ಬ್ರಹ್ಮ
| ಬ್ರಹ್ಮ | |
|---|---|
| Member of Trimurti | |
 Painting depicting Brahma on a Hansa, c. 1700 | |
| ಬೇತೇ ಪುದರ್ಲು | Svayambhu, Virinchi, Prajapati |
| ದೇವನಾಗರಿ | ब्रह्मा |
| ಸಂಸ್ಕೃತ | Brahmā |
| Affiliation | Trideva, Deva |
| ಇಪ್ಪುನ ಜಾಗೆ | ಸತ್ಯಲೊಕೊ or Brahmaloka, Pushkara |
| ಮಂತ್ರ | ॐ वेदात्मनाय विद्महे हिरण्यगर्भाय धीमही तन्नो ब्रह्मा प्रचोदयात्: Oṃ vedātmanāya vidmahe hiraṇyagarbhāya dhīmahī tan no brahmā pracodayāt ॐ ब्रह्मणे नम: Om Brahmane Namah |
| ಹತಾರ್ | Brahmastra, Brahmashirsha astra |
| ಚಿಹ್ನೆ | Lotus, the Vedas, japamala and kamandalu |
| ವಾಹನ | Hamsa |
| ಪರ್ಬ | Kartik Purnima |
| ವೈಯಕ್ತಿಕ ಇಸಯೊಲು | |
| ಸಂಗಾತಿ | Saraswati |
| ಸಂತತಿ | Mind-born children including Agni, Angiras, Atri, Bhrigu, Chitragupta, Daksha, Himavan, Jambavan, Kama, Kratu, Kumaras, Marichi, Narada, Pulaha, Pulastya, Shatarupa, Sindura, Svayambhuva Manu, Vashishtha |
ಬ್ರಹ್ಮ - ಬ್ರಹ್ಮೆ - ಹಿಂದೂ ಧರ್ಮಡ್ ತ್ರಿಮೂರ್ತಿ ದೇವತೆಲೆಟ್ ಬ್ರಹ್ಮ ಒರಿ. ಬ್ರಹ್ಮನ್ ಸೃಷ್ಟಿಕರ್ತೆಂದ್ ಪನ್ಪೆರ್. ಸರಸ್ವತಿ ಬ್ರಹ್ಮನ ಬೊಡೆದಿ, ಬೊಕ್ಕ ನಾರದೆರ್ ಬ್ರಹ್ಮನ ಮಾನಸ ಪುತ್ರೆರ್. ಚತುರ್ಮುಖ ಬ್ರಹ್ಮೆ ವಿಷ್ಣುನ ಪೊಕ್ಕುಲುಡ್‍ದ್ (ಪೂವೊಲು) ಪುಟುದು ಕಮಲೊಡ್ ಜನಿಸಿನಿ ಪಂದ್ ಪ್ರತೀತಿ. ಐಕಾದ್ ಬ್ರಹ್ಮಗ್ ಜಡಜಜ ಪನ್ಪಿನ ಪುದರ್ ಉಂಡು.[೨]ಪ್ರಕೃತಿ ಆರಾಧಕ ತುಳುವೆರೆಗ್ ತನ್ಕ್ ತೋಜಂದಿನ, ತನ್ಕ್ ಸಹಾಯ ಮಲ್ಪುನ ಒಂಜಿ ಸಗ್ತಿದ ಮಿತ್ತ್ ನಂಬೊಳಿಗೆ ಇತ್ತ್ಂಡ್ ವಿನಃ ಅಕ್ಲೆಗ್ ಆಕಾರದ ಮಿತ್ತ್ ನಂಬೋಳಿಗೆ ಇಜ್ಜಾಂಡ್. ಆ ನಂಬೊಳಿಗೆದ ಸಗ್ತಿಯೇ ಬೆರ್ಮೆರ್.[೩] ಜಡ ಪಂಡ ಚಲನೆ ಇಜ್ಜಾಂದಿನ ಪಂದ್ ಅರ್ಥ. ಜಡಕ್ ಕೆಸರ್ ಪನ್ಪಿನ ಅರ್ಥಲಾ ಉಂಡು. ಇಂಚ ಜಡಜ ಪಂಡ ಕೆಸರ್ಡ್ ಜನಿಸಿನಿ ಕಮಲ ಪಂದ್ ಅರ್ಥ. ಐಕಾದ್ ವಿಷ್ಣುನ ನಾಭಿಕಮಲಡ್ ಜನಿಸಿನ ಬ್ರಹ್ಮನ್ ಜಡಜಜ ಪಂದ್ ಲೆಪ್ಪುವೆರ್. ಅರೆಗ್ ತುಲುನಾಡ್‍ಡ್ ಬೆರ್ಮೆರ್, ಬೊಮ್ಮ ಇತ್ಯಾದಿ ಪುದರ್ ಉಂಡು.
ಬೇತೆ ಪುದರುಲು
[ಸಂಪೊಲಿಪುಲೆ]ಬೊಮ್ಮ - ಬಿರ್ಮ - ಬೆರ್ಮ - ಬ್ರಹ್ಮ ಪಂಡ್ದ್ ಬೇತೆ ಬೇತೆ ಒರುಟು ಅರಾಧನೆ ಮಲ್ಪುನ ಬೆರ್ಮೆರ್ ಪಂಡ ನಮ್ಮ ಗೇನೊಗು ಎಕ್ಕಾಂದಿನಾತ್ ಮಲ್ಲ ಸಗ್ತಿಂದ್ ಬೆರ್ಮೆರೆನ್ ದೇವೆರಾದ್ ತುಳುವೆರ್ ನಂಬಿಯೆರ್. ಬೆರ್ಮೆರೆನ್ಲಾ ಬೇತೆ ಬೇತೆ ಪುದರ್ಡ್ ಆರಾದನೆ ಮಲ್ಪುವೆರ್. ಕೆಲವು ಗರಡಿಲೆಡ್ ಉರಿ ಬೆರ್ಮೆರ್ ಇತ್ತ್ಂಡ ಕೆಲವು ತಿಕ್ಡ್ ಉದಿಪನ ಜಲ ಬೆರ್ಮೆರಂದ್, ಕೆಲವು ಕಡೆಟ್ ಜಯವುಳ್ಳ ಲಕ್ಕಣ್ಣ ಬೆರ್ಮೆರಂದ್, ಕೆಲವು ತಿಕ್ಡ್ ಕೆಮ್ಮಲೆತ ಬೆರ್ಮೆರಂದ್ ಪನ್ಪೆರ್. ಕೆಲವೆರೆ ಅಭಿಪ್ರಾಯ ಪ್ರಕಾರ ಆದಿಡ್ ಬತ್ತ್ನಕ್ಲ್ ಆದಿ ಮುಗೆರ್ಲ್ ಪಂಡ ಮುದ್ದ ಕಳಲೆರ್, ಕೋಟಿ ಚೆನ್ನಯೆರ್, ಕಾನದ, ಕಾಟದೆರ್, ಉಳ್ಳಾಕ್ಲು ಪಂಡ ಕಿನ್ನಿಮಾನಿ, ಪೂಮಾನಿ, ಕಾಂತಬಾರೆ ಬೂದಬಾರೆ,ಅಬ್ಬಗ ದಾರಗ.
ಬೆರ್ಮೆರೆ ಸೃಷ್ಟಿ
[ಸಂಪೊಲಿಪುಲೆ]ಬೆರ್ಮೆರೆ ಸೃಷ್ಟಿನ್ ಪುರಾಣದ ಆಧಾರದಕುಲು ಜಗತ್ತ್ ಬ್ರಹ್ಮ ಸೃಷ್ಠಿ ಪನ್ಪೆರ್. ಬ್ರಹ್ಮ ಪಂಡಲಾ ಮಲ್ಲನ್ದೇ ಅರ್ಥ. ತುಳುನಾಡ ಪುಟ್ಟು ಪುರಪು ತೂನಗ ತುಳುನಾಡ್ ಬೆರ್ಮೆರೆ ಸೃಷ್ಟಿಂದ್, ಕುಡು ಅರಿತ ಉದಿಪುದ ತುಳುನಾಡ್ಂದ್ ತೆರಿನಕುಲು ಪನ್ಪೆರ್. ಬೆರ್ಮೆರೆ ಆರಾಧನೆ ಪ್ರಧಾನವಾದ್ ಆಲಡೆಲೆಡಿತ್ತ್ಂಡ್. ಮೂಲ ಮೈಸಂದಾಯೆಲಾ ಬೆನ್ನಿ ಸಾಗೊಳಿ ಸಂಸ್ಕೃತಿದ ಒರುವಾದಿತ್ತ್ಂಡ್. ಮೂಲು ಕುಡು ಅರಿತ ಬಿಲೆ ನೆಗತ್ ತೋಜುಂಡು. ಜೈನೆರೆ ಆರಾಧನೆಡ್ ಬೆರ್ಮೆರೆನ್ ಯಕ್ಷೆರೆನೊಟ್ಟುಗು ಗೋಡ್ಯಾದ್ ಬ್ರಹ್ಮಂದೇ ಪನೊಂತೆರ್. ಯಕ್ಷ ಬ್ರಹ್ಮ, ನಾಗಬ್ರಹ್ಮ ಉಂದೆಟ್ ಈ ಸ್ಪಷ್ಟತೆ ತಿಕ್ಕುಂಡು. ಅಕುಲು ಓಲ್ಲಾ ಬೆರ್ಮೆರ್ ಪನ್ಪುಜೆರ್. ಪುರಾಣ ವೈದಿಕ ಆರಾಧನೆ ತುಳುನಾಡುಗ್ ಬತ್ತಿ ಬೊಕ್ಕ, ವೈದಿಕ ಪುರಾಣೀಕರಣದಕುಲ್ಲ ಬ್ರಹ್ಮ ಪಂಡುದೇ ಲೆತ್ತೆರ್. ಆಂಡ ದ್ರಾವಿಡ ಶೂದ್ರ ತುಳುಧರ್ಮದ ತುಳುವೆರ್ ಮಾತ್ರ ಬೆರ್ಮೆರ್ ಪಂಡುದೇ ಅನಾದಿರ್ದೇ ಪನೊಂದು ಬತ್ತೆರ್. ತುಳುನಾಡ ಮೂಲ ಕೆಲವೊಂಜಿ ಜನಾಂಗೊಲು ಬೆರ್ಮೆರೆನ್ ಕಂಬೆರ್ಲುಂದು ಆರಾಧನೆ ಮಲ್ಪುನೊಟ್ಟುಗು ಸುರುತ ಪೂಜೆನ್ ಬೆರ್ಮೆರೆಗ್ ಸಂದಾವೆರ್.[೪]
ಬೆರ್ಮೆರೆ ಆರಾದನೆ
[ಸಂಪೊಲಿಪುಲೆ]ತುಳುವೆರೆ ಆದಿಡ್ ಬೆರ್ಮೆರೆನ್ ರೂಪ ಇಜ್ಜಂದಿ ಕಲ್ಲುಡ್ ಆರಾಧನೆ ಮಲ್ತೊಂದು ಬತ್ತೆರ್. ಎರಿಯಾಕ್ಲು ತನ್ಕುಲೊಟ್ಟುಗು ಉಪ್ಪುನ, ತನ್ಕುಲೆಗ್ ತೆರಿಯಂದಿನ ಸಗ್ತಿ ದಾದಂದ್ ತೆರಿಯಂದೆ ಆ ಸಗ್ತಿನ್ ಬೇರ್ಮೆರುಂದು ಪಂಡೆರ್. ಅಳಿಯ ಕಟ್ಟ್ ಡ್ ಬರ್ಪುನ ಎಚ್ಚಿನ ತುಳುವೆರೆಗ್ ಬೆರ್ಮೆರೇ ದೇವೆರಾದ್ ಉಲ್ಲೆರ್. ಬೆರ್ಮೆರೆಡ್ದ್ ಬೊಕ್ಕ ತುಳುನಾಡುಗ್ ದೈವೊಲು ಬತ್ತಾಂದ್ ತೇರಿನಕ್ಲೆ ಅಭಿಪ್ರಾಯ. ಬೆರ್ಮೆರೇ ಸತ್ಯ, ಚಿತ್ತ, ದರ್ಮೊಲೆನ್ ಉಂಡು ಮಲ್ತೆರುಂದುಲಾ ಪನ್ಪೆರ್. ಬಿರುವೆರೆಗ್ ಆರಾಧ್ಯ ದೈವ ಕೋಟಿ ಚೆನ್ನಯೆರಾಂಡ, ಕೋಟಿ ಚೆನ್ನಯೆರ್ನ ಆರಾದ್ಯ ದೈವ ಕೆಮ್ಮಲಜೆ(ಕೆಮ್ಮಲೆ)ದ ಬೆರ್ಮೆರ್. ಮುಗೆರ್ಲೆ ಗ್ ಮುದ್ದ ಕಲಲ, ಪೊಸ ಕಲಲೆ ಆರಾಧ್ಯ ದೈವೊಲಾಂಡ, ಬೆರ್ಮೆರ್ ದೇವೆರ್. ಬಂಟೆರೆಗ್ ಸಿರಿ ದೈವಲಾ ಅಂದ್, ದೇವೆರ್ಲಾ ಅಂದ್ಂದು ಆಂಡ ಸಿರಿನ ಆರಾಧ್ಯ ದೇವೆರ್ ಬೆರ್ಮೆರ್.
ತುಳುನಾಡ ಆದಿ ದೈವ ಬೆರ್ಮೆರ್ ಬೂಮಿ ಉಂಡಾನಗ ಉಂಡಾಯಿ ಸಗ್ತಿಂದ್ಲಾ ಪನ್ಪೆರ್. ಮಲ್ಲ ಮಲ್ಲ ದೇವಾಲ್ಯೊಡು ದೈವೊಲೆಗ್ ಆರಾಧನೆ ನಡಪುನ ದುಂಬು ಬೆರ್ಮೆರೆಗ್ ದೇವೆರಾದ್ ಆರಾಧನೆ ನಡತೊಂತುಂಡು. ತುಳುವೆರೆ ಮೂಲದೈವ ಬೆರ್ಮೆರೆನ್ ಬನೊಟು ಆರಾಧನೆ ಮಲ್ತೊಂದಿತ್ತೆರ್. ನಾಗೆ ಬೊಕ್ಕ ಲೆಕ್ಕೆಸಿರಿ ಬನೊಟು ಉಪದೈವೊಲಾದಿತ್ತ. ದುಂಬುಗು ಲಿಂಗ ರೂಪೊಡು ಒಂಜಿ ಮಲ್ಲ ಲಿಂಗ ಬೆರ್ಮೆರಾದ್, ಅಂಚಿಂಚಿದ ರಡ್ದು ಎಲ್ಯ ಲಿಂಗೊಲು ಲೆಕ್ಕೆಸಿರಿ ಬೊಕ್ಕ ನಾಗನ ಒರುವಾದ್ ಆರಾಧನೆ ಪಡೆಯೊಂದಿತ್ತುಂಡು. ಗುತ್ತುಬರ್ಕೆಲೆಡ್ ದುಂಬುದ ಕಾಲೊಡು ರಾಜಂದೈವೊಲೆನ್ ನಂಬೊಡಾಂಡ ಅವೆಕ್ ಸಮ್ಮಂದ ಪಟ್ಟುದ್ ಬನೊಕ್ಲಿಪ್ಪೊಡಾಂಡ್. ಅವು ನಿಯಮ ಆದಿತ್ತುಂಡು. ದೈವದ ಬಲತುಡು ಉಂತುದು ದೈವೊಗು ಬಲಕೊರ್ಪುನ ಬಿರ್ಮೆರೆಗ್ ಸುರುತ ತಂಬಿಲ ಕೊರೊಂದಿತ್ತೆರ್. ಬನೊಕು ತಾಗುದಿತ್ತುದ್ ಕಂಬುಲದ ಕಂಡೊಲಿತ್ತ. ಕಂಬುಲದ ಕಂಡೊಡು ಪೂಕರೆ ಪಾಡ್ನಗ ಬೆರ್ಮೆರೆಗ್ ನೇಮಲ ನಡತೊಂದಿತ್ತುಂಡ್. ಇನಿಕ್ಲಾ ಬಂಟಾಲ ಕಾಡಬೆಟ್ಟುಡು ಜೈನ ಮನೆತನೊಡು ಈ ಆರಾಧನೆ ನಡತೊಂದುಂಡು. ವೈದಿಕ ಆರಾಧನೆ ತುಳುನಾಡುಗ್ ಬತ್ತಿ ಬೊಕ್ಕ ಮೂರ್ತಿ ಪೂಜೆಲು ಸುರಾದ್ ಮೂರ್ತಿ ಇಜ್ಜಂದಿ ಬೆರ್ಮೆರೆಗ್ ಕುದುರೆದ ಮಿತ್ತ್ ಕುಲ್ದಿನ ಮೂರ್ತಿ ಬತ್ತುಂಡ್.[೫]
ಸಮದಿಲೆಡ್ ಬೆರ್ಮೆರೆ ಉಲ್ಲೇಕೊ
[ಸಂಪೊಲಿಪುಲೆ]"ಬಡಕಾಯಿ ಗಂಗೆರ್ದ್, ತೆನ್ಕಾಯಿ ರಾಮೇಸರ ಮುಟ್ಟ" ಬೆರ್ಮೆರೆ ಅಧಿಕಾರ ವ್ಯಾಪ್ತಿ ಪಂದ್ ಸಂದಿಲೆಡ್ ಬರ್ಪುಂಡು.
ಉಲ್ಲೇಕೊಲು
[ಸಂಪೊಲಿಪುಲೆ]- ↑ "Brahma, Brahmā, Brāhma: 66 definitions". Wisdomlib.org. 6 June 2022. Archived from the original on 5 August 2022. Retrieved 5 August 2022.
- ↑ kn:ಬ್ರಹ್ಮ
- ↑ "Bermer Naga Bermerayer|ಬೆರ್ಮೆರ್ ನಾಗ ಬೆರ್ಮೆರಾಯೆರ್". tuluver.github.io (in ಇಂಗ್ಲಿಷ್). Retrieved 11 July 2024.
- ↑ "ತುಳುನಾಡು ಪರಶುರಾಮ ಸೃಷ್ಟಿ ಅಲ್ಲ…ಬೆರ್ಮೆರೆ ಸೃಷ್ಟಿ..!". Peepal Media. 8 November 2022. Retrieved 11 July 2024.
- ↑ Templates, Borneo. "ತುಳುನಾಡ ಬೆರ್ಮೆರ್ ಓಲುಲ್ಲೆರ್?". Retrieved 11 July 2024.
https://commons.wikimedia.org/wiki/Category:Trimurti_(Elephanta_Caves)