ಆಟಿದ ತೆನಸ್

ಆಟಿ ತಿಂಗೊಲುಡ್ ಜಾಸ್ತಿ ಬರ್ಸ ಬರ್ಪಿನೆರ್ದಾತ್ರ ಊರೊರ್ಮೆ ಪಚ್ಚೆ ಜಿಂಜಿದುಪ್ಪುಂಡು. ಜನಕುಲು ತೇವು, ತಜಂಕ್, ತಿಮರೆ ಬೇತೆ - ಬೇತೆ ನಮುನೆದ ಸೊಪ್ಪುಲೆನ್ ಅಟಿಲ್ಡ್ ಗಲಸೊನುವೆರ್. ಕುಕ್ಕು ಪೆಲಕಾಯಿದ ಕಾಲ ಆದುಂಡು. ಅಂಚಾದ್ ಆಟಿದ ವನಸ್ಸ್ ತೆನಸ್ಸ್ ಭಾರಿ ವಿಸೇಸವಾಯಿನ ಮರ್ದ್‌ದ ಸತ್ವ ಇತ್ತಿನ ದಯಿಕುಲು ತೆಗ್‌‍ರ್ದ್ ಬಂಬಾಲಾದ್ ಬಳತ್‌ದ್ ಉಪ್ಪುವ.ಆಟಿದ ಒನಸ್ಡ್ ಮಸ್ತ್ ಬಗೆಕುಲು

ತೇಟ್ಲ ಗಸಿ

ತೇಟ್ಲ ಮಲ್ಪುನೆ ಚೇವುದ ಇರೆಟ್.ತೇವುದ ಇರೆನ್ ದುಂಬುನಾನಿ ಕೋಯಿದ್ ನೆಲಟ್ ಪದ್‌ರೊಡು.ಅವ್ವ್ ಮಾತ ಬಾಡಿ ಬುಕ್ಕೊ್ ಮನದಾನಿ ಒಂಜಿ ಇರೆನ್ ದೆತೊಂದು ಒಂಜಿ ಕೋಡಿಡ್ದ್ ಗಟ್ಟಿಡೆ ಬತ್ತಿದ ಲೆಕ್ಕ ಸುತ್ತೊಂದು ಬರೊಡು. ಸುತ್ತುದಾದ್ ನಮಕ್ ತೆರಿಪುಲೆಕ್ಕ್ ಅಯಿನ್ ಒಂಜಿ ಅರ್ಕಟ್ ಪಾಡೊಡು.ಅಂಚ ಮಾತೆನ್ಲ ಮಲ್ತಿ ಬುಕ್ಕೊ ಅಯಿಕ್ ಒಂತೆ ಪೆಲತ್ತರಿ ತೊಲ್ಲ್‌ದ್ ಪಾಡ್ದ್ ಬೆಯಿಯೆರೆ ದೀವೊಡು.ಬೆಯಿದಾನಗ ಜೀರಿಗೆ, ಬೆಳ್ಳುಳ್ಳಿ, ಮೆಂತೆ,ಕೊತ್ತಂಬರಿ ಬೇಸೊಪ್ಪು,ಕುಮ್ಟೆ ಮುಣ್ಚಿ, ಉಂದೆನ್ ಮಾತ ಬಣಲೆಡ್ ಚೂರು ಎಣ್ಣೆ ಪಾಡ್ದ್ ಪೊವೊಪೊಡು ಅವೆಕ್ ಚೂರು ಪುಳಿ ಸೇರಾದ್ ಬುಕ್ಕೊ ಪಿರೆಯಿನ ತಾರಾಯಿ ಪಾಡ್ದ್ ಸಣ್ಣ ಕಡೆದ್ ಅರೆಪ್ಪು ಮಲ್ತ್‌ದ್ ಅವೆನ್ ಬೆಯಿಪಾಯಿನ ತೇಟ್ಲ ಪೆಲತ್ತರಿಗ್ ಪಾಡ್ದ್ ಎಡ್ಡೆ ಕೊದಿಪಾವೊಡು

ಉಪ್ಪಡಚ್ಚಿಲ್

ಉಪ್ಪಡಚ್ಚಿಲ್

ಕಾಯಿ ಪೆಲಕಾಯಿದ ಪಚ್ಚಿಲ್‌ನ್ ಉಪ್ಪುಡು ಪಾಡ್ಡ್ ಭರಣಿಡ್.ಇಜ್ಜಂಡ ಮಣ್ಣ್ದ ಕರಟ್ ಪಾಡ್ದ್ ದೀಪುನೆಕ್ ಉಪ್ಪಡಚ್ಚಿಲ್ಪನ್ಪೆರ್. ಮರಿಯಲದ ತೆನಸ್ ಗ್ ಉಪಯೋಗಿಸಯೆರೆ ಪಚ್ಚಿಲ್ ಹಾಳಾವಂದಿಲೆಕ ಉಪ್ಪುಡು ಪಾಡ್ದ್ ದೀವೊಂದಿತ್ತೆರ್. ಪೆಲಕಾಯಿದ ಪಚ್ಚಿಲ್ ದೆತ್ದ್ ಐತ ಪೆಲತರಿ, ಕನ್ನಿ ಪಚ್ಚಿಲ್, ಕಾವು, ಪುರ ದೆತ್ದ್ ಅಜಾತ್‌ದ್ ಉಪ್ಪುಡು ಪಾಡ್ದ್ ದೀವೊಂದಿತ್ತೆರ್. ಆಟಿದ ಬರ್ಸದ ಪೊರ್ತುಡು ಕಜಿಪುಗು ದಾಲ ಇಜ್ಜಾಂದಿನಪಗ ಅಂಚ ಪಾಡ್ದ್ ದೀನ ಪಚ್ಚಿಲ್‌ನ್ ದೆತ್ತ್‌ದ್ ಉಪ್ಪುಕಾರಿಯೆರೆ ನೀರ್‌ದ್ ಪಾಡ್ಡ್ ದೀದ್ ಉಪ್ಪು ಬುಡಿಬುಕ್ಕೊ್ ಸಣ್ಣ್ ತಿಗ್‌ರ್ದ್ ಬೈಯೆರೆ ದೀವೊಡು ಅಯಿಕ್ ಬುಕ್ಕೊ ಜೀರಿಗೆ, ಬೆಳ್ಳುಳ್ಳಿ, ಮೆಂತೆ,ಕೊತ್ತಂಬರಿ,ಬೇಸೊಪ್ಪು,ಕುಮ್ಟೆ ಮುಣ್ಚಿ, ಉಂದೆನ್ ಮಾತ ಬಣಲೆಡ್ ಚೂರು ಎಣ್ಣೆ ಪಾಡ್ದ್ ಪೊವೊಪೊಡು ಅವೆನ್ ಮಾತೆನ್ಲ ಚೂರು ಪುಳಿ ಸೇರಾದ್ ಸಣ್ಣ ಪೊಡಿ ಮಲ್ಪೊಡು ಬುಕ್ಕೊ ಪಿರೆಯಿನ ತಾರಾಯಿ ಪಾಡ್ದ್ ಚೂರು ತಿರ್ಗಾದ್ ಪೊಡಿ ಮಲ್ತ್‌ದ್ ಅವೆನ್ ಬೆರಿಪಾಯಿನ ಉಪ್ಪಡಚ್ಚಿಲ್ ಪಾಡ್ದ್ ಪೊರ್ಲು ಮಗ್ತ್‌ದ್ ಪಸೆ ಆಜಿನೆ ಮುಟ್ಟ ದಿಕ್ಕೆಲ್‌ಡ್ ದೀಂಡ್ ಉಪ್ಪಡಚ್ಚಿಲ್ ಅಜಾಯಿನ ತಯಾರಾಪುಂಡು

ಕೇನೆದ ಪುಂಡಿ

ನನೆತಿನ ಉರ್ಪೆಲ್ ಅರಿನ್ ಪುಂಡಿಗ್ ಕಡೆಯಿ ಲೆಕೊ ಕಡೆದ್ ದೀವೊಡು(ಕೆಲವೆರ ಒಂತೆ ಬೊಲಂತೆಲಾ ಪಾಡ್ಬೆರ್, ಒಂತೆಗಟ್ಟಿ ಆವರೆ). ಇತ್ತೆ ಬೆಯಿಪಾದಿನ ಕೇನೆದ ಕಂಡೆನ್ ಸನ್ನ ಗುದ್ದುದು. ತುಂಡು ಇಪ್ಪರೆ ಬಲ್ಲಿ. ಅರಿತ್ತ ಬಂದ ಬುಕ್ಕೊ ಗುದ್ದಿನ ಕೇನೆದ ಕಂಡೆದ ಪೊಡಿನ್ ಒಟ್ಟು ಮಲ್ತ್‍ದ್ ಮೊರೆಪ್ಪೊಡು. ಕಡೆಕ್ಕ್ ಮಮೂಲಿ ಪುಂಡಿರ್ದ್‍ಲಾ ಚೂರು ಮಲ್ಲ ಮಲ್ತುದು ತೊಂದುರ್ಡು ಬೆಯಿಪಾವೊಡು. ಮುಲ್ಪಲಾ ಮುಗುಳಿ ಸಂಖ್ಯೆಡ್ ಕೇನೆದ ಪುಂಡಿ ಇಪ್ಪೊಡು. ಪುಂಡಿ ಬೈತಿ ಬುಕ್ಕೊ ಜಾದ್ ದೀವೊಡು.

ತಜಂಕ್ ಆಜಾಯಿನ

ತಜಂಕ್ ದಯಿತ ಎಲ್ಯ ತೆಗ್‌ರ್ನ್ ಕಿನ್ಕೊಂದು ಬತ್ತ್‌ದ್ ಪೊರ್ಲು ದೆಕ್ಕ್‌ದ್ ಸಣ್ಣ ಮೂರೊಡು ಅವೆಡ್ದ್ ಬುಕ್ಕೊ ಎಲ್ಯ್ ಬಣಲೆ ದಿಕ್ಕೆಲ್ ದೀದ್ ಎಣ್ಣೆ ಪಾಡ್ದ್ ಎಣ್ಣೆ ಬೆಚ್ಚ ಆನಗ ದಾಸೆಮಿ ಪಾಡ್ದ್ ಪುಡದಾನಗ ಬೆಳ್ಳುಳ್ಳಿ ರಡ್ಡ್ ಎಸಲ್ ಗುದ್ದ್‌ದ್ ಪಾಡೊದು ಅವ್ವ್ ಕಾಯಿನಗ ರಡ್ಡ್ ಕುಮ್ಟೆ ಮುಣ್ಚಿ ಕಿನ್ಕ್‌ದ್ ಪಾಡ್ದ್ ಮುಣ್ಚಿ ಕಾಯಿದಾನಗ ಬೇಸೊಪ್ಪು ಪಾಡೊಡು ಅವೆಡ್ಡ್ ಬುಕ್ಕೊ ಮೂರ್‌ದ್ ದೀನ ತಜಂಕ್‌ದ್ ತಪ್ಪುನು ಪಾಡೊಡು ಬೋಡಿತ್ತ್ಂಡ ಮುಣ್ಚಿದ ಪೊಡಿ ಚೂರು ಪಾಡ್ದ್ ಬೋಡಾಯಿನಾತ್ ಉಪ್ಪುಲ ಪಾಡೊಡು ಕಡೆಕ್ ಅರಿಪೊಗ್ತ್‌ದ್ ಪೊಡಿ ಮಲ್ತ್‌ನೆನ್ ಪಾಡೊಡು.

ತಜಂಕ್ ಪೆಲತ್ತರಿ ಆಜಾಯಿನ

ತಜಂಕ್ ದಯಿತ ಎಲ್ಯ ತೆಗ್‌ರ್ನ್ ಕಿನ್ಕೊಂದು ಬತ್ತ್‌ದ್ ಪೊರ್ಲು ದೆಕ್ಕ್‌ದ್ ಸಣ್ಣ ಮೂರುದು ದೀವೊಡು.ಅವೆಡ್ಡ್ ಜೀರಿಗೆ, ಬೆಳ್ಳುಳ್ಳಿ, ಮೆಂತೆ,ಕೊತ್ತಂಬರಿ ಬೇಸೊಪ್ಪು,ಕುಮ್ಟೆ ಮುಣ್ಚಿ, ಉಂದೆನ್ ಮಾತ ಬಣಲೆಡ್ ಚೂರು ಎಣ್ಣೆ ಪಾಡ್ದ್ ಪೊವೊಪೊಡು ಅವೆನ್ ಮಾತ ಚೂರು ಪುಳಿ ಸೇರಾದ್ ಸಣ್ಣ ಪೊಡಿ ಮಲ್ಪೊಡು ಬುಕ್ಕೊ ಪಿರೆಯಿನ ತಾರಾಯಿ ಪಾಡ್ದ್ ಚೂರು ತಿರ್ಗಾದ್ ಅರೆಪು ಮಲ್ತ್ ದಿವೊನೊಡು ಬುಕ್ಕೊ ಚೂರು ಪೆಲತ್ತರಿ ಗುದ್ದುದು ಚೋಲಿ ದೆತ್ತ್‌ದ್ ದೆಕ್ಕ್‌ದ್ ಚೂರು ನೀರ್‌ಡ್ ಬೈಯೆರೆ ದೀವೊಡು ಚೂರು ಬೈದಾನಗ ಉಪ್ಪು ಪಾಡ್ದ್ ಮೂರುದು ದೀನ ತಜಂಕ್‌ದ್ ತಪ್ಪು ಪಾಡೊಡು ಅವೆಡ್ದ್ ಬುಕ್ಕೊ ಕಡೆದ್ ದೀನ ಅರೆಪು ಪಾಡ್ದ್ ನೀರ್‌ದ ಪಸೆ ಆಜಿನೆ ಮುಟ್ಟ ಮಗ್ಪೊಡು ಬುಕ್ಕೊ ದಾಸೆಮಿ ಬೇಸೊಪ್ಪುದ ಒಗ್ಗರಣೆ ಕೊರೊಡು

ಪತ್ರೊಡೆ

ಪತ್ರೊಡೆ

ದುಂಬುನಾನಿ ನೀರ್ ಡ್ ನೆನೆತ್ ದೀತಿನ ಉರ್ಪೆಲ್‍/ಬೊಲಂತೆ ಅರಿನ್‍ ಗಟ್ಟಿ ಕಡೆವೊಡು.ಬಂದ ತೆಲುಪು ಆವರೆ ಬಲ್ಲಿ. ಬಂದ ದೆತ್ತಿ ಬುಕ್ಕ ರುಚಿಗ್ ಬೋಡಾಯ್ನಾತ್ ಉಪ್ಪು ಪಾರ್ದ್ತೇ, ತೇವುದ ಇರೆನ್‍ ಸಣ್ಣ ಮೂರುದು ಬಂದೊಗು ಬೆರೆಸೊಡು. ಬೆರೆಸಿನ ಬಂದೊನು ತೆಕ್ಕಿದ ಇರೆಟ್ಟ್ ಮಡ್ತ್ ದ್ ಬೈಯರೆ ದೀವೊಡು. ಬೆಯ್ತಿ ಬುಕ್ಕೊ ತುಂಡು ಮಲ್ತ್ ದ್ ಅರೆಪ್ಪುಗ್ ಪಾಡೊಡು. ಅರೆಪ್ಪುನು ಕಜಿಪು ಕಡೆಯಿಲೆಕೊನೆ ಕಡೆವೊಡು ಜಾಸ್ತಿ ಕಾರ ಮಲ್ಪರೆ ಬಲ್ಲಿ. ಈ ತೆನಸ್ ಗ್ ಪತ್ರೊಡೆ ಪಂಡ್ ದ್ ಪನ್ಪೆರ್.

ಆಟಿದ ಅಲಂಬುದ ಕಜಿಪು

ಅಲಂಬುದ ಸಾರ್)

ದುಂಬುದ ಕಲೊಡು ಜಾಲ್ಡ್ ಬೈತ ಮುಟೆ ಇಪ್ಪೆದ್ಂಡ್. ಅವು ಬಾರೀ ಬರ್ಸೊದಾವರೊ ಚಂಡಿಯಾದ್ ಮುಟೆದ ಉಲಾಯಿ ನೀರ್ ಪೋದ್ ಬೈ ಕುರಿದ್ ಗೊಬ್ಬರೊದ ಲೆಕೊ ಆಪುಂಡು. ಅಯಿಟ್ ಮಲ್ಲ ಮಲ್ಲ ಅಲಂಬು ಆಪುಂಡು. ಇಂದೆನ್ ಮೊಟ್ಟೆ ಅಲಂಬು ಪನ್ಪೆರ್. ಈ ಅಲಂಬು ಆರೋಗ್ಯೊಗು ದಿಂಜ ಎಡ್ಡೆ. ಈ ಸಮಯೊಡು ತೆಡಿಲ್ ಬನ್ನಗ ಗುಡ್ಡೆಡ್ಲಾ ಅಲಂಬು ಮೂಡುಂಡು. ಕಲ್ಲಲಂಬು, ನಾಯಿಮಿರೆ ಅಲಂಬು, ಸುಳಿರ್ ಅಲಂಬು ಇಂಚ ಮಸ್ತ್ ಅಲಂಬುಲು ಮೂಡುಂಡು. ಈ ಅಲಂಬುಲೆನ್ ದೆಕ್ಕ್ ದ್ ಮಂಜಲ್ ದ ನೀರ್ ಡ್ ಪಾರ್ದ್ ದೀದ್ ಒಗ್ಗರಣೆ ಕೊರ್ದು ಆಜಾದ್ ಕಜಿಪು ಮಲ್ಪುವೆರ್. ಅತ್ತ್ಂಡ ಪದೆಂಗಿ ಪಾರ್ದ್ ಸಾರ್ ಲಾ ಮಲ್ಪುವೆರ್. ಅಲಂಬುಗು ಲಾಂಬು ಪಂದ್ಲಾ ಪನ್ಪೆರ್.