ತುಳಸಿ ಪರ್ಬೊ

ತುಳಸಿ ಪರ್ಬ/ ತುಳಸಿ ಪೂಜೆ/ ತುಳಸಿ ಮದಿಮೆ
ತುಳಸಿ ಮದಿಮೆ/ ತುಳಸಿ ಪೂಜೆ
ಆಚರಿಸವೆರ್	ಹಿಂದು
ಬಗೆ	Religious
Significance	ತುಳಸಿ ಬೊಕ್ಕ ವಿಷ್ಣು ದೇವೆರೆನ ಮದಿಮೆ
ಗೌಜಿ	ಮದಿಮೆ
ಶುರು ಆಪಿನ	ಪ್ರಭೋದಿನಿ ಏಕದಶಿ
ಮುಗಿಯುನ	ಕಾರ್ತಿಕ ಪೂರ್ಣಿಮೆ(ಪುಣ್ಣಮೆ)
Frequency	ವಾರ್ಷಿಕ

ತುಳಸಿ ಪರ್ಬೊನ್ ತುಳುನಾಡೋರ್ಮೆ ಆಚರ್ಪುವೆರ್. ಉಂದೆನ್ ತುಳಸಿ ಮದಿಮೆ/ ತುಳಸಿ ಪೂಜೆ ಅತ್ತ್ಂಡಾ ತುಳಸಿ ಪರ್ಬ ಪಂದ್ಲಾ ಪನ್ಪೆರ್. ದೀಪಾವಳಿ ಪರ್ಬೊದ ಗೌಜಿ ಮುಗ್ಯೊಂದು ಬತ್ತಿಲೆಕ್ಕೊನೆ ಬೆರಿಕ್ಕೆ ಕಾರ್ತಿಕ ತಿಂಗೊಲ್‌ದ ಪೊರ್ಲು. ಈ ತಿಂಗೊಲುಡ್‌ಲ ಪರ್ಬ ಪುಣ್ಣಮೆ ಉಂಡೇ ಉಂಡು. ಉಂದೆಕ್ಕ್ ಸುರುವಾದ್ ತುಳಸಿ ಪರ್ಬೊ.

ತುಳಸಿ ಮದಿಮೆದ ಗೌಜಿ

ಸುಲಭಾ, ಸುರನಾ, ಬಹುಮಂಜರಿ, ಶೂಲಕ್ಷ್ಮೀ, ದೇವ ದುಂದುಬಿ, ಪಾವನೀ ವಿಷ್ಣು ಪ್ರಿಯಾ, ದಿವ್ಯ, ಭಾರತೀ ಇಂಚ ಮಸ್ತ್ ಪುದರ್‌ಡ್ ಲೆತ್ತೊಂದಿಪ್ಪುನ ತುಳಸಿದ ಮದಿಮೆಗ್ ಇಡೀ ಊರುನಿಲೀಕೆ ಬಾರೀ ಗೌಜಿದ ತಯಾರಿ ಆವೊಂದಿಪ್ಪುಂಡು. ತುಳಸಿ ಪರ್ಬೊನು ಹೆಚ್ಚಿನಕುಲು ಆಚರ್ಪುವೆರ್. ತುಳಸಿ ಪರ್ಬೊದಾನಿ ಮಾತೆರೆನ ಇಲ್ಲಡ್‌ ತುಳಸಿ ಕಟ್ಟೆ ಬಾರೀ ಪೊರ್ಲುಡು ಐತ್ತಾದಿಪ್ಪುಂಡು. ಸಿಂಗಾರೊಡು ಮದಿಮ್ಮಾಲೆ ಆದುಪ್ಪುಂಡು. ಮಂಟಪೊ ಮಲ್ತ್‌ದ್ ಐಕ್ಕ್ ಪೂತ್ತ ಮಾಲೆನ್ ಪಾಡ್ದ್ ಸೇಡಿ ಕುಂಕುಮೊದ ಚಿತ್ರೊಲೆನ್ ಬುಡ್ಪಾದ್ ಬಾರೀ ಪೊರ್ಲಾದಿಪ್ಪುಂಡು. ಕಾರ್ತಿಕಮಾಸ ಶುಕ್ಲಪಕ್ಷದ 12ನೇ ದಿನ, ಕಾರ್ತಿಕ ಶುದ್ಧ ದ್ವಾದಶಿತ್ತಾನಿ ತುಳಸಿನ ಮದಿಮೆಗ್ ದಿನ ನಿಗಂಟಾದಿಪ್ಪುಂಡು.

ತುಳಸಿ ಪರ್ಬೊದಾನಿ ತುಳಸಿ ಕಟ್ಟೆಗ್ ಅಯ್ತ ಮಲ್ಪಿನ ಕ್ರಮೊ

ತುಳಸಿ ಕಟ್ಟೆಗ್ ಸೀರೆರ್ದ್ ಅಯ್ತ ಮಲ್ದಿನ ಪೊರ್ಲು

ತುಳಸಿ ಪರ್ಬೊದಾನಿ ಕೆಲವು ಕಡೆಟ್ ತುಳಸಿ ಕಟ್ಟೆಗ್ ಸೀರೆನ್ ತುತ್ತಾದ್ ಅಯ್ತ ಮಲ್ಪುವೆರ್ . ತುಳಸಿ ಕಟ್ಟೆಗ್ ಸೀರೆ ತುತ್ತಾವುನಾಂಡ ಮಂಜಲ್, ಕೆಂಪು ಇಜ್ಜಾಂಡ ಪಚ್ಚೆ ಬನ್ನೊದ ಸೀರೆನ್ ತುತ್ತಾವೆರ್. ಭಾರತದ ಉತ್ತರ ಬಾಗೊಡ್ ಸೀರೆ ಅತ್ತಂದೆ ಲೆಹೆಂಗನ್ಲಾ ಅಲತೆ ದೆತ್ತ್ದ್ ಪೊಲ್ಲಾದ್ ತುಳಸಿ ಕಟ್ಟೆಗ್ ತುತ್ತಾದ್ ಪೂಜೆ ಮಲ್ಪುವೆರ್. ಆಂಡ ವೊವ್ವೇ ಕಾರಣೊಗ್ಲಾ ಪರಿದಿನ ಅತ್ತ್ಂಡ ಕುರೆ ಆತಿನ ಕುಂಟುನು ತುಳಸಿ ಪೂಜೆ ಮಲ್ಪುನಗ ತುಳಸಿ ಕಟ್ಟೆಗ್ ತುತ್ತಾರೆ ಬಲ್ಲಿ.

ತುಳಸಿ ಕಟ್ಟೆಗ್ ಬನ್ನೊದ ಅಯ್ತ

ಕುಂಟುನ್ ಗಲಸ್‍ದ್ ತುಳಸಿ ಕಟ್ಟೆನ್ ಅಯ್ತ ಮಲ್ಪರೆ ಇಸ್ಟ ಇಪ್ಪಂದಿನಕುಲು ತುಳಸಿ ಕಟ್ಟೆಗ್ ಬನ್ನ ಕೊರ್ದು ಅಯ್ತ ಮಲ್ಪೊಲಿ. ಬನ್ನೊಲ್ ವೊವ್ ಪಂಡ ಕೆಂಪು, ಮಂಜೊಲ್ ಅತ್ತ್ಂಡ ಪಚ್ಚೆ ಇಂಚಿನ ಶುಭ ಬನ್ನೊನ್ ಗಲಸುನ ಮುಕ್ಯ.

ಕೇವಲ ಗೌಜಿ ಗಮ್ಮತ್ತ್‌ಗ್ ಅತ್ತಂದೆ ಆರೋಗ್ಯಡ್ ತುಳಸಿದ ಪಾತ್ರ

ತುಳಸಿ ಮದಿಮೆ ಬಜೀ ಪರ್ಬ ಮಾತ್ರವತ್ತ್.ಪರ್ಬೊದ ನೆವನೊಡು ಆರೋಗ್ಯೊನು ಒರ್ತೊನ್ನು ಈ ಪೊರ್ತುದ ವಿಸೇಷ.ತುಳಸಿ ಹಿಂದೂಲೆಗ್ ದೇವೆರೆ ಸಮಾನ ಆದುಲ್ಲೊಲು.ಬಾಕಿದ ಧರ್ಮೊದಕ್ಲೆಗ್ ಜೀವ ಒರ್ಪುನ ಸಂಜೀವಿನಿಯಾದುಲ್ಲೊಲು. ಅಂಚಾದ್ ಆಯುರ್ವೇದೊಡು ತುಳಸಿಗ್ ಒಂಜನೇ ಸ್ಥನೊ. ಇರೆ, ಬಿತ್ತ್ , ಬೇರ್ ಸೇರಿಲೆಕ್ಕೊ ಇಡೀ ದಯ್ ಮರ್ದ್. ಊಮದೆತ್ತಪೊ ಒಂಜಿ ಕಮ್ಮೆನೊ ವಾ ಉಮಿಲ್ ಕೀಟೊಲೆನ್‌ಲ ಕೈತ್ತಲ್ ಬರಿಯೆರೆ ಬುಡಂದ್. ತುಳಸಿ ಇರೆಕ್ಲೆನ್ ನೀರ್‌ಡ್ ಪಾಡ್ದ್ ದೀಂಡ್ಂದಾಂಡ ನೀರ್‌ಡಿಪ್ಪುನ ಸೂಕ್ಷ್ಮ ರೋಗಾಣುಲು ನಾಶವಾದ್ ಪೋಪ. ಪೊರ್ತು ಮೂಡುನೈಡ್ದ್ ದುಂಬು ಉಂದೆತ್ತ ಇರೆನ್ ತಿಂದ್ಂಡ ಮಸ್ತ್ ರೋಗೊಲೆಗ್ ರಾಮಬಾಣೊ. ಮೈಕಟ್ಟ್‌ಲ ಬಾರೀ ಪೊರ್ಲಾಪುಂಡು. ಬಂಜಿದ ಅಜೀರ್ಣ ಬಾಕಿ ಕಾಯಿಲೆ ಕಸಾಲೆ ಗುಣಾಪುಂಡು.

ಹಿನ್ನಲೆ

ತುಳಸಿ ಮದಿಮೆದ ಈ ಪರ್ಬೊಗುಲಾ ಒಂಜಿ ಹಿನ್ನಲೆ ಉಂಡು. ಆಯೆ ಒರಿ ಭಯಂಕರ ರಕ್ಕಸೆ. ಆಯನ ಪುದರ್ ಜಲಂಧರ ಪಂಡ್‌ದ್. ಆಯನ ಬುಡೆದಿ ವೃಂದಾ ಪಂಡ್‌ದ್. ಬಾರೀ ಮಲ್ಲ ಪತಿವೃತೆ. ಅಂಚಾದ್ ಜಲಂಧರಗ್ ಸೋಲು ಪಂಡ್‌ದೇ ಇತ್ತ್‌ಜ್ಜಿ. ಉಂದೆಡ್ದಾತ್ರ ಆಂಕಾರೊ ಬತ್ತಿನ ಜಲಂಧರೆ ದೇವತೆಲೆಡ ಯುದ್ದೊ ಮಲ್ತ್‌ದ್ ಅಕ್ಲೆನ್ ಸೋಪಾವೆ. ಜಲಂಧರನ ಉಪದ್ರ ತಡೆವರೆ ಆವಂದೆ ದೇವತೆಲು ವಿಷ್ಣು ದೇವೆರೆಡ ದೂರು ಕೊರ್ಪೆರ್. ಉಂದೆಕ್ಕಾತ್ರ ಜಲಂಧರನ ವೇಷೊಡು ಬತ್ತಿನ ವಿಷ್ಣು ವೃಂದಾನ ಪತಿವೃತೊನು ಹಾಲ್ ಮಲ್ಪುವೆ. ಅವೆರ್ದಾತ್ರ ಜಲಂಧರೆ ಯುದ್ಧೊಡು ಸೈಪೆ. ಉಂದೆತ್ತ ಕೋಪೊಡು ವೃಂದಾ ವಿಷ್ಣುಗು ಶಾಪ ಕೊರ್ದು ಕಂಡನ್ಯನಡಪ್ಪ ಕಾಟೊಗು ಲಾಗಿದ್ ಸೈಪೊಲು. ಐಡ್ದ್ ಬೊಕ್ಕ ಉಂದವೇ ವೃಂದಾ ತುಳಸಿದ ದೈಯಾದ್ ಪಾರ್ವತಿನ ಬೃಂದಾವನೊಡು ಪುಟ್ಟುವಲ್. ಮೋಲೇ ರುಕ್ಮಿಣಿಯಾದ್ ಕಾರ್ತಿಕ ಶುದ್ದ ದ್ವಾದಶಿತ್ತಾನಿ ಕೃಷ್ಣನ್ ಮದಿಮೆಯಾಪೊಲುಂದ್ ಕತೆ ಉಂಡು.

ಅಮೃತ ಮಂತನೊಡು ತುಳಸಿನ ಕತೆ

ಪುರಾಣೊದ ಪುಸ್ತಕೊಡು ನಾಡ್ರೆ ಪೋನಗ ಕುಡೊಂಜಿ ಕತೆ ತಿಕ್ಕುಂಡು ದೇವೆರ್-ರಕ್ಕಸೆರ್ ಪೇರ ಸಮುದ್ರೊನು ಸುಲ್ಪುನಗ ಕಡೇಕ್ಕ್ ಅಮೃತೊದ ಕಳಶ ಉದ್ಭವವಾಂಡ್. ಐನ್ ದೆರ್ತ್ ಪತೊನ್ಯ ವಿಷ್ಣುನ ಕಣ್ಣ್‌ಡ್ ಸಂತೋಸೊದ ನೀರ್ ಜತ್ತ್ಂಡ್. ಆ ನೀರ್ ಕಳಶೊಗು ಬೂರ್ದು ಒಂಜಿ ದೈ ಕೊಡ್ಡಿಂಡ್.ಐಕ್ಕ್ 'ತುಳಸಿ' ಪುದರ್‍ ದೀದ್ ಲೆತ್ತ್ಂಡ್. ಬೊಕ್ಕ ಲಕ್ಷ್ಮಿನೊಟ್ಟುಗು ವಿಷ್ಣು ತುಳಸಿನ್‌ಲಾ ಮದಿಮೆ ಆಪೆರ್.

ತುಳಸಿ ಪೂಜೆ

ತುಳಸಿ ಕಟ್ಟೆನ್ ರಂಗೋಲಿ, ಪೂ,ಬೊಕ್ಕ ಕುಕ್ಕುದ ತಪ್ಪುದ ತೋರಣ ಕಟ್ಟ್‌ದ್ ಮಂಟಪೊನು ಅಲಂಕಾರ ಮಲ್ತ್‍ದ್ನೆ, ಲ್ಲಿದ ಗೆಲ್ಲ್ ನ್ ಕಣತ್ತ್ ದ್ ದೈತ್ತ ಮುದೇಲ್‌ಡ್ ನಡೊಡು. ಪುನ್ಕೆದ ಪುಲಿತ್ತ ಗೆಲ್ಲ್‌ನ್‌ಲ ನಡ್‌ಪುಂಡು.ತುಲಸಿದ ಲೆಕ್ಕೊನೆ ನೆಲ್ಲಿದ ಕಾಯಿ,ಇರೆ,ಕೆತ್ತ ಕೂಡಾ ಮರ್ದ್‌ಗಾಪುನವ್ವೆ. ಮಲೆನಾಡ್ ಸೇರ್ದ್ ಮಾತಾ ಊರೂಡು ತುಳಸಿ ಪರ್ಬೊದ ಆಚರಣೆ ಆಪುಂಡು. ತುಳಸಿ ಪರ್ಬೊ ಕರಿಯಂದೆ ಮದಿಮೆ ಲೇಸ್ ಮಲ್ಪುಜೆರ್. ಕೆಲವೆರಂತೂ ಈ ಕ್ರಮೊನು ಇತ್ತೆಲಾ ಆಚರ್ತ್ತೊಂದುಲ್ಲೆರ್.

ಭಾರತೊದ ಬೇತೆ ಬೇತೆ ರಾಜ್ಯೊಡು ತುಳಸಿ ಮದಿಮೆ/ ತುಳಸಿ ಪೂಜೆ

ಆಂದ್ರಪ್ರದೇಶ / ತೆಲಂಗಾಣ

ಆಂದ್ರಪ್ರದೇಶೊಡು ತುಳಸಿ ಪರ್ಬೊನ್ ತುಳಸಿ ಕಲ್ಯಾಣಂ ಪಂಡ್‍ದ್ ಲೆಪ್ಪುವೆರ್. ಉಂದೆನ್ ಕಾರ್ತಿಕ ಶುಕ್ಲ ದ್ವಾದಶಿ, ಉತ್ಥಾನ ದ್ವಾದಶಿ ಇಜ್ಜಾಂಡ ಕ್ಷೀರಬ್ಧಿ ದ್ವಾದಶಿಗ್ ಆಚರ್ಪುವೆರ್. ನೆಲ್ಲಿ ಗಿಡತ್ತ್ ಗೆಲ್ಲ್ ನ್ ವಿಷ್ಣು ದೇವೆರೆನ ರೂಪೊಡು ದೀದ್ ಪೂಜೆ ಮಲ್ಪುವೆರ್. ಆ ನೆಲ್ಲಿದ ಗೆಲ್ಲ್ ನ್ ತುಳಸಿದೊಟ್ಟುಗ್ ದೀಪೆರ್. ತುಳಸಿನ್ ಮದಿಮಾಲೆನ ಲೆಕ ಅಯ್ತ ಮಲ್ತ್‍ದ್ ಒಟ್ಟಿಗೆ ಪೂಜೆ ಮಲ್ಪುವೆರ್.