ್ರದಾಯೊಡ್ ದಾರೆ ಮಯ್ಪುನ ಕ್ರಮೊಕ್ಕ್ ಮಸ್ತ್ ಮಹತ್ವ ಉಂಡು, ಪೊಣ್ಣನ ಅಪ್ಪೆ ಅಮ್ಮೆ ಕುಸಿಟ್ಟ್ ತನ್ನ ಮಗಲೆನ ಕೈನ್ ಆಣನ ಕೈತ್ತ ಮಿತ್ತ್ ದೀದ್ ದಾರೆ ಮಯ್ಪವೆರ್. ನನ ದುಂಬಗ್ ಅಪ್ಪೆ ಅಮ್ಮೆನ ಸ್ತಾನೊಡ್ ಉಂತುದು ಕಂಡನೆ ಆಯಿನ ಈಯೆ ಮಗಲೆನ್ ತುವೊನೊಡು ಪನ್ಪಿನವೆನ್ ಸಂಪ್ರದಾಯೊದ ಮೂಲಕ ಪನ್ಪಿನ ವಿದಾನೊನೇ ದಾರೆ ಮಯ್ಪುನ ಕಿರಮ. ಅಪ್ಪೆ ಅಮ್ಮೆ ಇಜ್ಜಾಂದಿನ ಪೊಣ್ಣುಲೆಗ್ ಕುಟುಮದ ಪಿರಿಯಕುಲು ಏರ್ಲಾ ದಾರೆ ಮಯ್ಪೊಲಿ.
ದಾರೆ ಮಯ್ಪುನ ಕಿರಮ ಸುರು ಆಯಿನಿ ಏಪ?
[ಸಂಪೊಲಿಪುಲೆ]ಶಾಸ್ತ್ರೊದ ಪ್ರಕಾರ ದಾರೆ ಮಯ್ಪನ/ಕನ್ಯಾದಾನೊದ ಕಿರಮ ಪ್ರಜಾಪತಿ ದಕ್ಷನ ಕಾಲೊಡ್ ಸುರು ಆತ್ಂಡ್ ಪನ್ಪೆರ್. ತನ್ನ 27 ಕನ್ಯೆರೆನ್ ಚಂದ್ರ ದೇವೆರೆಗ್ ಮದಿಮೆ ಮಲ್ತ್ದ್ ಕೊರ್ಪಿನ ಸಂದರ್ಬೊಡ್ ಕನ್ಯಾದಾನೊದ ಕಿರಮ ಸುರು ಆಂಡ್ ಪನ್ಪಿನ ನಂಬುಗೆ ಉಂಡು. ಅವ್ವೇ 27 ಕನ್ಯೆರ್ ಇರ್ವತ್ತೇಲ್ ಬೊಲ್ಲಿಲಾದ್ ಉಲ್ಲ ಪನ್ಪೆರ್. ಆ ದಿನೊರ್ದ್ ಕನ್ಯಾದಾನ ಅತ್ತ್ಂಡ ದಾರೆ ಮಯ್ಪುನ ಶಾಸ್ತ್ರ ಸುರು ಆಂಡ್. [೧]
ದಾರೆ ಮಯ್ಪುನ ಕಿರಮ
[ಸಂಪೊಲಿಪುಲೆ]ಬ್ರಾಹ್ಮ ವಿವಾಹೊದ ಪ್ರಕಾರ ಒಂಜಿ ಕಂಚಿದ ತಟ್ಟೆದ ಮಿತ್ತ್ ಮದಿಮಾಯನ್ ಕೈದೀದ್ ಅವೆತ್ತ್ ಮಿತ್ತ್ ಮದಿಮಾಲೆನ ಕೈ ದೀದ್ ಅಡೀಟ್ ಪೊಣ್ಣನ ಅಮ್ಮೆನ ಕೈದೀದ್ ಅವೆತ್ತ ಮಿತ್ತ್ ದುಂಬೇ ಅಬಿಮಂತ್ರಿಸಾಯಿನ ಕಲಸೊದ ನೀರ್ನ್ ಪೊಣ್ಣನ ಅಪ್ಪೆ ಕೈತ್ತ ಮಿತ್ತ್ ಮೈಯ್ಪುವೆರ್. ಉಂದೆಕ್ಕ್ ದಾರೆ ಮಯ್ಪುನು ಪಂಡ್‍ದ್ ಪನ್ಪೆರ್. ಈ ವಿದಿತ್ತೊ ಪ್ರಕಾರ ಪೊಣ್ಣನ ಅಮ್ಮೆ ದರ್ಮ, ಅರ್ತ, ಕಾಮ ಬುಕ್ಕ ಮೋಕ್ಷದ ಮಾರ್ಗೊಡ್ ಮಗಲೆನ್ ಜವಾಬ್ದಾರಿಡ್ ತುವೊನ್ಲಾ ಪಂಡ್‍ದ್ ಆಣಗ್ ಪೊಣ್ಣನ್ ಒಪ್ಪಿಸಾವೆರ್.[೨]
ದಾರೆ ಮಯ್ಪುನ ದಾಯೆ?
[ಸಂಪೊಲಿಪುಲೆ]
ಕನ್ಯಾದಾನ ಪದೊತ್ತ ಅರ್ತ - ಕನ್ಯಾ ಪಂಡ ಪೊಣ್ಣು, ದಾನ ಪಂಡ್‍ಂಡ ದಾರೆ ಮಯ್ಪುನು ಪಂಡ್‍ದ್. ಸನಾತನ ಸಂಪ್ರದಾಯೊದ ಪ್ರಕಾರ, ಮದಿಮಾಯೆ ವಿಷ್ಣುನ ಅವತಾರ ಆಂಡ, ಮದಿಮಾಲ್ ಮಹಾಲಕ್ಷ್ಮಿನ ಅವತಾರ. ಪುಟ್ಟುರ್ದಿಂಚಿ ತಾನ್ ಸಾಂಕಿನ ಪೊಣ್ಣು ಬಾಲೆನ್ ಬಂದು ಮಿತ್ರೆರೆನ ಸಮುಕ್ಕೊಡ್ ಮದಿಮಾಯನ ಕೈಟ್ ತನ್ನ ಮಗಲೆನ ಕೈ ದೀದ್ ಗಂಗಾ ಜಲನ್ ಸಾಕ್ಷಿಯಾದ್ ದಾರೆ ಮಯ್ಪುನ ಮೂಲಕ ಮರ್ಮಯಗ್ ಮಗಲೆನ ಜವಾಬ್ದಾರಿನ್ ಕೊರ್ದು ತನ್ನ ಇಲ್ಲದ ಮಹಾಲಕ್ಷ್ಮಿನ್ ಸಾಂಪ್ರದಾಯಿಕವಾದ್ ದಾರೆ ಮಯ್ಪುನ ಮೂಲಕ ಒಪ್ಪಿಸಾವೆರ್.[೩]
ನಿಯಮೊಲು
[ಸಂಪೊಲಿಪುಲೆ]ರಡ್ಡನೇ ಮದಿಮೆದ ಬಗೆಟ್ ಒಂಜಿ ವೇಳೆ ಕಂಡನಿ ತೀರಿನ ಪೊಣ್ಣು ಅತ್ತ್ಂಡ ಬೊಡೆದಿ ಸೈದಿನ ಆಣ್ ಇತ್ತ್ಂಡ ಇಂಚಿನ ಸಂದರ್ಬಡ್ ಪೊಣ್ಣಗಾವಡ್ ಆಣಗಾವಡ್ ರಡ್ಡನೇ ಮದಿಮೆ ಆವೊಡು ಪಂದಿತ್ತ್ಂಡ ಅಲ್ಪ ದಾರೆ ಮಯ್ಪುನ ಕ್ರಮೊ ಇಪ್ಪುಜಿ. ದಾಯೆ ಪಂಡ ಆಣಗಾವಡ್, ಪೊಣ್ಣಗಾವಡ್ ದಾರೆ ನೀರ್ ಜೀವಮಾನೊಡ್ ಒರ ಮಾತ್ರ ಬೂರೊಡು ಪನ್ಪಿನ ನಂಬುಗೆ ಉಂಡು. ರಡ್ಡನೇ ಮದಿಮೆಡ್ ದಾರೆ ಮಯ್ಪುನ ಕ್ರಮೊತ್ತ ಬದಲ್‍ಗ್ ಕೈ ಪತ್ತಾವುನ ಶಾಸ್ತ್ರ ಮಲ್ಪುವೆರ್. ಬೊಡದಿ ಸೈದಿನ ಆಣ್, ಕಂಡನಿ ಸೈದಿನ ಪೊಣ್ಣು ಇತ್ತೆರ್ಂಡ, ಅಕುಲೆನ್ ಒಪ್ಪಿಸಾದ್‍ ಒಟ್ಟು ಮಲ್ತ್ದ್, ಹಿರಿಯಕ್ಲೆನ್‍ ದುಂಬು ದೀವೊಂದು, ಕೈ ಪತ್ತಾದ್‍. ಕಂಡನಿ ಬುಡೆದಿ ಲೆಕ್ಕ ಮಲ್ಪಾವೆರ್. ಈ ಕೈ ಪತ್ತಾವುನ ಲೇಸ್‍ಗ್‍ ಪುರೋಹಿತೆರ್ ಬೋಡ್‍ಂದು ಇಜ್ಜಿ. ಎಚ್ಚಾದ್‍ ಈ ಲೇಸ್‍ಗ್‍ ಗುರ್ಕಾರ ನಕುಲೆನ್ ದುಂಬು ದೀದ್ ಕಾರ್ಯ ಮಲ್ಪುವೆರ್.
ಉಲ್ಲೇಕೊಲು
[ಸಂಪೊಲಿಪುಲೆ]- ↑ "ಮದುವೆಯಲ್ಲಿ ಕನ್ಯಾದಾನ ಮಾಡುವುದೇಕೆ? ನಿಮಗಿದು ಗೊತ್ತೆ..?". Asianet News Network Pvt Ltd (in ಕನ್ನಡ). Retrieved 13 February 2024.
- ↑ "ಮದುವೆಯಲ್ಲಿ ಕನ್ಯಾದಾನ ಮಾಡುವುದೇಕೆ? ನಿಮಗಿದು ಗೊತ್ತೆ..?". Asianet News Network Pvt Ltd (in ಕನ್ನಡ). Retrieved 13 February 2024.
- ↑ ಬಾಳಗಂಚಿ, ಶ್ರೀಕಂಠ (25 October 2021). "ಕನ್ಯಾದಾನ ಮತ್ತು ಅಸಹಿಷ್ಣುತೆ". ಏನಂತೀರೀ? Enantheeri? (in ಇಂಗ್ಲಿಷ್). Retrieved 13 February 2024.