ಕೆರೆಂಗ್‍ದ ಉಪ್ಪುಕರಿ

ಕೆರೆಂಗ್ ದ ಉಪ್ಪುಕರಿ

ಕೆರೆಂಗ್ ದ ಉಪ್ಪುಕರಿ
ಬೇತೆ ಪುದರ್	ಕೆರೆಂಗ್ ದ ಉಪ್ಪುಕರಿ
ಬಗೆ	ತಿಂಡಿ
ಮೂಲದ ಜಾಗೆ	ಭಾರತ
ಪ್ರದೇಸೊ	ಕುಡ್ಲ,ಉಡುಪಿ
ಬೊಡಾಯಿನ ಸಾಮಾನ್	ಕೆರೆಂಗ್

ಕೆರೆಂಗ್ ದ ಉಪ್ಪುಕರಿ ಉಂದು ಬಯ್ಯ ಇಜಿಂಡ ಕಾಂಡೆ ಚಾತ್ತ ಬಾಯಿಗ್ ತಿನ್ಪಿನ ತಿಂಡಿ. ಕೆರೆಂಗ್ ನ್ ಕಾಲಿ ಬೆಯ್ಪಾದ್ ತಿನ್ಪಿನೈರಡ್ದ್ ಉಪ್ಪುಕರಿ ಮಲ್ತ್ಂಡ ರುಚಿಯಾಪುಂಡು . ದಾಯೆ ಪಂಡ ಉಂದೆಕ್ಕ್ ಒಗ್ಗರಣೆ ಕೊರ್ದಿಪ್ಪುನೈರ್ದಾವರ ರುಚಿ ಎಡ್ಡೆ ಆಪುಂಡು. ಉಂದೆನ್ ಹೋಟೆಲ್ ಲೆಡ್ ಬಜಿಲ್ ದೊಟ್ಟುಗ್ಲಾ ಮಲ್ಪುವೆರ್. ಇಜ್ಜಿಂಡ ಅಂಚನೆ ಬಲಸುವೆರ್. ಕೆರೆಂಗ್ ಚೀಪೆ ಇಪ್ಪುನೈರ್ದಾವರ ಉಂದೆನ್ ತಯಾರ್ ಮಲ್ಪುನಗ ಬೆಲ್ಲ , ಸಕ್ಕರೆ ಬೆರೆಸೊಡುಂದಿಜ್ಜಿ. ತುಳುನಾಡ್ ದ ಮಾತ ಪ್ರದೇಸೊಡು ಈ ತಿಂಡಿನ್ ತಯಾರ್ ಮಲ್ಪುವೆರ್.

ಬೋಡಾಯ್ನ ಸಾಮಾನುಲು

• ನೀರುಳ್ಳಿ - ೧.
• ತಾರಾಯಿದ ಪೂ - ೧ ಕಪ್
• ಕೆಂಪುಮುಂಚಿ -೪/೫.
• ದಾಸಿಮಿ- ಕಾಲ್ ಚಮ್ಚ.
• ಬೊಲ್ಲುಲ್ಲಿ - ೪/೫ ಅರಿ.
• ಉರ್ದು - ಒಂಜಿ ಚಮ್ಚ.
• ಬೇಸೊಪ್ಪು(ಒಗ್ಗರಣೆಗ್).
• ಉಪ್ಪು - ರುಚಿಗ್ ಬೋಡಾಯ್ನಾತ್.
• ಅಡಿಗೆ ಎಣ್ಣೆ - ೨ ಚಮ್ಚ.

ಮಲ್ಪುನ ವಿದಾನೊ

ಸುರುಕು ಕೆರೆಂಗ್ ದ ಕಂಡೆನ್ ದೆಕ್ ದ್ ಅವೆನ್ ಹದ ಎಲೆಲ್ಯ ತುಂಡು ಚೌಕಾಕಾರೊಡು ಮೂರ್ದು ದೀವೊಡು. ಅವೆರ್ದ್ ಬೊಕ್ಕ ಬಾಣಲೆಗ್ ಚೂರು ಎಣ್ಣೆ , ಉರ್ದು , ದಾಸಿಮಿ, ಬೊಲ್ಲುಲ್ಲಿ ದ ಒಗ್ಗರಣೆ ಪಾಡ್ದ್ ನೀರುಳ್ಳಿ ಪಾಡೊಡು. ಒಗ್ಗರಣೆ ಕಾಯಿ ಬೊಕ್ಕ ಮೂರ್ದಿನ ಕೆರೆಂಗ್ ದ ತುಂಡುಲೆನ್ ಪಾಡ್ದ್ ಉಪ್ಪು ಬೆರಸ್ ದ್ ಒಂಜಿ ಲೋಟೆ ನೀರ್ ಮಯ್ತ್ ದ್ ಕೆರೆಂಗ್ ನ್ ಬೆಯ್ಪಾವೊಡು.ನೀರ್ ಪಾಡಿ ಬೊಕ್ಕ ಮೇಲ್ ಗ್ ಪೆರೆದಿನ ತಾರಾಯಿದ ಪುನ್ ಬಿರ್ಕೊಡು. ನೀರ್ ಆಜಿ ಬೊಕ್ಕ ಕೆರೆಂಗ್ ಬೈತ್ಂಡ ತೂದು ಜಾದ್ ದೀವೊಡು.

ಬೇತೆ ಬಾಸೆಲೆಡ್ ಕೆರೆಂಗ್ ದ ಉಪ್ಪುಕರಿ

• ಕನ್ನಡ - ಗೆಣಸಿನ ಉಪ್ಪಿಟ್ಟು.
• ಇಂಗ್ಲಿಷ್ - ಸ್ವೀಟ್ ಪೊಟೇಟಟೊ ಸ್ಟಿರ್ ಫ್ರೈ.
• ಹಿಂದಿ - ಶಂಕರ್ಕಂದ್ ಕೀ ಸಬ್ಜೀ.
• ಕೊಂಕಣಿ - ಕಣ್ಗ ಉಪ್ಕರಿ.