ಕೋರ್ದಬ್ಬು

ತುಳುನಾಡ್ ತಾ ಒಂಜಿ ದೈವ ಕೋಟೆದ ಬಬ್ಬು ಸ್ವಾಮಿ, ವೈದ್ಯನಾತೆ ಪನ್ಪಿ ಪುಡರ್'ಡ್ ದೈವದ ಪುಟ್ಟು ಪುರಾಪು ಉಂಡು

ದೈವದ ಪುಟ್ಟು

ತುಳುನಾಡ್‌ದ ಕೆಮ್ಮಣ್ಣು ಪನ್ಪುನ ಊರುಡು ಕೊಡಿ ಕೊಂಡಲ ಬೂಡು ಇತ್ತ್ಂಡ್‍ಗೆ. ಆ ಬೂಡುಡು ಕೊಡಂಗೆ ಬನ್ನರ್ ಬುಕ್ಕ ಆಪ್ಪೆ ಸಿರಿ ಗಿಂಡೆ ಉಲ್ಲಾಲ್ತಿ ಇತ್ತೆರ್. ಬೂಡುನು ಬುಕ್ಕ ವೊಕ್ಕೆಲ್ ಸಕ್ಕೆಲ್‌ನ್ ಪೊರ್ಲುಡೆ ನಡಪಾವೊಂದು ಬರೊಂದಿತ್ತೆರ್.

ಅಕ್ಲೆನ ಒಕ್ಕೆಲ್ಡ್ ಇತ್ತಿನ ತಿರ್ತ ಜಾತಿಡ್ ಪುಟ್ಟಿನ, ಕಚ್ಚೂರ ಮಾಲ್ತಿ ಪುದರ್ದ ಸತ್ಯವಂತೆದಿ ಪೊಣ್ಣು. ಅ ಮಾಲ್ಡಿ ವಿಸ್ಮಯೊಡು ಮಾಯಕೊದ ಬಂಜಿನಾಲ್ ಆಪಲ್. ತಿಂಗೊಲು ಬರ್ತಿ ಆಂಡ್ ಆನ್ ಬಾಲೆಗ್ ಜನ್ಮ ಕೊರ್ದು ಪರಲೋಕೊಗು ಸಂದುವಲ್.

ಗತಿ ದಾಂತಿನ ಆ ಬಾಲೆನ್ ಕಾವಂದೆರ್ ಕೊಡಂಗೆ ಬನ್ನರ್ ತನ್ನ ಬೂಡುಗು ಕೊನೊದು, ಬಬ್ಬು ಪನ್ಪಿ ಪುದರ್ ದೀದ್, ತಿರ್ತ ಜಾತಿದಾಯೆ ಪನ್ಪಿ ಭೇದ ಮಲ್ಪಂದೆ ಪೊರ್ಲುಡೆ ತಾಂಕ್‌ದ್ ಮಲ್ಲೆ ಮಲ್ತೆರ್. ಬಾಲೆ ಬಬ್ಬು ಬಾರಿ ಬಿರ್ಸಾದಿಗೆದ ಜವನ್ಯೆ ಆದ್ ಪೂರಾ ವಿಸಯೊಡ್ಲ ಬುದ್ಧಿವಂತೆ ಆದ್ ಬುಲೆಯೆ. ಸೀಕ್ ಸಂಕಟದಕ್ಲೆಗ್ ಗಿಡ ಮೂಲಿಕೆಡ ಮರ್ದ್ ಕೊರ್ಪುನಂಚಿನ ಕೈ ಗುಣ ಆಯಡ ಇತ್ತಿನೆನ್ ತೂದು ಆಯನ್ ಮಾತೆರ್ಲ ವೈದ್ಯನಾತೆ ಪಂಡ್‌ದ್ ಲೆತ್ತೆರ್. ಇಂಚೆನೆ ದಿನ ಪೋವೊಂದಿತ್ತಿಲೆಕ್ಕನೆ ಕಟಪಾಡಿದ ಆರಸುಗು ಬಬ್ಬುನ ಬಿರ್ಸಾದಿಗೆದ ವಿಸಯ ಪೂರಾ ತೆರಿಯುಂಡು.

ಅರಸುನ ನಂಜಿ

ಕಟಪಾಡಿದ ಆರಸು ಬಬ್ಬುನ ಮಿತ್ತ್ ನಂಜಿ ಕಾರೊಂದು, ಎಂಕ್ಲೆನ ಗೂವೆಲ್ಡ್ ನೀರ್ದ ದಂಡ್ ತೋಜಾರೆಗ್ ಬಬ್ಬುನು ಬರ್ಪಾರೆಗ್ ಕೊಡನ್ಗೆ ಬನ್ನಾರೆಗ್ ಓಲೆ ಕಡಪುಡ್‌ದ್ ಬಬ್ಬುನ್ ಉಪಾಯೊಡು ಕಟಪಾಡಿಗ್ ಬರಿಯೆರೆ ಪನ್ಪೆರ್. ಕಟಪಾಡಿಗ್ ಪೊಯಿನ ಬಬ್ಬುಡ ಆರಸು ಪನ್ಪೆರ್, ಪೊಸ ಗೂವೆಲ್ ತೊಡಿನೆಟ್ಟ್ ನೀರ್ ಇಜ್ಜಿ. ನೀರ್ದ ದಂಡ್ ಒಲ್ಪ ಉಂಡು ಪಂಡ್‍ದ್ ತೂವೊಲಿಯಾ ಕೇನುವೆರ್. ಬಬ್ಬು ನೀರ್‌ದ ದಂಡ್ ತೋಜಾದ್ ಬಲ್ಮೆದ ಮುಕಾಂತರ ಪನ್ಪೆ. ಅಪಗ ಅರಸುಲು, ಉಂದು ಇಂಚ ಬಲ್ಮೆಡ್ ಪಂಡ ಯಾವಂದ್, ಈ ಗೂವೆಲ್‌ಗ್ ಜತ್ತ್‌ದ್ ನೀರ್‌ದ ದಂಡ್ ತೊಜಾವೋಡು ಪನ್ಪೆರ್, ಬಬ್ಬು ಲೆಂಚಿದ ಸಾಯೊಡು ಗೂವೆಲ್‌ಗ್ ಜತ್ತ್‌ದ್ ಮಾಯೋಡೆ ನೀರ್‌ದ ದಂಡ್ ತೋಜಾವೆ, ಬಬ್ಬುನ ಮಿತ್ತ್ ನಂಜಿ ಕಾರೊಂದಿತ್ತಿ ಕಟಪಾಡಿದ ಅರಸು ತನ್ನ ಜನೋಕ್ಲೇನ್ ಕೂಡಾದ್ ಗೂವೆಲ್‌ಗ್ ಜಪುಡಾಯಿ ಲೆಂಚಿನ್ ಮಿತ್ತ್ ದೆಪ್ಪಾವೆ, ಹಾಸ್ ಕಲ್ಲ್‌ನ್ ಕನಪಾದ್ ಗೂವೆಲ್‌ನ್ ಮುಚ್ಚಾವೆ. ಬಬ್ಬು ಗೂವೆಲ್'ದ ಉಲಯಿ ಒರಿಪೆ.

ದಾಲ ಮಲ್ಪೆರೆ ಸಾದ್ಯ ಆವಂದೆ ಗುವೆಲ್‌ದಾ ಉಲಯಿ ಬಬ್ಬು ಬೊಬ್ಬೆ ಪಾಡುವೆ,ಎನನ್ ಮಿತ್ತ್ ಒಯಿಪುಲೆ ಪಂಡೊಂದು ಕೋರಿದ ಸ್ವರೊಟ್ಟು ಕೆಲೆಪುವೆ, ಕೈಕಂಜಿದ ಸ್ವರೊಟ್ಟು ಅರೆದುವೆ, ಪುಚ್ಚೆದ ಸ್ವರೊಟ್ಟು ಬುಲಿಪುವೆ, ಆತಾನಗ ಕಾರ್ನಿಕೊದ ದೈವೊಲಾಯಿನ ಪಿಲಿಚಾಮುಂಡಿ, ಕೊಡಮಂದಾಯ, ಕೋಟಿ ಚೆನ್ನಾಯೆರ್ ಬತ್ತ್‌ದ್ ಕಲ್ಲ್ ದೆಪ್ಪರ ತೂಪೆರ್ ಆಂಡ, ಏರೆಗ್ಲಾ ಹಾಸ್ ಕಲ್ಲ್‌ನ್ ಪಂದಯೆರೆನೆ ಆಪುಜಿ.

ದೈವ ಅಪುನ ಕತೆ

ಆ ಪೊರ್ತುಡು ತನ್ನಿಮಾನಿಗ ಆ ಸಾದಿ ಬರಿಯೆ ಪೋವೊಂದಿಪ್ಪುನಗ ಗುವೆಲ್‌ದ ಉಲಯಿರ್ದ್ ಕೋರಿ ಕಿಲೆಪುನ, ಪುಚ್ಚೆ ಬುಲಿಪುನ ಸ್ವರ ಕೇನ್ನಗ ಈ ಏರ್ ಪಂದ್ ಕೇನುವಲ್. ಆಪಗ ಬಬ್ಬು ಪನ್ಪೆ, ಎನನ್ ಮೋಸೊಡು ಗುವೆಲ್‌ದ ಉಲಯಿ ಜಪುಡಾದ್ ಮಿತ್ತ್ ಬರಂದಿಲೆಕೊ ಹಾಸ್‌ಕಲ್ಲ್ ಪಾಡ್‌ದ್ ಮುಚ್ಚಿಯೆರ್. ಎನನ್ ಮಿತ್ತ್ ದೆಪ್ಪುಲೆ ಪನ್ಪೆ. ಪೊಣ್ಣು ಪೊಂಜೊವು ಆದಿತ್ತ್ಂಡ ತಂಗಡಿ ಪಲಿ ಪಂಡ್‍ದ್ ಎನ್ನುವೆ. ಆನ್ ಆನ್ಜೊವು ಆದಿತ್ತ್ಂಡ ಮೆಗ್ಯೆ ಪಲಯೆ ಪಂಡ್‍ದ್ ಎನ್ನುವೆ. ಎನನ್ ಮಿತ್ತ್ ಪಾಡ್ಲೆ ಪಂಡೊಂದು ನಟ್ಟೊನುವೆ.

ಆಪ್ಪೆ ಮಾನಿಗ ಅಲೆಡ ಇತ್ತಿ ಗೆಜ್ಜೆ ಕತ್ತಿಡ್ ಹಾಸ್ ಕಲ್ಲ್‌ಗ್ ಪದಿನಾಜಿ ಗೆರೆ ಗೀರ್ವಲ್. ಆ ಕಲ್ಲ್ ಸೆಲೆ ಬುಡ್ಪುಂಡು. ಗೂವೆಲ್ಗ್ ಮುಚ್ಚಿ ಕಲ್ಲ್ ದರಿದ್ ಬಬ್ಬುಗು ಬೊಲ್ಪು ತೋಜುಂಡು. ಆ ಪೊರ್ತುಗು ಮಾನಿಗ ಬಬ್ಬುಡ ಪನ್ಪಲ್, ನಿನನ್ ಯಾನ್ ಎನ್ನ ಒಪ್ಪ ಪುಟ್ಟಿನ ತಗೆ ಪಂಡ್‌ದ್ ಎನ್ನ್‌ದ್, ಯಾನ್ ತುತ್ತಿ ಸೀರೆನ್ ಜಪುಡಾವೆ. ಅವೆನೆ ಪತೊಂದು ಮಿತ್ತ್ ಬಲ. ಆಂಡ ಮಿತ್ತ್ ಬನ್ನಗ ಎನನ್ ತೂವಡ, ಈ ತೂಯಾನ್ದಾಂಡ ದೋಷ ಬರು ಬಬ್ಬು, ಪಂಡುದು ಮಾನಿಗ ಪನ್ಪಲ್. ಆವು ಪಂಡ್‌ದ್ ಬಬ್ಬು ಮಾನಿಗ ಜಪುಡಾಯಿನ ಸೀರೆನ್ ಪತೊಂದೆ ಮಿತ್ತ್ ಬರ್ಪೆ. ಮಿತ್ತ್ ಬರೊಂದಿತ್ತಿ ಬಬ್ಬು ಮಾನಿಗನ್ ತೂಪೆ. ಅಪಗ ಮಾನಿಗ ಕೋಪೊಡು ಯಾನ್ ಪಂಡಿನ ಪಾತೆರೊನು ಮೀರ್‌ದ್ ಪೋಯ. ಈ ಮಲ್ತಿ ತಪ್ಪುಗು ಶಿಕ್ಷೆ ಆವೊಡು ಪನ್ಪೊಲು. ಆಪಗ ಬಬ್ಬು, ತಾನ್ ಮಲ್ತಿ ತಪ್ಪುಗೊಸ್ಕರ ತನ್ನ ಮುಂಡೊನು ಕೊಚ್ಚೊಂದು ನೆತ್ತೆರ್ದ ಓಕುಲಿನೆ ಜಪುಡಾವೆ. ಉಂದೆನ್ ನಮ (ಕೊರ್ಡಬ್ಬು'ನ ಕೊಲೊಡು'ಲಾ ಆಯೆ ಮಲ್ತಿ ತಪ್ಪುಗು ಕಡ್ಸಲೆಡ್ ಕಟ್ಟಿ ಮಾನಿ ಮುನ್ಡ ಕೊcಚೊನ್ನ ಕಟ್ಟ್ ತೂವರೆ ತಿಕ್ಕುಂಡು) ಅಲ್ಪೊರ್ದು ಬೊಕ್ಕ ತಗೆ ತಂಗಡಿ ಕಾಯೊನು ಬುಡ್'ದು ಮಾಯೊನ್ ಸೇರೊಂದು ಕಾರ್ನಿಕದ ದೈವೊಲಾದ್ ತುಳುನಾಡೊರ್ಮೆ ಮೆರೆಯೊಂದು ಬರ್ಪೆರ್.